惡靈指數100%: 電話
「遙遙乖......同哥哥講吓你點樣遇到小黑姐姐？呢段時間你哋一齊玩咗咩？無論你做咗啲乜，哥哥都唔會鬧你。」阿時迫自己冷靜落嚟，溫柔噉氹遙遙講出真相。
「真嘅？」遙遙表情忐忑不安。
「係！我應承你。」阿時伸出手，同遙遙勾一勾手指尾。
遙遙勾完手指，先敢放心答佢：「我同小黑姐姐，都係被媽媽遺棄。小黑姐姐用魔法救返我，佢會陪我玩。我哋一到夜晚就會一齊出去惡作劇，整蠱啲大人。啲大人越怕我哋，小黑姐姐嘅魔法就越嚟越叻，整蠱都開始越嚟越過份......」
「哦......魔法？意思啫係，人類嘅恐懼，就係迷路女童力量嘅源頭喇。」阿時點頭附和，自動喺腦海將遙遙嘅小朋友用語全部過濾轉化。
暫時手頭上嘅線索並唔多，如果遙遙冇隱瞞嘅話，恐怕逃離呢個異空間嘅方法，一定要經迷路女童嘅協助。
而喺都市傳說裡面，可以離開呢個鬼地方嘅另一個方法，就係搵出迷路女童嘅真正身份。內心衡量一陣，阿時都係比較偏向後者嘅方法。時間冇多，希望易玄光喺現實世界都會諗辦法救佢哋喇.......
「我哋去搵吓有冇電話，可以聯絡外面嘅世界。」阿時嘅電話入咗水之後，已經完全冇反應。
眼見已經過咗一段長時間，迷路女童都冇返轉頭，暫時應該安全。阿時拖住遙遙，小心翼翼噉行返出去。佢哋兩個一間一間店舖噉搵電話打，嘗試接通外面。
「 呼......」
「都係唔得......」全部接通之後，都只有空洞嘅風聲，令阿時有啲氣餒。佢轉過身，發現遙遙聽住電話，神情迷惘。
「你係邊個啊？......千遙？你係千遙？」電話傳嚟女人嘅聲音。
「媽......媽......」明明係一個親近嘅稱呼，但遙遙反而覺得無比嘅陌生。
阿時見終於成功接通到外面嘅世界，驚喜噉搶過遙遙手上嘅電話聽：「喂！」
「 嘟......嘟......嘟......」
對方一聽到自己把聲，就瞬間cut咗線。阿時迷惘噉問遙遙：「頭先......你同邊個講電話？」
「係媽媽，千遙嘅媽媽。」遙遙紅住眼，努力噉忍耐，但感覺下一秒就會喊出嚟。其實遙遙都想打畀其他人，但自已唯一能夠背到嘅，就只有媽媽嘅電話。
「係啊？你已經失蹤咗幾個月，應該都好掛住媽媽？」阿時擔心噉問，心裡面都好同情遙遙。
「唔係噉！佢只係路千遙嘅媽媽，但路千遙已經死咗。遙遙而家有姐姐，已經唔需要媽媽。」遙遙努力噉反駁。
「......」阿時一時間唔知點去安慰佢，只能夠踎低，溫柔噉摸摸佢嘅頭。
遙遙撲埋去抱緊阿時，用含糊嘅哭腔哀求：「我......唔想返去......」
阿時嘅心就好似壓咗一舊巨大嘅大石噉，好沉重。佢開始迷惘同懷疑，可能只有逃離地獄一樣嘅真實嘅世界，對遙遙嚟講先係最大嘅幸福。
佢拍一拍自己嘅臉頰，迫自己堅定落嚟。
「遙遙，雖然你仲細，但我知道你自己一定都明白......你唔屬於呢個地方。」阿時決定就算迷惘都好，都唔可以畀遙遙睇穿。無論如何，一定要兩個人一齊安全離開。
佢認真噉向遙遙承諾：「我會保護你！無論係喺呢度，定係出返現實世界。」
遙遙低吓頭，並冇回應。
「頭先係用呢個電話打畀你媽媽？可唔可以再打多次？」阿時雖然擔心遙遙嘅情況，但逃離呢個鬼地方，先係目前最重要嘅事。
「可以......」遙遙再次打媽媽嘅號碼，然後遞畀阿時接聽。
「呼......」
「唉......唔得，都係得風聲。果然頭先只係好彩，先成功接通到。」阿時失望噉cut線。
而喺現實世界，已經係凌晨。但易玄光、孫師傅、路小姐、仲有遙遙媽媽，四個大人都聚喺易玄光嘅事務所，諗方法救返阿時同遙遙兩個細路。
事務所嘅電話突然不停噉響，接咗之後，同樣只有空洞嘅風聲。呢個情況實在太詭異，不過為咗救人，佢哋唔可以放過任何線索。
完全冇進展，令所有人都開始急躁。直到遙遙媽媽嘅電話鈴聲響起，先打破僵局。同事務所古板傳統嘅鈴聲好大出入，遙遙媽媽嘅鈴聲係新潮嘅流行曲。
