惡靈指數100%: 逃亡

「一開始係小黑做鬼。」

「叔叔......救......救命......」

易玄光聽到阿時微弱而家抖震嘅求救，即刻緊張咁問：「阿時！你嗰邊發生咩事？」

回應佢嘅，係阿時沉重嘅呼吸聲同一陣慌亂嘅腳步聲。

「嗄......嗄......嗄......」





無論點跑，都冇法逃離。四圍都係無盡嘅向日葵，而迷路女童始終喺同一個位置，手唔知幾時拎住一把刀，笑住等佢。

明白到一直盲目咁逃跑係冇用，所以佢跑到湖邊踎低，用向日葵花擋遮擋住自己嘅身影，冷靜諗對策。

「阿時！阿時！」電話依然傳嚟易玄光擔心嘅聲音。

「殊......我冇事.......」阿時將電話放喺耳邊，盡量壓抑音量。

「冇事就太好啦，你唔好收而線住，我而家去搵孫師傅。」易玄光聽到阿時嘅聲，總算鬆一口氣。





「已經冇時間啦......」阿時匿喺遠處偷瞄迷路女童嘅身影，迷路女童發現佢好耐冇跑返去，已經開始四圍搵佢。

阿時打開自己嘅背囊搵吓有冇咩用得上嘅嘢，粗鹽、白米、十字架......

阿時拎住包鹽沉思，無助咁望住平靜嘅湖面，突然靈光一閃。

「搵到琛時啦......」迷路女童發現咗阿時嘅身影。

阿時一直望向湖面，唔敢回頭。





喺湖水嘅倒影，睇住迷路女童一步一步慢慢接近自己。迷路女童輕輕咁拍一拍佢嘅膊頭，佢先慢慢回頭。

只見迷路女童舉起手上嘅刀，對準阿時嘅心臟：「係琛時輸咗，輪到你做鬼啦。」

「噗！」

「啊！」

阿時將含喺口裡面嘅鹽水噴向迷路女童嘅臉，迷路女童尖叫咁避開。

阿時趁機拎埋背囊，跳入湖裡面，向住月亮嘅倒影游過去。佢終於搵到倒轉嘅月亮，雖然唔知係唔係正確答案，但只能夠賭一次。

果然，湖底有一間小屋，只要推開門，應該就可以離開......

迷路女童嘅表情因內心嘅矛盾而扭曲，但只係默默咁望住阿時身影，並冇追上去阻止佢離開。





「小黑姐姐，你哋喺度做咩？」路千遙喺遠處跑向迷路女童。

「路千遙？」原本想直接走嘅阿時停止咗前進，猶豫帶唔帶埋依然係人類嘅路千遙走。

「遙遙啊......你會唔會永遠留喺度陪我？就算你媽媽要接返你......」迷路女童嘅表情好孤單同迷惘。

「媽媽？」遙遙年紀仲細，同其他小朋友一樣憧憬自己嘅父母。就算佢長期被虐待，依然都愛住媽媽。所以之前易玄光話帶佢返去，佢的確都有心郁過。

但一諗到自己走咗之後，迷路女童就會得返自己一個，遙遙就覺得唔忍心。諗咗一陣，對迷路女童講：「我要永遠同姐姐一齊。」

「冇可能，你遲早都會大個女。除非......你變到同我一樣，成為第二個迷路女童，同新嘅都市傳說一樣。」迷路女童臉上露出殘忍嘅笑容，舉起刀對準遙遙。

迷路女童而家轉化為惡靈嘅指數係100%......





遙遙望向迷路女童嘅眼神並冇恐懼，而係無比嘅信任。佢完全冇諗住逃走，默默咁睇住刀對住自己嘅頭，快速咁落刀......

