全實景系列《香檳大厦 1:55 am 行人止步》重製版 (已完結): 第十八章：【絕處】
1:55am - 香檳大廈B座6/F B室 全麗內衣有限公司
嘩啦嘩啦嘅水聲停頓。
阿Ken係第一個留意到整個空間一下子靜落嚟，佢企起身向後靠牆，阿琛亦跟隨，做好準備面對未知嘅事。佢哋望住辦公室嘅出入口，等待即將出現嘅怪事。不過，除咗自己嘅呼吸聲之外，並無發生任何事。
「琛，睇嚟我哋要走喇……」阿Ken望向門口：「呢度點出去架？」
「跟住我。」阿琛一馬當先，帶頭行出去。
自從阿琛係香檳大廈呢個詭異嘅空間出現後，佢就不斷穿梭係唔同嘅單位，當中只有宜家呢個單位最大，隱蔽嘅地方亦係最多，而最重要嘅原因係，只要一嚟到呢一層，嗰啲怪物就會自動離開，唔會跟住嚟，所以呢一個亦係佢嚟得最多、最熟悉嘅單位。
全麗內衣公司打通晒六樓B、D及F三個單位，本應共有三個出入口。阿琛之前發現D室嘅門已經被封，變成一堵牆，所以只有B同F可以出入。B室出口鄰近前梯及電梯，而F室出口嘅對面就係中梯同垃圾放置區。辦公地方位於B室，理所當然地去前梯會比較近。
「過嚟。」阿琛細細聲召喚阿Ken，指示佢企喺自己旁邊。
阿琛探頭到外面觀察環境，辦公室出面係一個小型接待處，而隔離就係B室出口嘅木門，距離佢哋而家嘅位置只有五、六步之遙。
「宜家點呀？」阿Ken拍一拍阿琛，但阿琛只撥一撥手，就轉個彎竄出接待處。
正當阿Ken因為呢一下曖昧嘅撥手而猶豫自己應唔應該跟出去之際，一個黑影喺辦公室外面出現，一陣磨擦聲亦隨之響起。
透過狹窄嘅視角，阿Ken隱約見到一個高大嘅身影由牆邊飄出，六呎高，標準模特兒身材，直到就好似櫥窗內嘅模特兒公仔一樣。
眼見個黑影喺毫無心理準備情況下飄出，阿Ken被嚇得心跳加速，用手緊緊按嘴，以防自己發出任何叫聲。佢立即沿牆邊往下滑，然後踎低，將自己隱藏喺黑暗嘅陰影中。而係外面嘅阿琛亦都作出敏捷嘅反應，一個閃身暱喺接待處枱底，靜觀其變。
時間喺不知不覺間過去，四周仍然沒有聲音。正當阿琛想打探外面嘅情況時，六呎高嘅模特兒公仔突然倒下，「呯」一聲，所有部件脫落散開。阿琛望住模特兒嘅塑膠頭碌到接待枱旁邊，心中緊張到極點，雙腳縮得更埋。
模特兒公仔嘅部件正正散落喺辦公室門前，阿Ken躲藏嘅暗角位可以清楚見到門口發生嘅事 - 一個黑影將個公仔推跌，然後迅速經過辦公室門口。
「咁大隻蜘蛛？」雖然只得一秒左右時間，但阿Ken見到一隻外形酷似蜘蛛嘅物體，將個模特兒公仔推倒，然後快速爬向接待處。
那邊廂，縮到無可再縮嘅阿琛一直叮實個公仔頭，連大氣都唔敢抖一啖，佢仲聽到一連串「篤篤篤」嘅聲音由接待處傳出。突然，有一隻手從櫃檯旁邊伸出㩒住公仔頭。阿琛近距離直視呢隻手：「膠手？」
一隻膠造嘅手活生生隨意移動，完全係出乎阿琛意料之外嘅事情。膠手嘅質料同普通模特兒公仔所用嘅手並無分別，表面上係如此的膠卻又可以隨意郁動，甚至手掌位置居然可以好似一般人嘅手一樣郁動，阿琛覺得詭異到極點。
