全實景系列《香檳大厦 1:55 am 行人止步》重製版 (已完結): 第十九章：【時也命也】
1:55am - 香檳大廈B座1/F 戴東尼酒店正門
Fiona合上雙眼，唔敢想像自己嘅下場，但越要自己唔諗，卻越會將所有見過嘅畫面，全部都投射到自己身上：「畀萬蟲噬咬、畀女屍捉入牆、畀石膏淹沒眼耳口鼻而窒息。」雖然只係幻想，但係合上眼嘅一刻，Fiona確實見到女屍迎面逼近，佢覺得自己嘅幻想會全部應驗。
一隻冰冷嘅手大力拉動Fiona身體，將佢上身扯走，手臂幾乎快被拉斷。Fiona心想：「完了。」
「呯﹗」黃經理快速關上時鐘酒店大門，門角上掛住嘅風鈴搖擺得好厲害，鈴鈴嘅聲音就好似道士手中嘅搖鈴法器。
黃經理放開Fiona手臂，然後將佢成個抱起，飛地從樓梯走落去大堂。
直到呢一刻，Fiona先真真正正回過神來。喺落樓梯嘅巔岥過程中，Fiona感受到身體被黃經理用力抱實，當發現自己仍然係完好無缺時，不禁呼出一口氣。
黃經理一邊走一邊留意到梯級上有一滴滴表面仍有光澤嘅新鮮血液。雖然血已經出現喺佢哋未行到嘅地方，但黃經理仍然緊張地問 Fiona：「Na姐，您有無事呀？係咪受傷流血呀？」。經歷一連串嘅怪事後，仍然能夠保持理智，已經係不幸中之大幸。
Fiona望一望地上嘅血跡：「無呀，啲血唔係我架！」佢發現血跡一直伸延到黃經理身後上一層樓梯嘅轉彎位。
「唔知邊個咁唔好彩喇……」Fiona嘆一口氣，心中一陣難過，又想起之前診所嘅護士姨姨。
兩人到達香檳大廈大堂，正當黃經理想轉出去大廈門口時，赫然發現大堂走廊遠遠嘅末端有四、五個人影。
黃經理唔肯定嗰啲係咪真係人，立即拉住Fiona，喺一個寫住「正宗桑拿」嘅座地燈箱招牌後面踎低。
燈箱1.5米高 x 1米闊，勉強能夠遮掩一個人。
「好彩！」黃經理透過招牌同牆壁中間嘅空隙，慢慢判斷外面情況。
遠處並非五個人，而係五隻無頭殼怪物喺走廊末端徘徊，不斷用鼻探索四週氣味，似乎正在追蹤獵物。
招牌外不遠處明顯有較多血漬喺地上，黃經理猜測：「睇嚟流血嘅人企咗喺度一段時間。」
唔知點解，佢感覺呢啲血可能係屬於佢認識嘅人。
「喂喂，出面點呀？」Fiona輕力拍黃經理膊頭，想知道外面環境如何。佢躲藏喺黃經理背後，用手揉搓剛剛被捉住嘅手臂，紅紅腫腫瘀了一塊。
「出面有怪物。」黃經理細聲回應。
黃經理拉回視線，轉而望外大堂外面，希望白朦朦嘅大霧消失，不過眼前嘅景象令佢驚訝不已。
大廈門口不見了。
出入口位置變成一幅牆，由地下伸延到天花。黃經理出入香檳無數次，從未見過呢幅牆。佢唔敢相信自己眼睛，摔一摔眼再望清楚：「木板？」
牆上有好多一個個由樹木嘅年輪形成嘅木紋，雖然遠睇似一幅牆，但其實只係由一塊塊木板組成。
「邊個咁得閒封哂啲出口？」黃經理暗罵，記起剛剛由後樓梯走到地下時，防煙門出口同樣被木板封死。
「吼吼吼……」樓上傳來一陣吼叫聲。黃經理身後嘅Fiona將自己身體縮得更小：「點算好呀，好似落緊嚟呀﹗」
前無去路，後有追兵，黃經理希望找到方法脫險，腦筋快速轉動時，佢望見地下嘅血跡。
因為氧化作用，血跡逐漸轉為深紅色。一滴滴血液，一邊伸向燈箱旁邊，直上一樓。另一邊則向大堂另一邊走廊漫延。黃經理將燈箱招牌稍為移動一下，查探血液蔓延嘅地方。
血跡去到前面無幾遠嘅地方已經消失。
