惡靈指數100%: 視線

「而家已經冇可能返轉頭......」諗起迷路女童仲喺向日葵花海拎住刀等佢嘅畫面，阿時頭痛咁嘆一口氣。

「小黑姐姐佢其實並唔得人驚。」遙遙安慰眼前皺緊眉頭嘅大哥哥。

「但佢剛才差啲就殺咗我哋兩個，咁都唔夠恐怖啊？」阿時只要一諗起個畫面，已經忍唔住腳軟。

「我都係第一次見到，姐姐會咁......」遙遙想反駁，幫迷路女童講說話。

「喂！你到底知道啲咩？有冇其他出去外邊嘅方法？」阿時對而家嘅情況好迷惘。





背囊喺逃跑嘅時候留底咗，手機又入水，完全冇反應。已經諗唔到方法聯絡外界幫手......

「有啊！」遙遙輕快咁回答，完全一啲身在困境嘅自覺都冇。

「點樣先可以出去？」阿時驚喜咁問遙遙。

「由小黑姐姐帶我哋出去！」遙遙擺出天真嘅笑容，等待阿時嘅稱讚。

「你......其實係好想死啊......」阿時已經開始後悔帶埋遙遙走，感覺就好似放個敵人喺身邊噉，根本唔會幫自己。





遙遙係認真咁答阿時，見佢唔信自己，都有啲失落。

兩個人一直著住濕淋淋嘅衫，都忍唔住不停打冷震。

「哥哥，要唔要去換件衫？」遙遙喺呢個空間生活咗幾個月，已經算係半個地頭蛇。所以帶住阿時走近公園隔離嘅商場，搵乾爽嘅衫換。

公園隔離有兩棟商場，搵唔到出路嘅阿時其實原本都想入去搵吓線索。但又怕入到去之後出唔返嚟，所以一直猶豫。見遙遙熟路咁行過去，自己唯有默默跟喺佢身後。

玻璃門並冇鎖起，但門對遙遙嚟講有啲重，阿時喺旁邊幫手推開。裡面好暗，一啲燈光都冇，而且太安靜。阿時忍唔住行近遙遙，兩個人總比一個人安心。





「喂......你得閒就同我講吓嘢......」阿時接受唔到幽靜恐怖嘅空氣，想聽吓人聲，令自己冇咁驚。

「好啊。」遙遙乖巧咁點頭應承。

呢度嘅店舖都冇拉閘或者鎖住，佢哋可以喺度隨便拎衫換。

「真係可以？」因為知道呢度係異空間，所以阿時更加唔敢亂搞呢度嘅任何物品。

阿時見到賣衫嘅店舖門外貼住一張「店舖盜竊，最高可被判終身監禁。」嘅宣傳牌，佢有啲疑惑，乜盜竊都要判終身監禁咁嚴重㗎咩？

宣傳牌上嘅雙眼好似緊緊咁瞪住佢，視線令人心寒，總有一種不安感喺心裡面揮之不去。

「小黑姐姐話呢個空間嘅嘢我都可以隨便用。」遙遙自動自覺咁換返一身簡單舒服嘅衫，睇落終於似返個普通小朋友。

「咁好啦......」雖然阿時唔太想掂呢度啲嘢，但佢哋應該仲要困喺呢個空間好耐，唔可能一直著住濕嘅衫。於是佢決定都係先換返一身乾爽嘅衫，再去搵線索離開。





當佢哋離開賣衫店嘅時候，眼角見到店舖外宣傳牌上嘅眼好似眨咗眼。

阿時以為係自己眼花，再回頭望過去，同嗰對眼對視。

宣傳牌上嘅字開始自己重組改變，組合出新嘅句子，寫住：「睇到囉~」

而下面嘅內容都變到好似通輯令一樣，有阿時同遙遙兩個人嘅大頭，同埋圈住佢哋拎衫嘅情況，無數隻字寫住小偷。

「嗶嗶嗶嗶嗶......」

商場嘅防盜警鐘忽然響起，發出刺耳嘅嗚聲。四圍都閃爍住紅色嘅警報燈，一閃一閃。視覺同聽覺嘅衝擊令人覺得好唔舒服，都好慌亂。

宣傳牌上嘅嗰雙眼微微瞇起，形成兩條彎線，感覺好似喺度奸笑一樣。





阿時腦海一片空白，一時間講唔出半句說話，都無法冷靜去思考。突然感覺到自己隻手被捉住，佢嚇咗一跳。都仲未嚟得切反應，遙遙已經將佢拉到自己身後。

「唔好咁啊！」遙遙同嗰雙眼對峙，想用嬌小嘅身體去保護阿時。用小朋友嘅聲線鬧對方，根本完全感覺唔到絲毫氣勢。

阿時回過神，就見遙遙企喺自己身前，努力用細小嘅身軀擺出保護者嘅姿態。而嗰隻眼見到之後，奸笑得更加明顯，就好似喺度取笑遙遙嘅不自量力。

遙遙嬲到成塊臉鼓起，好似蘋果一樣。突然伸出兩隻手指，快速而準確咁插入嗰雙眼嘅眼球。

「遙遙！」阿時嚇到倒吸一口氣，即刻抱起遙遙，驚恐咁退後幾步。

嗰雙眼痛苦咁合實，努力製造出眼水，去舒緩不適嘅痛感。再一次擘大嘅時候，眼白位置已經佈滿血絲，憤怒咁死死睥住遙遙。