公仔頭蓋被膠手嘅手指以揑豬肉嘅手勢深深插入，突然，頭上嘅眼睛睜大，同阿琛互相對望。
那邊廂，雖然被龐大嘅「蜘蛛」嚇一跳，但阿Ken仍然替阿琛擔心，情急之下佢拎起隔離張枱上嘅釘書機，朝辦公室外貨倉遠處嘅鐵層架掟過去，鐵層架被釘書機掟中而發出清脆嘅聲音徹整個辦公室。
阿琛估唔到公仔頭都同佢一樣聽到聽到呢下敲擊聲，公仔頭被分神，視線移離阿琛嘅目光，而膠手則凌空抽起公仔頭，呢個畫面嚴重衝擊阿琛嘅生物學概念。
「一個膠公仔頭會郁會眨眼會聽到嘢？」阿琛覺得不可思議。
接待處不遠有部好大嘅影印機，旁邊疊高咗六箱A4紙，阿琛襯公仔頭被移開嘅一刻敏捷地轉移暱藏嘅地方，攝入A4紙箱後面嘅隱閉空間。
宜家阿琛終於有機會睇清楚嗰個移動嘅黑影 - 兩邊各有四隻屈曲模特兒公仔膠腳，從一舊肉色嘅物體邊緣部份伸出，支撐整起中間整塊肉；亦有起碼六隻連手肘關節嘅膠手，由肉塊嘅上部伸出；仲有幾隻手分別揑住幾個頭狀物體。遠睇的確似一隻巨大嘅蜘蛛，感覺超怪異。
同樣係辦公室內見到大蜘蛛嘅阿Ken估計中間肉球部份應該有一張餐檯般嘅大小，如果連同膠腳部份一齊展開，要封死一個兩米高嘅出口的確易如反掌：「一定唔可以比呢隻嘢發現……」阿Ken猶有餘悸，亦因為用釘書機聲東擊西嘅策略湊效而沾沾自喜。
隻大蜘蛛怪物向貨倉方向爬走並消失於陰影當中，阿Ken把握機會飛奔到門邊，望出接待處位置，發現阿琛亦同一時間由紙箱後向外面探頭觀察情況，阿Ken即時鬆一口氣。
「你無事丫嘛？」阿Ken不敢出聲問，只向住阿琛做了個口形來問。
阿琛向阿Ken打了個手勢表示安全，然後快速地將個頭往左邊點了兩下，示意阿Ken走過去嗰邊。
確定隻大蜘蛛已經離視線範圍後，阿Ken便飛快地走去B座嘅大門口，準備逃生。與此同時，阿琛亦迅速逃離躲藏嘅地方，一齊向大門口飛奔。
不過，當拉開大門口嘅木門時，阿Ken就立刻呆住。木門後，一道被放咗落嚟嘅捲閘，阻隔咗呢條逃生路線。
「道捲閘明明我之前已經拉起咗架喎……」阿琛回憶之前使用B室出入時嘅情境。
正當阿Ken不知如何是好之際，反應更快嘅阿琛已經嘗試捉住閘下面嘅把手拉起捲閘。
捲閘地下無鎖頭，阿琛預計只要佢稍為用力就可以拉起，但由於拉起捲閘會發出較大嘅聲響，所以佢決定只係慢慢將道閘向上拉出一個身位，夠碌出去就可以。
不過，任由阿琛用盡全身氣力，都拉唔起半公分缺口。佢再試多次，都係徒勞無功。佢趴喺地下，打側頭透過個匙窿望向捲閘嘅另一邊：「奇怪，明明無鎖頭鎖住，點解拉唔起……」
「琛……」阿Ken細細聲叫阿琛：「望上面……」同時亦後退兩步。
阿琛側起頭向上望，赫然發現捲閘上方夾住半邊人頭，面朝向下，單眼望住阿琛。阿琛被嚇得即時彈起，並後退到阿Ken旁邊，心中暗罵一句：「Shit！」
其實個半邊人頭只係模特兒公仔頭，並唔係真正嘅人頭，不過環境昏暗，阿Ken同阿琛都花咗少少時間先確定到唔係真。半邊公仔頭卡喺捲閘上方嘅機關位，難怪阿琛用盡力都拉唔郁道閘。