黃經理抬頭一睇，一個白底紅字嘅招牌映入眼中 - 「錢虹相機」。佢快速打量四圍情況，除咗呢間鋪頭嘅閘落咗一半之外，附近店舖全部都已經落閘。黃經理留意到，血滴喺相機鋪門前消失，心諗:「裡面會唔會有人？」。
只有行過去先可以知道答案，但較大嘅舉動會容易被怪物發現。黃經理上身不經意向前挨，燈箱稍微向前移動。原來燈箱下有轆，所以黃經理可以輕易推開呢個大招牌。
「Na姐，幫我掹咗個插頭佢……」黃經理指向Fiona腳旁嘅電掣細聲講。燈箱原本無發光，所以黃經理並無擔心會引起怪物注意，只係電線太短，唔可以將燈箱推得太遠。
Fiona一個OK手勢，然後輕聲喺黃經理耳邊講：「掹咗啦。」
黃經理將燈箱電線捲成一個圈圈放喺手上，再將招牌向前推，有字嘅一面仍然面向怪物，慢慢移出一條窄窄嘅通道，令佢同Fiona可以繼續利用燈箱嘅掩護慢慢移動。
縱然樓上嘅叫囂聲已經逼近，縱然附近嘅怪物不停搜索，兩人嘅動作仍然要保持緩慢嘅速度。
沿住血跡嘅路線，黃經理連同燈箱一同向後移動，Fiona緊緊地隨黃經理同步移動，唯一擔心怪物從後出現。
佢哋一直後退到錢虹相機鋪前，怪物們都無察覺佢地嘅蹤影。黃經理想用力推開玻璃門，但發現門似乎被鎖上，呢一點黃經理之前都忽略了。
雖然黃經理再加大力道，但門仍然文風不動。黃經理著急，Fiona亦諗唔到任何辦法。鋪入面烏燈黑火，唔似有人喺裡面。
與此同時，走廊末端傳來幾聲怪叫，同一樓大堂嘅怪物相遇，發出一陣騷動，其中幾隻更開始向黃經理嘅方向前行，黃經理顯得更焦急。
「Fiona，一陣您暱喺呢度唔好郁，我出去引開佢哋……」黃經理吩咐Fiona。
「唔好呀，佢地咁多隻，您一定走唔甩架，唔好出去啦……」Fiona情急地說，眼神充滿擔心同無助。Fiona唔敢確定自己係咪鍾意黃經理，只知道呢一刻眼前呢個男人係佢唯一依靠。
「乖，您聽我講，一個人死總好過兩個人死，我一個人可以跑得快啲，佢哋無咁易追上我。只要佢哋一走開，您就快啲走去A座嗰邊嘅出口離開香檳，搵人求救，清楚嗎？」黃經理知道無太多時間可以說服Fiona，唯有交帶一個任務，先可以令佢乖乖聽話。
「……」雖然唔捨得，但Fiona無法反駁，隻腳仍然隱隱作痛，逃跑速度都一定會慢，會成為黃經理嘅負累。
「Fiona……小心啲……」黃經理再一次緊緊握實Fiona隻手，唔捨得放開。佢深呼吸一口氣，預備迎接即將發生嘅大逃亡。
「走，未必再走得郁……」黃經理已經35歲，體力比年輕嘅阿 Ken佢地啲後生仔遜息，跑步嘅速度一定比佢地慢，更何況經歷咗咁多次險境，黃經理已經覺得好攰。
「但無論幾攰都好，都唔可以係Fiona面前示弱，我唔可以令佢嘅意志都消磨埋。」男人嘅天性都係唔衰得，黃經理亦唔例外。
而正當黃經理打算走出去之際，相機鋪玻璃門發出「卡嚓」一聲，門鎖被解，門向內被拉開。
「快﹗快啲入嚟﹗」一把壓得低沉嘅女聲傳出。
「謝天謝天﹗」Fiona立刻將黃經理拉返自己身邊：「我地快啲入去啦﹗」
Fiona差一點就將黃經理整個人拖入相機鋪。佢哋迅速轉入鋪內一個高度同普通寫字枱相約嘅座地飾櫃後，離開玻璃門範圍。
神秘女子快速而又無聲地關上玻璃門，並立即扭上門鎖。
透過櫥窗密密麻麻嘅相機貨架空隙望出去，六隻怪物從左右兩邊一湧而出，其中一隻甚至貼近玻璃櫥窗，用力吸一下空氣中嘅味道。神秘女子向下一縮，暗叫一句：「好險，差啲畀佢見到。」