「哼！」遙遙唔服輸咁睥返去。

宣傳牌上嘅字再次重組出新句子，大大隻咁寫住：「醜惡嘅小偷，要永遠留喺度，償還你哋嘅罪孽！」





阿時即刻抱住遙遙轉身逃跑，想走出呢個商場。但商場嘅玻璃門唔知幾時被反鎖住，每一道門都打唔開。佢心急咁想用身體撞開，但玻璃門依然堅固無比。

當遙遙見到慌亂逃跑嘅阿時，佢意識到自己剛才好似唔小心闖咗禍。於是失落咁低下頭，向阿時道歉：「對唔住啊，哥哥。不如我返去同眼睛先生道歉？請佢原諒我哋啊......」

「哈哈哈......遙遙你並冇做錯，多謝你剛才保護我。」其實諗返起，剛才嘅場景係有少少搞笑。阿時都覺得好感動，但更多嘅係慚愧。

明明自己年紀比較大，居然唔及一個五歲細路女大膽，反而要對方去保護自己。

「你等我一陣。」阿時先將遙遙帶到安全嘅角落安置好，溫柔咁摸一摸佢個頭，然後轉身跑去其他店舖搵可以打爆玻璃門嘅嘢。

阿時搵到一把長掃把之後，就返去用掃把瘋狂咁敲打玻璃門。

「哥哥！」遙遙突然行到佢身後，輕輕咁拉一拉佢衫角，阻止佢。





「乖啦遙遙，呢邊好危險，你企遠啲等我。」阿時以為自己嘅動作嚇親遙遙，所以無奈咁推開佢。

「小黑姐姐喺嗰邊......」遙遙用手指指住玻璃門外面。

阿時順住佢手指嘅方向望，果然見到一個紅色嘅身影，企喺行人隧道嘅出口。

迷路女童見阿時望到佢，都微笑咁向佢揮一揮手，然後用嘴形對佢講：「搵到琛時啦......」

「遙！」阿時見到之後即刻緊張噉轉身，抱起遙遙順住電梯逃跑到樓下。

呢個商場嘅樓下，就算係街坊都好少有機會落去。場地好大，擺賣咗各色各樣嘅嘢。阿時見到唯一嘅一條小路，即刻跑入去。佢而家能夠做到嘅，只有見到路就行。

當阿時想順住條路跑出去嘅時候，遙遙細聲噉講一句：「呢邊係跑返去......」

「噉我應該行邊面？」阿時緊急煞停腳步，現場只係得呢一條轉彎嘅路，的確有機會會直接兜返出去。

「呢邊......」遙遙嘅手指指向旁邊一道感覺豪華嘅門。

阿時當知道遙遙對迷路女童有深厚嘅感情之後，其實一路都好猶豫，應唔應該信任遙遙。但佢自己對呢個商場又唔太熟悉，冇信心可以避過迷路女童。

阿時沉思幾秒，決定暫時相信遙遙，將佢放喺地面，畀佢帶路。

佢幫遙遙推開豪華而又沉重嘅大門，發現裡面係酒樓嘅樓面，而且有一個小型嘅舞台。遙遙拖住佢，匿埋喺舞台下面，用布做掩飾。

匿咗一陣，外邊就傳嚟迷路女童嘅聲：「遙遙......琛時......我知你哋喺度，一齊出嚟玩啊。」

阿時醒起剛才入嚟匿埋嘅時候，唔記得閂返外邊嘅大門，所以迷路女童先發現。佢暗地裡反省自己嘅失察，衫都已經被自己嘅冷汗浸濕。

「遙遙......琛時......」

聽到迷路女童嘅聲越嚟越接近，遙遙同阿時都唔敢出聲。

「唔喺度......明明見佢哋走咗落嚟，到底去咗邊？」迷路女童轉咗幾個圈，都冇發現，失落噉去其他位置搵。

見迷路女童放棄咗搵呢個地方，阿時總算鬆咗一口氣。
佢開頭仲以為遙遙係偏向迷路女童，所以都好奇點解遙遙會幫佢。

到底呢個都市傳說嘅真相係點？要點先可以離開呢個異空間呢？而遙遙喺現實世界，又經歷咗啲乜？

阿時決定再一次問遙遙：「你一定知道，要點先可以離開呢個地方？」

「要小黑姐姐帶我哋出去啊。」遙遙點點頭，誠實噉講出一個冇用嘅方法，令阿時覺得好頭痛。

「你唔係好鍾意你個小黑姐姐？噉點解你要幫我？」阿時有啲發悔氣噉問。佢知道自己對住一個細路女嘅說話，唔應該太認真，但始終控制唔住情緒。

「我鍾意小黑姐姐。鍾意同佢一齊玩，一齊惡作劇，但我唔鍾意佢傷害人。」遙遙一提起，心情就有啲低落。

「惡作劇？到底係咩惡作劇？小黑姐姐係幾時開始傷害人？」阿時終於捉到遙遙說話嘅重點，即刻追問落去，希望喺佢嘅說話裡面，搵到些小線索。

遙遙低下頭唔敢答，好似做錯事嘅小朋友，畀大人發現咗一樣。佢嘅沉默，令阿時內心越嚟越急躁。