突然，背後再次傳出「篤……篤篤篤篤……篤篤」聲音，由遠漸近，阿琛立即拉阿Ken飛奔返接待處。佢先推阿Ken落去櫃枱下面，再將自己逼入去呢個狹小嘅空間。
佢哋聽到嘅「篤篤」聲係大蜘蛛嘅「假腳爪」移動時篤落地下發出嘅聲音，無規律，不規則，聽到令人緊張百倍。
「篤篤篤……篤篤……」阿Ken臉上發青，好似青豆一樣大細嘅汗珠沿額角流出，阿琛亦同樣感到那股壓逼，彷彿有一個巨大嘅陰影壓在櫃枱上。
被抓住頭殼嘅公仔頭、活過來嘅假人頭、一隻隻向外伸嘅肢體、一枝枝棟出嚟嘅公仔腳，仲有中間嗰舊肉色嘅身體。阿琛見過一眼之後就難以忘記，與此同時，呢啲怪物就正正向佢哋慢慢迫近。
阿琛記得之前同其中一個公仔頭互相對視：「嗰隻嘢會唔會記得佢曾經係枱底呢？」佢唔確定，但希望隻怪物係無思想。
「宜家點好？」阿Ken只可以做口形問阿琛。阿琛輕按阿Ken膊頭，希望佢唔好輕舉莽動。好彩嘅話，怪物就只係路過，佢哋只需要避一避然後再由另一邊門口逃生。
不過，世事好難盡如人意，阿Ken聽得出篤篤嘅腳步聲越來越近，然後喺最響亮嘅時候突然停止。阿Ken暱係櫃枱底，眼望向外面，牆上映射住一個淡淡嘅黑影。
時間過得房非常慢，櫃枱出面仍然未有動靜。阿Ken唯有寄望唔會被隻怪物發現。忽然間，阿琛作勢拍一拍自己額頭，彷彿如夢初醒。
「Shit，我哋唔記得閂返道木門……」阿琛暗暗自我咒罵：「如果嗰隻嘢真係有腦嘅話，佢應該會知道我哋喺邊度……」
然後阿琛就細細聲喺阿Ken耳邊講：「頭先我暱喺度嗰時，隻嘢好似見到我，而家我哋被佢發現嘅機會好大……Sorry……」阿Ken被嚇得目定口呆。
「我只係想比個心理準備你，萬一有乜事……」阿琛嘅說話突然被接待處上方嘅猛烈碰撞打斷，阿琛同阿Ken亦被撞到稍稍移離原本嘅位置。
「頂住﹗」阿Ken按住阿琛，等佢不至於跌出接待處外面。
不過，另一輪更猛烈嘅撞擊隨之而來，接待處櫃枱整個已移位，佢哋亦跟隨櫃枱跌跌撞撞，十分狼狽。
一陣撞擊赫然停止，恐怖嘅寂靜大約維持咗一分鐘左右。阿Ken心諗可能怪物見撞咗一陣子都無任何效果，所以就放棄？
正當阿Ken慶幸又一次脫離險境時，一聲巨響由頭頂上嘅櫃面木板傳落嚟。有兩個公仔頭同時喺接待處櫃枱左右兩邊出現，望住阿琛同阿Ken，佢哋被嚇到整個人彈起，阿琛頭頂甚至撞上櫃枱嘅枱底。
靈機一觸有時就正正發生喺電光火石之間。阿琛頭撞櫃枱枱底後，索性用力向上頂起整個櫃枱，阿Ken立即意會阿琛嘅用意，協助阿琛向上頂起櫃枱。
櫃枱本身其實唔重，但要將櫃枱頂起亦花費唔少力氣，佢哋估計隻怪物應該係企咗喺上面。阿琛大叫一聲，然後出盡全力頂起櫃枱，阿Ken亦用盡九牛二虎之力，兩個人一直向前衝。
大蜘蛛用幾隻膠腳將櫃枱挾實，但膠腳質地平滑並無磨擦力，不斷搖晃嘅櫃枱令到隻大蜘蛛搖搖欲墜。櫃枱下左右兩邊嘅頭亦失去平衡。
「阿Ken，用力頂呀﹗」阿琛一邊谷盡力托住張枱，一邊叫道。