黃經理同Fiona瑟縮一角，屏息靜氣，透過貨架間嘅罅隙，望見怪物嘅腳不斷喺鋪頭外左右徘徊。
直至所有怪物離開，佢哋先鬆一口氣。
「多謝您及時開門比我哋入嚟呀。」Fiona企起身，向眼前呢位女子道謝。
「唔駛客氣，你哋無事就得啦，救得一個得一個。」神秘女子拍拍手臂上嘅灰塵：「如果個八婆再阻住我耐啲，怕且你哋已經被怪物分屍﹗」
「八婆？」黃經理追問：「呢度仲有其他人咩？」
神秘女子無再回應，逕自走去玻璃門檢查門鎖
相機鋪頭陳設好舊，格局同一個四四方方嘅盒一樣。玻璃門右邊係一列櫥窗架，排滿唔同款式同型號嘅相機鏡頭，有長有短。剛剛黃經理用作掩護嘅座地飾櫃內亦有形形式式、看似懷舊嘅古董相機。
玻璃門左邊嘅櫥窗架上，卻滿佈一系列款式比較新嘅相機及鏡頭，又黑又圓嘅鏡頭向鋪內排列整齊，遠睇就似一道由鏡頭堆砌成嘅牆。櫥窗傍邊嘅米白色牆上寫住「錢虹相機」四隻招牌大字，大字之下係一張體積頗大嘅工作枱兼櫃枱，工作枱上擺放住好多工具及幾個鏡頭，凌亂不堪。
鋪內所有物件都佈滿灰塵，充滿住歷史痕跡。
突然，櫃檯後嘅牆被打開，一個著住校服嘅男孩向外探頭。
由於暗門嘅顏色同牆身一樣，只有仔細觀察先會發現，黃經理亦直至男孩出現先知道有道暗門嘅存在。
「Hi，你都幾勁喎，用個招牌擋住四五隻怪物，就咁走過嚟，你係得嘅！」男孩一探頭就同黃經理打招呼。
「你見到我？」黃經理驚奇，因為剛才身處險境嘅時候，佢清楚見到除咗怪物外，並無其他人在場，應該無人知道佢用招牌做掩護。
男孩暗門後走出鋪內，上下打量黃經理同身邊嘅Fiona，然後講：「我裝咗個機關，出面發生乜嘢事我都睇到。」黃經理順住佢指向牆上嘅兩個位置望過去，只見暗門頂吊住一條白色管道，從天花位置一直伸延到櫥窗一邊。黃經理大惑不解，Fiona則一臉茫然。
「係潛望鏡。」男孩顯得揚揚得意。
黃經理立即恍然大悟，但Fiona似乎缺乏對潛望鏡嘅概念，仍然呆若木雞。
潛望鏡，一個透過鏡片反射原理製作嘅裝置。即使隱藏喺隱閉空間，都可以透過潛望鏡窺探外界嘅動靜。潛水艇中嘅潛望鏡係最好嘅應用例子，潛艇內嘅人可以從水底觀察水面情況。男孩利用相機鋪內林林總總嘅相機及鏡頭組件，輕而易舉地製作潛望鏡。
「所以，你就喺係裡面一直睇住出面嘅情況？」黃經理問。男仔得意地點點頭：「係呀。」
佢一邊講，一邊爬到工作枱上，檢查潛望鏡管道：「如果唔係我睇住，恐怕你哋同之前嗰兩個人都做咗怪物嘅點心啦！」
黃經理一直望住男孩校服上面嘅校徽，猶豫地問：「你係讀陳楠修工中？」
「哈，你都識得我學校？」男孩轉過頭望向黃經理，面帶笑容：「睇嚟間學校真係差到街知巷聞。」
「所以最後都摺埋咗。」黃經理語調淡然。
男孩再次埋首整理管道，並無留意到黃經理嘅說話。
九十年代中期因收生不足，陳楠修工業中學被教育署勒令停辦，黃經理係最後一屆中五畢業生。佢清楚知道呢位比佢細差不多廿年嘅男孩，係佢同校師兄。
黃經理一陣感慨，為佢地嘅母校結局感覺悲哀。
「好啦，宜家總算安全啦！」神秘女子從Fiona身後出現，拍拍身上灰塵說：「今日真係熱鬧，又嚟多兩個人。」
「謝謝小姐出手相救，如果唔係我同Fiona都無路可逃。」黃經理向神秘女子伸出右手：「未知可以點叫您哋？」