「你係邊個啊？......千遙？你係千遙？」雖然係問句，但遙遙媽媽嘅語氣好肯定。
「媽......媽......」一把細路女聲，用小心翼翼嘅聲音回應佢。
遙遙媽媽認出係自己個女把聲，下一秒就即刻傳嚟一把男仔聲：「喂！」
遙遙媽媽下意識cut咗線，回過神之後，就發現在場嘅人都望住自己。
「係邊個打畀你？」易玄光緊張噉問。
「只係......推銷電話......」遙遙媽媽自然噉講起大話。
「你當我白痴啊？而家係凌晨，點會有推銷電話？頭先把聲分明係阿時嚟！」易玄光忍唔住心裡面嘅怒火，想衝埋去直接揭穿遙遙媽媽嘅大話，但被孫師傅同路小姐阻止。
「你聽住啊！你自己當屋企嘅細路係草，但唔代表其他人都係！」易玄光有調查過遙遙嘅資料，自然知道佢長期畀人虐待。如果遙遙媽媽唔係女人，易玄光恐怕已經打咗佢一身。
「而家即刻！打返頭先嘅電話！」易玄光伸出手，半威脅噉迫遙遙媽媽拎出電話。佢平時其實好少發嬲，但一發嬲，就好難控制到自己。
遙遙媽媽唯有將自己嘅手機交出嚟，查返剛才嘅電話號碼，再次打返去。
「鈴鈴鈴鈴......」
隔咗一陣，阿時手上嘅電話突然響起鈴聲，佢驚喜噉接聽。
「喂？喂？」阿時喂咗幾聲，對方都冇回應。
隔咗十幾秒之後，先有一把細路女嘅聲傳出嚟：「係我......」
阿時心裡一涼，臉色瞬間嚇到蒼白，完全反應唔嚟。
「就算點匿都好，我都會搵到你。捉迷藏嘅遊戲，最後都只會係我贏。嘻嘻嘻......」
笑聲不斷喺阿時嘅腦海迴響，令佢身體忍唔住抖震。
「哥哥！哥哥啊！」遙遙好驚，無論點叫阿時，佢都神情呆滯，完全冇反應。用力推佢幾吓，先令佢回過神。
「遙遙？咩事啊？」阿時迷惘噉問。
「哥哥，你有冇事？」遙遙好擔心噉抬頭望住佢。
「哥哥冇事，要你擔心真係對唔住。」阿時一邊安撫遙遙，一邊警惕噉四處張望，但都見唔好迷路女童嘅身影。
「我哋要走喇，呢度唔安全。」阿時拖住遙遙，急步再行上一層。
好香......
再上一層，就聞到隔離戲院傳嚟一陣陣濃烈嘅爆谷甜香。行到又攰又餓嘅兩個人，肚已經開始打鼓。
「哥哥......」遙遙都終於到咗極限，踎哋地下。又肚餓又攰又眼瞓......
「遙......好肚餓？仲行唔行到？再堅持多陣喇。」阿時雖然心急，但並冇怪遙遙。其實佢都好清楚，自己已經就快到極限，更何況為遙遙呢......
遙遙堅強噉企返起身，盡力跟上阿時嘅腳步。
「好喇好喇，我哋休息吓，搵啲嘢食。」阿時知道再噉行落去都唔係辦法，要保存體力先可以逃跑。
順住香味，佢哋行到戲院門口。爆谷機橙紅色嘅燈光，喺幽暗嘅環境下格外明亮。
「想食？」阿時吞一吞口水，猶豫噉問遙遙。
「嗯！」遙遙用力點點頭。
阿時行過去，好似試毒一樣食咗一粒。爆谷好似剛做好，好熱，食落香甜美味，並冇問題。佢拎起大紙桶載起爆谷，然後將褲袋嘅一啲銀仔放喺收銀位置。
經歷過頭先被當成小偷事件之後，阿時明白到呢度雖然係異空間，但有啲現實嘅規矩依然唔能夠違反。
隔離影廳嘅門縫透出一閃一閃嘅光線同隱約嘅聲音，吸引到阿時佢哋嘅注意力。阿時扮睇唔到，拖住遙遙，準備快步離開。
「喵~」
聽到熟悉嘅貓叫聲喺門嘅後面傳出，佢即刻停住腳步。
貓......
如果阿時嘅猜測冇錯嘅話，之前佢見到嗰隻黑貓，好似係進入同離開呢個鬼地方嘅關鍵。阿時強忍住心中嘅恐懼，將影廳嘅門拉開，小心翼翼噉行入去。
裡面暗到完全睇唔到四圍環境，更加唔洗提搵黑貓。大螢幕正喺度播電影嘅預告片，之後就係「電影院禮儀」嘅宣傳片......
「砰！」
突然，佢哋嘅身後傳嚟一聲巨響，兩個人都嚇咗一跳。身後原本打開嘅門點推都推唔開，佢哋被鎖喺影廳，出唔返去。
「可惡！」阿時不停拍打同撞門，但門依靠一啲鬆動都冇。
「電影要開始喇......」遙遙輕聲喺旁邊提醒阿時。
阿時都唔敢再太大聲，佢拉住遙遙，無奈噉搵個位置入坐。
既然走唔到，唯有坐低休息一吓，補充體力。可能等電影播完，佢哋就可以離開。