向前跑約七八步後，佢哋兩個雙手同時向前一推，整個櫃枱隨即飛跌開去，並一路向前滑，直至撞到鐵貨架後停低。呢個時候，阿琛同阿Ken先真真正正要面對成隻奇異嘅怪物。
推倒嘅櫃檯令怪物翻轉，仲砸住佢其中兩隻腳，而其他肢體則抓住唔同嘅頭，係空中擺動，場面雖然詭異又滑稽，但阿Ken都忍唔住笑咗出嚟。
「仲笑，快啲走啦﹗」阿琛笑唔出，佢諗返起之前以為怪物唔會喺呢一層出現，而自己又喺呢度逗留咗一段時間，不禁打個冷震。佢無再多望隻怪物一眼，隨即同阿Ken一齊跑出去。
櫃枱重量不大，大蜘蛛要掙脫其實唔難。阿琛清楚見到怪物總共有六個公仔頭，跳過怪物時所有公仔頭都通通伸過去望實佢地，眼睜得好大，大得好似要將人吞噬。而當阿Ken走過時，視線被怪物中間肉色部份吸引，上面有兩點乳頭狀嘅東西，同一個貌似肚臍窿嘅地方，整隻蜘蛛腹部就似男性軀體嘅胸部及肚子部位，只係軀體上連接住好多會郁動嘅塑膠模特兒公仔手腳。
阿Ken莫名其妙地諗起辦公室枱上寫住「老闆喪禮」嘅月曆。
「如果個老闆係死淨個身，的確係一件好恐怖嘅事。」阿Ken想努力擺脫呢個令人嘔心嘅想法，但額頭卻不意為意地撞向鐵層架，覺得隱隱作痛。
全麗內衣公司嘅貨倉貫穿了三個單位，要去另一個出口就要由B室走到F室，中間要經過十幾個排成一列列嘅鐵層架。阿琛同阿Ken並無理會怪物嘅動靜，加快腳步沿住鐵層架向F室跑去。
「阿琛，前面無路啦﹗」阿Ken喺阿琛後方叫道。佢見到通道盡頭係堵牆，旁邊係鐵層架，佢懷疑阿琛走錯路。
「死火，真係無路添……」阿琛最先到達盡頭，兩旁係密密麻麻擺滿大木箱嘅鐵層架，佢用腳踢開木箱，但木箱比想象中重，任由佢點踢都完全踢唔郁。
阿琛放眼向上望，除咗最頂層，鐵層架每一層都有貨物。「阿Ken，跟住我爬上去﹗」阿琛隨即爬上層架。
「之前呢度唔係咁架喎……」阿琛記得之前呢個單位嘅鐵層架排得非常整齊，可以明顯見到通往F室門口條通道，但勢估唔到原來呢度係盤絲洞，佢哋闖入咗蜘蛛精嘅地盤。
「不過宜家方向正確，只要擒到過去，就可以去到F室門口……」阿琛自我激勵：「一定去到架﹗」
尾隨嘅阿Ken亦到達鐵層架底部，開始向上爬。佢覺得自己好似重返細個喺公園爬鐵架嘅時光。
呢個時候，大蜘蛛從後追上，六個公仔頭神情各異，但同樣發出「嘶嘶」嘅聲音，隨住各塑膠手嘅擺動喺空中左搖右擺，遠睇十足十似蛇髮魔女梅杜莎。
令人驚訝嘅係，隻大蜘蛛竟然跟住阿琛同阿Ken一齊爬上鐵層架。
眼見怪物擧爬動作敏捷靈活，阿琛睇到目定口呆，直到阿Ken嘅手踭撞到阿琛隻腳，佢先回過神繼續向上爬。
隨住大蜘蛛步步進擊，阿琛同阿Ken加快速度翻過頂層鐵架，準備再爬落地面。阿Ken感到十分疲累，恨不得可以即刻返屋企瞓落張床，乜都唔想諗唔想郁唔想做，不過佢知道只要可以逃離香檳大廈已經係萬幸。
後面嘅「嘶嘶」聲未曾休止，鐵層架傳嚟一陣強烈嘅震動。「快啲﹗佢追到上頂啦﹗」阿琛首先到達地面，回頭向阿Ken大叫。而層架頂上已經有兩個頭伸出嚟向下府視。