「巫奕敏。」 女子爽快回答：「不過您地叫我毛毛得啦，我唔慣比人叫全名架。」毛毛同黃經理握手。
黃經理望向男孩，對方亦立即自動報上名來：「財仔，啲街坊街里都係咁嗌我。」
「Hi，毛毛、財仔，我叫Fiona。」Fiona笑語盈盈，黃經理則看得失神。
佢用手肘撞一撞黃經理，喺佢耳邊細細聲講：「喂，到你啦！」
「啊！係，我叫黄……」話未講完，暗門後就傳來低沉嘅慘叫聲，打斷黃經理嘅自我介紹。
受本能驅使，眾人立即踎低，慎防被怪物發現踪跡。財仔最先意會到聲音傳出嘅方向，一個箭步拉開暗門竄入內室，毛毛、Fiona同黃經理從後跟隨。
內室係一條約五米長、兩米闊嘅走廊通道，左邊有兩個房間，面積不大。內室有七、八個人，密密麻麻逼埋一邊，部份人站立，部份人則躺臥地上。黃經理最先留意到地面嘅血跡，再透過人群中腳與腳之間嘅空隙，見到不遠處有一個赤裸上身嘅男子跪地，不斷叫喚面前一個躺臥地上穿著紅色衫嘅人。
「Ken，你醒下呀Ken﹗唔好瞓呀……紗布呢？紗布有未呀？」一把男聲咆哮，然後轉過頭望住所有人。
黃經理呆住了。
「阿琛？」黃經理不敢相信自己眼睛，然後從人群中間掙脫，望向正在跪地嘅阿琛。
此時此刻，阿琛亦被眼前人嚇呆，佢無諗過會當下嘅情況同黃經理相遇。突然間，大家都唔知講乜嘢好。
「經理……」阿琛嘴唇震抖。
「啊﹗點解佢會咁架？」Fiona驚叫，並快步走過去嗰個瞓係地上嘅紅衫人身邊。黃經理被Fiona突如其來嘅舉動吸引，轉移視線，佢一望就知道事態嚴重，不禁抽了一口涼氣：「阿Ken﹗﹗」
黃經理腳踏地板上嘅血，整個人幾乎一仆一碌地向阿 Ken身邊滑過去。當見到阿Ken血淋淋嘅左臂時，黃經理心頭立時一沉。佢摸一摸阿Ken額頭，冰冷嘅汗水由額角滲出，蒼白嘅咀唇看上去跟死人並無分別。黃經理將面貼近阿Ken嘅鼻，嘗試感受一下佢嘅氣息，視線注視到阿Ken嘅胸口：「好彩，仲有呼吸，但好弱……」
阿琛回過神，然後衝入其中一個房間，叫著：「搵到紗布未？放喺邊度？我幫你搵。」
房入面一把洪亮嘅男聲響起：「搵緊啦，應該係呢堆嘢附近……你嚟幫我移開呢堆嘢先……」
另一邊，Fiona望住氣若游絲嘅阿Ken，再望望佢已經消失嘅左手，心裡面覺得好難過。雖然Fiona剛剛從黃經理口中第一次得知阿Ken嘅名字，但平時見到對方喺香檳做外展時，都有傾吓偈講吓笑。兩人未算得上熟絡，不過都算係一個自己認識嘅人，見到宜家嘅狀況，Fiona都好想幫忙，佢二話不說，從自己嘅白色恤衫嘅衫腳撕下一圈布，放左掌心擠壓成一團充當臨時紗布，直接按在阿Ken嘅斷肢位置。
「無論咩嘢情況，一定先幫傷口止血，否則會失血過多。」雖然已經忘記係邊個電視節目，又或者係教育電視，但Fiona記得以前曾經聽過呢段說話。
Fiona怕會令阿 Ken覺得痛而不敢太大力觸碰對方，但黃經理一手捉住Fiona，將佢隻手連同白布用力按壓阿Ken嘅傷口。
迷糊中嘅阿Ken隱約痛叫一聲，佢嘅身體已經好虛弱。
「你幫我㩒實佢個傷口，無論佢點痛都唔可以放手，知唔知﹗」黃經理異常緊張地吩咐Fiona，而Fiona都緊張地點點頭。
「有啲咩嘢可以止到血……」手足性命危在旦夕，黃經理從未如此希望自己嘅轉數可以再快啲。佢抬頭望向其他地方，想尋找有用嘅工具，但發現房間內嘅所有人都將目光注視喺自己身上。
房間內除咗毛毛同財仔外，仲有一個係地下，膝頭墊住額頭嚟坐嘅阿伯、兩個六十年代打扮嘅姨姨、一個攬住布公仔，大概五、六歲嘅妹妹，另外仲有三個男人 - 兩肥一瘦，佢哋正色迷迷咁望住Fiona，而瘦削嘅男人，手上不斷拋住一串鎖匙，發出規律但令人覺得煩厭嘅響聲。
黃經理心知呢幢大廈嘅詭秘之處，能令不同年代嘅人於同一時空集合，所以佢並無因為各人外表嘅差異而覺得好奇。當下一刻佢只想搵出幫到阿Ken止血嘅方法，但鎖匙碰撞而發出嘅金屬聲音令人注意力分散，佢覺得尤其煩擾。
「靜啲得唔得呀﹗」黃經理突然衝上前，一手搶過瘦削男人手中嘅鎖匙，大大力拋落地下。
當身處有人受傷旣嘅危難關頭，就算唔伸出援手都至少要減低聲浪，黃經理唔明白世界上點解可以有啲咁自私嘅人，眼見其他人受苦都仍然無動於中。
瘦男居然反撃，推開黃經理說：「我拋鎖匙又關你乜嘢事呀？」而其中一個體形肥胖嘅男人執起鎖匙並說：「大佬，駛唔駛幫你教訓佢？」
瘦男施施然從肥男手中接過鎖匙，用手指勾住鎖匙圈，不停轉動：「你唔係以為你大佬我搞佢唔掂呀嘛？行開啦﹗」
黃經理被推開兩步，眼定定望住肥瘦二人，佢發現瘦男手中正在轉動嘅鎖匙上有一個黑色圈，黃經理再望清楚，原來係一條黑色索帶。
「索帶……索帶……係啦…索帶呀﹗」黃經理如夢初醒，走到財仔面前問：「財仔，你有無索帶呀？我需要用。」
「索帶？有呀，我有一包係書包度，你等等……」財仔一下子就衝出去外面。
「四眼仔，你好好打呀？我龍志超想做乜嘢，你就多管閒事，托呀？好好地睇住你個跛手仔啦﹗」龍志超走過去黃經理身邊，一邊用手指篤佢手臂一邊講。
黃經理忍無可忍，一個反手捉住龍志超隻手指並用力向下屈。「哎呀呀呀……喂，斷啦斷啦……」龍志超冷不防黃經理有此一著，連連叫痛。
龍志超身邊兩個肥男見到呢個情景，都一湧上前將黃經理推埋牆邊，作勢預備打黃經理。黃經理無縮手，更加用力向下屈，龍志超直頭嗌救命。
「停手！要打就出門口打啲怪物！唔好喺我呢個地方打交！」房門旁邊一個身材魁梧嘅大叔，左手叉腰，右手攞住兩捲繃帶，向眾人喝罵。阿琛從大叔身後探頭，見到黃經理被兩個肥男捉住，佢即刻上前將肥男推開。
黃經理一放手，龍志超就立即搓擦自己嘅手指，面上痛苦嘅神情，引得其他人竊竊偷笑，而毛毛更直頭發出嘻嘻嘅笑聲。
「四眼仔，記得睇路呀﹗」龍志超連同兩個肥手下穿過暗門走出去鋪面，此時，財仔亦帶同索帶返回房間。
「黃先生，你要嘅索帶呀。」財仔將索帶遞向黃經理。黃經理抽起其中幾枝，然後返回阿Ken身邊。
「啲血仲係不停咁流，點算呀？」Fiona仍然按壓住阿Ken嘅傷口，但血已經令整塊布濕透，令Fiona手上沾滿阿 Ken 嘅鮮血。
「OK，我嚟處理……」黃經理望住索帶沉思一陣，然後轉身問阿琛：「琛，阿Ken隻斷手係邊呀？」
阿琛手拿紗布繃帶急忙地走去黃經理身邊跪低，慚愧地說：「阿Ken……佢……隻手……無咗……」
「搵唔返？」黃經理追問。
「佢隻左手……喺我地逃走時……比怪物扯斷……已經唔喺度……對唔住……」阿琛聲線抱歉，眼角有淚水湧出。佢回想同大蜘蛛爭持嘅情境，記起自己有份扯斷阿Ken隻手，雖然係逼不得已，但仍然覺得十分內疚。
黃經理定一定神，拿過阿琛手中嘅紗布，一層一層地覆蓋喺阿Ken傷口上，然後再用繃帶喺斷手位置用打「8」字方式纏緊，但血仍然繼續滲出。佢將索帶圍成一個圈，套入阿Ken斷手嘅上方位置，然後收緊索帶。