層架上木箱嘅刺已經拮到阿Ken滿手傷痕，但怪物當前，無時間理得咁多，佢只想爬得更快。「阿Ken，跳落嚟啦﹗快啲呀﹗」阿琛已經走到F室出入口嘅大門，萬分焦急地催促阿Ken，同時解開大門上，分佈喺上中下三個位置嘅門栓。
幸好，三個門栓都無上鎖。阿琛三扒兩撥就已經將全部門栓打開，只差一步就可以逃出呢個鬼地方。
突然，身後傳嚟一聲巨響，阿琛被嚇一跳，立即回頭一望，只見四層高鐵貨架整個倒下，仲有幾個大木箱跌咗出嚟，內衣及模特兒公仔部件散落喺地上，揚起一大堆塵土。
塵霧中，唔見阿Ken，唔見怪物。
「阿Ken﹗阿Ken﹗」阿琛心急地跑返去搵阿Ken，見到佢喺倒下嘅木箱與混亂嘅公仔殘肢之間掙扎。
「呀……好痛……」阿Ken喺地上掙扎，慢慢用左手撐起上身，右手摸頭蓋，但雙腳仍然跪地，佢感覺自己虛弱無力，神智似乎亦有啲混亂：「頭……好痛……」
「嚟呀Ken，我哋要快啲走啦……」阿琛無暇理會阿Ken嘅傷勢，一手抽起阿Ken，扶住佢走向F室大門：「就快走到出去架啦﹗頂住呀﹗」
行唔夠兩步，一隻大木箱就從後飛撲上前，將阿琛同阿Ken撞跌喺地上。
今次連阿琛都覺得超痛，背脊就好似被個錐拮住所有神經線一樣，佢已經無能力留意其他事情。對於忍唔到痛嘅人嚟講，呢下撞擊九成九會令佢痛到暈低。
另一邊廂，已經受傷嘅阿Ken再經此一撞，當場暈倒。而更不幸嘅係，剛剛飛過嚟嘅大木箱足足有90公斤重，宜家牢牢砸住阿Ken嘅左手前臂，令佢動彈不得。
除咗阿琛嘅呻吟聲外，整個空間毫無動靜。
過咗一段時期時間，阿琛對痛楚已經變得麻木，其他感覺神經總算恢復過來。佢亦開始聽到「嘶嘶、嘶嘶」嘅聲音。
「要起身……快……」阿琛催促自己要盡快逃走，終於，佢再次撐起身，望望四周環境。
阿琛的確清楚聽到幾個公仔頭發出嘅嘶嘶聲，但見唔到隻大蜘蛛踪影，佢內心非常不安。而當佢見到旁邊暈咗嘅阿Ken，不安感更加厲害。
「阿Ken！阿Ken！」佢爬向阿Ken身處嘅地方，用力拍佢塊面，希望將佢叫醒：「喂呀……唔好瞓呀……要起身呀……我哋要走呀……喂……」
阿Ken慢慢回復知覺，迷迷糊糊想用手摸頭，但當佢神智進一步清醒時，就感覺到左手被壓住，手臂傳嚟嘅痛楚。阿Ken嘅腎上腺素再一次急劇上升，令佢嘅感覺恢復得更快，痛楚亦越發強烈，形成惡性循環。
「我……我隻手……好痛……郁唔到……」阿Ken痛得說話時口震震，大大粒嘅汗珠係額頭滲出，佢右手握實拳頭，呼吸急速，不斷呻吟：「幫我……阿琛……幫我……」
陷入驚慌嘅阿Ken手腳亂踢，猛力掙扎，甚至強忍痛楚想將左手扯出，但完全無作用。阿Ken好緊張，佢深知如果再唔離開嘅話，遲早會成為大蜘蛛嘅囊中物。
「阿琛……救我呀……」阿Ken臉容上暴露出絕望而驚慌嘅神情。
「得得得，唔好緊張，慢慢抖氣……」阿琛出力抬起大木箱，大木箱微微向上升後，就因為阿琛唔夠力再抬高而壓返落去，阿Ken又痛叫一聲：「好痛呀﹗」