阿Ken喺迷糊之中又慘叫一聲，Fiona連忙安慰阿Ken，亦感覺十分難受。
黃經理再將另一條索帶套入再索緊，然後抬起阿Ken隻手，觀察出血情況。「用上索帶，就無得返轉頭……」佢心知止血帶會引致傷肢缺血而壞死，宜家甚至用上索帶，但同時佢亦明白阿Ken嘅左手已經無可能搵得返，目前最急切嘅係為阿Ken止血：「就算搵返隻左手都駁唔返……」
唔駛一陣，流血嘅速度開始減慢，繃帶上滲出嘅血越來越少，黃經理鬆一口氣。
「佢……點呀？」毛毛同財仔都走過來慰問。
「雖然止咗血，但之前失嘅血太多，仍然好危急，要快啲送走佢去醫院先得……」黃經理說。
「走？好笑，如果我走到我早就走咗啦，你呢位小兄弟，無行架啦。」其中一個大嬸終於開聲。
「八婆﹗你駛唔駛咁講嘢呀？」一聽到個大嬸講出咁涼簿嘅說話，毛毛氣憤地反駁。
「家下我講得唔啱咩？你咪又係一樣留喺度，夠膽你咪離開呢間鋪頭囉﹗」大嬸語氣得戚：「膽又無，又係咁救埋哂啲無謂人，你估呢度好大呀﹗」
毛毛默不作聲，握實拳頭，佢知道自己真係缺乏勇氣行出去錢虹相機鋪出面。
「哎呀……蘭姐、毛毛，你地唔好成日嘈啦，大家都係同坐一條船，應該好好相處先係嘛。」頭先喝走龍志超嘅大叔走出嚟，開聲想平息爭吵。
「德哥，唔係我想嘈架，我都係講事實啫，試問呢度邊個可以走得出去？而且呢條o靚妹無大無細自把自為，我都係幫你教訓下佢，免得佢下次又唔知救埋啲咩嘢人返嚟，暴露咗我地呢間房咋。」蘭姐反辯。
「係呀德哥﹗呢條靚妹救埋返嚟啲人都無嚟正經，你睇下嗰個女人著到咁少布，都唔方係正當人家啦﹗」另一個大嬸指住Fiona。
「阿嬸，你講咩呀﹗」阿琛都出聲加入戰團，向兩個大嬸指罵。Fiona則沒有理會其他人嘅說話，只靜靜地陪伴阿Ken。
「夠啦夠啦﹗蘭姐芯姐，你哋入嚟呢間房先啦﹗」德哥讓出身位，催促兩個大嬸。
「算啦，唔好理佢哋啦，快啲睇吓可以點救你朋友啦﹗」毛毛拉阿琛返回去阿Ken身邊。
德哥關上門，再向黃經理講：「唔好意思，佢哋兩個都係死淨把口，無句好說話，你哋唔好介意。」
「我哋都唔想為你帶嚟太多麻煩，但我哋真係好急住要走，德哥，我朋友佢真係唔等得幾耐，如果你知道可以點樣走，拜託你話我哋知﹗」黃經理滿面憔悴。
德哥搖搖頭無回答黃經理嘅問題，只露出一個苦笑嘅面容。
「即係點呀？無得走？無理由架……」阿琛追問。
德哥仍然沉默，獨自轉身離開，走入另一個房間，然後關上門。
黃經理佢地宜家身處嘅內室，基本上只係一條走廊，無窗，除咗頭上一條泛著暗黃燈光嘅光管外，並無其他東西。
兩位大嬸走後，內室又恢復後平靜。
「Ken唔可以留喺度太耐呀經理……」阿琛又再次心急起來：「你哋知唔知道點樣可以離開呢度呀？」佢轉為追問毛毛，毛毛同樣搖頭不語。
阿琛向角落裡一個從未說過話嘅阿伯走過去。
「伯伯，請問你知唔知點樣先可以離開呢度呀？」阿琛踎低以便觀察阿伯，並一邊試探地問。
「琛哥哥，無用架，我由第一次見佢開始佢就已經坐喺嗰度，無出過一句聲。」財仔對阿琛說。
「伯伯，我哋朋友急需要去醫院，我求吓您話比我地知啦有乜嘢辦法啦，唔該你啦！」阿琛拒絕放棄，繼續嘗試。
阿伯依然毫無反應，阿琛懷疑佢可能係撞聾，想行近佢耳邊再講多次。
黃經理嘅說話中斷咗阿琛嘅行動：「琛，你過嚟幫我睇住阿Ken先。」黃經理再講：「我諗德哥應該知道一啲事，只係因為某啲原因唔講，等我去再試下問多次。」
空穴來風未必無因。剛剛黃經理留意到龍志超手下準備出手打自己時，德哥講咗句說話：「唔好係我呢度打交。」黃經理雖然唔清楚「我呢度」嘅意思係拍呢個地方係屬於德哥，定還是呢個暗室同佢有關，但點都好，黃經理猜測再多，倒不如問多一次，應該會得到更多資料，話唔定可以搵出端倪。
黃經理吩咐阿琛捉實阿Ken隻手向上舉，然後就轉身行過去另外一間房。佢喺心入面準備好問題，便舉手敲門：「德哥，方便我入一入嚟嗎？」
等咗一陣，黃經理聽唔到房入面有任何聲音，就再次敲門：「德哥？」
因為有一門之隔，所以只隱約聽到一把沉實嘅聲音：「門無鎖。」
黃經理扭開門鎖，推門而入。裡面係一間俗稱「黑房」嘅房間，喺電子相機尚未普及嘅年代，沖晒底片就要喺黑房進行，避免光線影響菲林嘅曝光，所以黑房裡面只有一盞暗紅嘅燈泡，德哥坐喺一個角落嘅高櫈上，食指同中指間夾住一枝正在燃燒嘅香煙。
關上門後，黑房內出奇地寧靜。
「真係唔該哂你呀德哥，你之前救咗我兩位朋友，宜家又收留埋我地。」黃經理決定先打出感謝牌，常言道「禮多人不怪」，好聲好氣或者德哥會多透露已知嘅事情。
德哥吸一口煙，吐出一圈白霧：「唔駛客氣，幫得到咪幫囉，以前師父教落『有能力嘅都唔幫人，倒不如做無能嘅人算喇』，你話係咪？」德哥彈一彈煙灰再說：「你朋友止咗血未？」
「佢傷口好大，我用索帶套住斷口位置，宜家總算無再大量出血……」黃經理停一停，再說：「不過佢失血過多，需要做緊急輸血……所以我地想快啲可以送佢去醫院。」
「嗯……」德哥「嗯」了一聲後，再沒有出聲。
「德哥，呢度……係你嘅地方？」黃經理試探。
「呢度？哈哈，呢度當然唔係我嘅地方啦，呢度係錢虹嘅地方，出面寫住「錢虹相機」嘛。」德哥故作輕鬆，但語氣中帶點無奈。
「咁但係……你又搵到呢間房嘅？」黃經理再小心翼翼推進。
「其實呢度都係我誤打誤撞咁撞入嚟咋，我見呢度咁秘密，應該都唔會咁易被啲怪物闖入嘅。」德哥回應。
「一幢香檳大廈有咁多個單位，既然又唔係自己地方，就算係亂撞都應該唔係咁易搵到呢度……」黃經理懷疑德哥嘅說話，但又無證據，所以亦唔好意思去質疑。
「既然德哥你搵咗好多地方，咁請問你知唔知道邊度可以走得出去呀？」黃經理再次追問。
二人又落入一遍沉默之中。
「不如你講我知你係點樣嚟到呢度？」德哥反問，並無正面回應黃經理。
冷不防德哥嘅反問，黃經理呆一呆，腦海再次浮現之前嘅回憶。
「我本身喺香檳附近返工，為咗搵阿琛 – 即係出面嗰個男仔，所以夜晚上到嚟八樓搵佢……」黃經理語速緩慢，邊講邊整理思緒：「我記得上到去八樓，見到Fiona – 即係出面個女仔，然後……然後……」
「奇怪？點解會唔記得嘅？」黃經理再一次感到不安，佢曾經嘗試回想之前嘅經歷，但每次去到呢個片段就突然失憶。
「等等先，我想知你係邊一日上嚟架？」德哥煞有介事地問。
「尋日咋。」其實黃經理自己都唔肯定，但直覺上時間唔係過得太耐。
「尋日係指邊年邊月邊日呀？」德哥再問。
「2016年7月7日」黃經理直接回答。佢估計德哥應該知道香檳大厦嘅時空交錯問題，否則德哥唔會特別問年份。黃經理暗忖：「果然無問錯人。」
德哥深呼吸一口氣，合上雙眼。沉默咗一陣子，回過神後抬頭又問：「跟住呢？跟住發生乜嘢事？」