「你等等，我去搵下有無嘢可以翹起個木箱，忍多一陣呀﹗」阿琛大叫，走去門口附近睇下有無鐵筆之類嘅東西，佢望一望自己對拮滿木刺嘅雙手，忍忍作痛。
門口附近空空如也，莫講話鐵筆，想搵枝長條形嘅東西都無。
聽住阿Ken痛苦嘅叫聲，阿琛方寸大亂。「救人要爭取一分一秒……」阿琛心入面嘅聲音提醒自己，但佢實在諗唔到任何可行嘅辦法。
「搵嘢攝起佢……」阿琛自言自語：「……係啦，攝起個木箱咪拉到佢出嚟……」佢諗起其他木箱跌出嚟嘅公仔手腳：「試下啦﹗」
由於左手前臂血管被壓住，阿Ken嘅手掌出現紫紫黑黑嘅瘀血。阿琛學過急救，心知不妙。
「阿Ken撐住呀﹗」阿琛心頭浮現嘅不安感更甚。
阿琛試過用手拉開木箱嘅蓋，希望清空大木箱入面嘅貨物，減輕重量，然後將木箱抬走，但木箱頂係用鐵釘封死，如果無鐵筆去撬，基本上無可能打得開。
最理想嘅計劃行唔通，阿琛唯有執起兩隻膠手，嘗試喺抬起木箱時用腳將膠手踢入箱底。佢踎喺地下，雙手拖住木箱底：「1……2……3……起……」咬實牙關出盡力向上抬。
當阿琛出盡力托起木箱時，雙眼不由自主望向天花板。佢無諗到隻大蜘蛛原來一直倒吊喺天花板嘅喉管上面，監察佢哋嘅一舉一動。突然，大蜘蛛垂直向下撲，跳到木箱上。
「Shit！」阿琛驚呼一聲，向後跌倒。
阿Ken嘅慘叫聲隨之而來。大蜘蛛加上木箱嘅重量，將佢隻手壓得更實，直頭係百上加斤，阿琛聽到來自箱底嘅清脆斷裂聲。
承受住極度痛楚嘅阿Ken面容扭曲，牙關緊咬，眼淚從眼框中不斷流出，撕心裂肺嘅呼叫聲響徹成間貨倉。
大蜘蛛高高在上俯視跌低咗嘅阿琛，幾個公仔頭左右交錯擺動，並且露出凶惡嘅表情，發出嘶嘶嘅叫聲。阿琛雖然好驚，但雙腳卻失去走動能力。
「呯！」一聲，大蜘蛛由木箱跳到地面，其中一個頭望住地上嘅阿Ken，居然露出猙獰嘅微笑，然後就一口咬住阿Ken被砸住嘅左手手掌，同時間兩隻膠腳輕而易舉地將木箱踢高。
大木箱最終被踢到去一呎遠，阿琛見到阿Ken嘅前臂已經發黑而且軟晒落嚟，估計大蜘蛛跳落嚟嘅時候將阿Ken手骨砸斷。但最恐怖嘅係，阿琛見到大蜘蛛背後生出一條肉條，肉條嘅末端露出一枝黑色嘅針。
形容為「刺」應該會更貼切。阿琛感覺到隻蜘蛛怪物想用尾刺刺向阿Ken，阿Ken危在旦夕。
咬住阿Ken手掌嘅公仔頭一揈，將阿Ken成個扯起。血從公仔頭口中流出，阿Ken被大蜘蛛咬得好緊，而傷口亦好深。
大蜘蛛只留意自己嘅勝利品，並無在意阿琛嘅存在。其實阿琛有時間可以自己逃走，但佢決定無論喺任何情況下，佢都唔會放棄阿Ken。佢望一望四周，然後執起地下嘅一隻膠手，撲上前去揮打大蜘蛛身上嘅公仔頭。
「死啦！」阿琛怒叫，就好似打棒球咁，佢不斷用力揮動手中嘅膠手臂，大大力打落去大蜘蛛身上，膠與腸撞擊，發出啪啪嘅響聲。阿琛出盡氣力打，甚至將其中一個公仔頭打甩，只剩五隻手指喺空中亂抓亂挖。