德哥眼神閃爍，眼框似乎湧現淚水。
黃經理見狀便無再多問，繼續敍述佢嘅回憶：「其實我都唔係記得好清楚，印象中好似記得係八樓、有道爛咗嘅門、見到Fiona，之後……之後……好似仲見到個阿伯，應該係看更……係啦……係看更阿伯，跟住我記得仲要落樓梯，好似去咗……五樓……之後仲好似打咗個電話……」
「落咗去？您記得五樓邊個單位，落去做咩嘢？」德哥似乎對五樓特別有興趣。
「…………」今次係黃經理閉目沉思，希望可以記得少少蛛絲馬跡，但無奈佢如何費盡所有「腦力」，記憶依然空白：「Sorry，唔知點解，呢段時間發生嘅事我居然一啲印象都無……我最後記得嘅感覺應該係……好凍……」
「你指去到五樓覺得好凍嗎？」德哥確認一次。
「應該……係掛……」黃經理自己都唔肯定。
德哥凝視前面嘅工作檯，顯然想得入神，黃經理無打擾德哥，獨自瀏覽黑房嘅環境。
工作檯上面放滿了好多膠盆、菲林同夾仔，仲有一枝枝嘅顯影藥水，凌亂不堪。附近有兩個高身座地櫃呈半打開狀態，裡面密密麻麻全部都係一疊疊嘅底片，估計有百幾疊。
兩條繩橫掛喺另一邊牆上，其中一條夾住三條底片，但燈光太暗，黃經理睇唔清楚底片上嘅影像。
德哥旁邊亦擺放咗一部舊式幻燈片機，黃經理回想以往未有PowerPoint時，老師就係用幻燈片機投射圖象。「呢度真係好舊……」黃經理感嘆。
「德哥？德哥？」黃經理見德哥無反應，便問：「你無事嗎？」
只係輕輕一叫，德哥卻整個人彈起，連黃經理都被嚇一跳。「係，係，我無事……只係……諗嘢諗過龍姐……」德哥以笑打圓場，令黃經理更覺得古怪。
此時，外面傳嚟一陣急速拍門聲，並有人在叫：「經理！經理！經理！」
黃經理立即回頭開門，阿琛一臉緊張叫喊：「經理！阿Ken醒咗啦！」黃經理二話不說衝出黑房，查看阿Ken情況。
黑房門被黃經理順手關上，只淨德哥一個。德哥左手摸住身旁嘅幻燈片機，「啪」一聲打開電源掣。
幻燈片機內膽正在溫熱，淡黃光源慢慢向外投射，機器已經準備就緒。
德哥從高櫈跳下來，先去反鎖木門，接著打開座地櫃門，門嘅內側貼滿唔同年份嘅標誌，每十年一個標誌，對應櫃內每一個層架。佢仰視最頂層嘅一堆菲林卷，而該層架則未有標示年份。
德哥之前花費咗大量時間逐卷逐卷菲林檢查，並將年份分類。佢從2010年至2020年嘅層架位置，抽出其中幾疊底片，放到幻燈片機上。
泛黃燈光穿過底片影像，投射到對面嘅牆上。
內容係報紙嘅新聞報導：
「2016年7月9日……
……事發的香檳大廈已經全面封鎖，不得任何人出入。今次案件乃是繼1982年「雨夜屠夫」，以及1992年「屯門色魔」外，香港開埠以來最多人死亡的連環兇殺案，警務處處長盧偉聰以及行政長官均表示震驚，並承諾徹查事件，還受害人一個公道……
已知的受害人名單：
黎月東(45歲),郭 雄(36歲),陳偉傑(28歲),林凱洋(29歲),林達証(32歲),黃兆初(35歲)……
……由於已有大部份屍體被兇手處理或棄掉，而香檳大廈人流複雜，每天出入人數太多，警方需要大量時間翻看相關的閉路電視錄影，核對受害人或失蹤者資料，在搜證方面可說是困難重重……」
德哥抽起新聞報導底片，再換上另一疊同一宗新聞嘅圖片，包括現場照片及部份受害人的生活照。
「唉……時也命也……」德哥望向門口，搖頭嘆氣。
(待續)