其餘幾個公仔頭見狀，都好似變得相當忿怒，「嘶嘶」嘅聲音更大更雜亂。阿琛睇準時機，一隻膠手向蜘蛛怪物掟過去，利用佢地分神一刻，一手抱住阿Ken條腰，死命地向後拉，想扯佢返嚟。
殊不知咬緊阿Ken手掌嘅公仔頭同樣死口不放，阿Ken仍然被公仔頭咬緊。更壞嘅情況亦隨之而來，另一個公仔頭加入戰圈，咬住阿Ken前臂斷骨部份，尖尖嘅牙齒拮入瘀黑色嘅皮膚，血濺得一地都係。
同時，大蜘蛛伸展出嚟嘅尾刺，亦都刺向阿Ken。
「啊啊啊啊啊啊啊啊！！！」阿Ken一聲恐怖嘅慘叫，然後便暈倒。
尾刺拮入阿Ken嘅手，幾乎同一時間，原本瘀黑色嘅前臂，瞬間變白，甚至變得毫無生氣。由原來柔軟溫熱嘅觸感，變得瓦色而又硬邦邦。
公仔頭終於放開口，阿Ken嘅前手臂已經塑化，同膠公仔手嘅質料無任何分別。手臂直墮地下，跌向一灘血泊之中。
※※※※※※※※※※※※※※※※※※※※※※※※※※※※※※※※※※※※
膽戰心驚。
對於點樣逃離6樓單位阿琛已經印象模糊，佢只記得阿Ken喺拉扯中突然跌向自己，令佢失去平衡，幾乎直接仆出門口。當佢再次企起身時發現自己滿身血跡，而阿Ken則瞓喺地下，毫無意識。
阿琛並無考慮太多，用最快嘅速度將阿Ken托上膊頭，用盡平生所有力氣直衝出F室門口，向前梯奔跑，腦海裡面一片空白，唔想記得剛剛發生嘅事。
沿住樓梯向下走，一直跑一直跑；經過四樓時，阿琛聞到好大陣K煙嘅氣味，佢知道其他怪物都感應到有人沿樓梯向下逃走；當經過一樓戴東尼酒店門口時，樓上嘅怪物們已經開始循住聲音正追擊佢哋。
隔住酒店門口嘅磨沙玻璃，阿琛望入去睇。佢見到裡面有光，亦彷彿有人影恍動。但生怕係其他怪物，所以只係經過，唔敢入去，而且樓上傳嚟吼聲，其他怪物幾乎係空群出沒，比起係一樓繼續磨落去，落樓似乎比較穩陣，亦都有更大嘅空間可以走動。
而且，阿琛終於都可以落到去地下嗰層，佢好想珍惜呢個機會。
原本連接大堂同街外出口嘅大門，被一條條闊嘅木板，由底至頂完全封住。
當阿琛踏入香檳大廈地下大堂範圍，見到眼前嘅情境時，全完呆咗。佢辛辛苦苦想逃離八層高嘅香檳大廈，經歷多次失敗，而家終於可以走到落地下大堂，卻發現原來係個死局。
「點解？點解會咁架？點解出唔到去架……」阿琛覺得失望無助，心入面縱然有千萬個「點解」，但似乎無人可以解答到佢。
背後嘅吼叫聲越嚟越大，阿琛已經覺得好攰，無力再走多一步，而且萬念俱灰：「反正都走唔出去，被咬咁又點……」
然而，膊頭上嘅重量提醒住阿琛：「阿Ken性命垂危！」鮮紅色嘅血不斷由阿Ken左手嘅傷口流到佢身上，溫熱又血腥，昏迷中嘅阿Ken唔知仲可以撐幾耐。
阿琛企係B座嘅大堂內，唔知可以點做，佢捉緊對手，牙關抖震著。
偌大嘅走廊中，忽視聽到有人發出微弱嘅叫聲：「殊…呢度呀……喂……」
叫聲夾雜喺吼聲當中，雖然唔係特別響亮，但阿琛勉強可以聽到，佢四圍張望，想搵出聲音嘅來源，確定自己唔係幻聽。
的確，有一個長頭髮嘅女仔，企咗係錢虹相機嘅招牌旁邊，半身隱沒係鋪入面，向阿琛招手。
(待續)