「可惡！你呢隻鬼唔好睇小我啊！」阿時趕唔切游返上岸救人，唯有博一博。喺背囊拎出十字矩架對準迷路女童隻手，好似掉飛標咁飛過去。

阿時喺學校假假地都係文武雙全嘅學生，一直被望落只有十歲嘅迷路女童壓制，令佢有啲唔甘心。

就算驚又如何，既然發現遙遙仲係人類，阿時就冇辦法掉底佢一個人。遙遙仲咁細個，容易被真正嘅迷路女童呃。阿時身為半個大人，覺得自己有負任去保護佢，安全咁帶佢返去。

十字架正正打中迷路女童嘅手腕，佢嘅刀甩手跌落地。

「路千遙，你快啲過嚟！我哋一齊走！」阿時催促嚇傻咗嘅遙遙。

「我唔可以掉底姐姐一個......」遙遙皺起眉，退後幾步，唔肯跟佢走。

「快啲！過嚟哥哥呢度！」阿時心急如焚，對住遙遙嘅語氣都唔知用氹好，定係用鬧。





迷路女童憤怒咁望住已經游到湖邊嘅阿時：「點解？你哋所有人，都咁多管閒事......」

「姐姐，你痛唔痛？」遙遙擔心咁捉起迷路女童被打中隻手檢查，但被佢一掌推開，跌坐喺地下。手掌擦損，傳嚟陣陣痛感。

「姐姐？」遙遙覺得不可置信，溫柔嘅姐姐最近變得越嚟越陌生。

迷路女童只係瞄咗受傷嘅遙遙一眼，就一步一步咁行到阿時面前踎低。

「你想點啊！」阿時壓抑住心裡面嘅恐懼，瞪大眼睥住佢，同佢對峙。

「遙遙佢注定要成為另一個迷路女童，你阻礙我哋嘅話，就去死啦......」迷路女童伸出手，將阿時嘅頭用力壓落水。

「嗚嗚......嗄......放......放手......嗚......」阿時喺水裡面不停掙扎反抗，但佢身處嘅位置令佢有啲用唔上力氣，處於劣勢。





「你唔係小黑姐姐......小黑姐姐好溫柔，想同其他人做朋友，一齊玩......」面對住越嚟越陌生殘忍嘅迷路女童，遙遙開始覺得好驚。佢搖搖頭，難以接受眼前見到嘅事。

「嗚嗚......嗚......」接近死亡邊緣嘅阿時已經冇其他選擇，佢無助咁向住遙遙伸手求救。

「夠啦！小黑姐姐唔好咁啊！」見到阿時嘅掙扎越嚟越無力，遙遙終於都衝上前，抱住迷路女童嘅手臂，想拉開。

但遙遙始終只有五歲，力量實在太細。眼見自己太細力冇效果，就轉為不停拍打。阻止迷路女童嘅動作，幫阿時爭取呼吸嘅空間。

迷路女童有啲唔耐煩，再次推開遙遙。

「啊！」今次遙遙直接跌落湖裡面，水花飛濺喺空中，喺月光照射下閃閃發光，令迷路女童有一秒失神。

阿時趁住佢失神嘅瞬間，成功掙脫。伸長手臂撈過遙遙，將佢抱實喺懷裡面，快速踢水游向湖底嘅小屋。

迷路女童陰森咁望住佢哋嘅身影消失喺湖面，沉思咗一陣，轉身拎返起地上面嘅刀。

將阿時遺漏喺湖邊嘅背囊幻想成阿時，發洩咁用刀尖瘋狂插到破爛。

「哈哈哈哈......」睇住破爛嘅背囊，迷路女童嘅表情開始扭曲，嘴都傳出令人心寒嘅笑聲。

阿時用身體撞開湖底小屋嘅門，而門嘅另一邊，一穿過已經係水面。

「嘩啦！」

「咳咳......嗄......嗄......」

阿時用手抹一抹走臉上嘅水，擘大眼環視四圍。

佢同遙遙身處喺一個噴水池，水打喺身上好痛。呢度正正就係天水圍公園，佢一開始搵迷路女童嘅地方。四圍好陰森，一啲人嘅氣息都冇。

阿時見成功出返去現實世界，都鬆咗一口氣。佢將昏迷嘅遙遙抱返上地面，然後輕輕拍佢嘅臉頰：「喂！醒啦！」

「咳咳咳......」遙遙清醒過嚟，將喉嚨裡嘅水咳返出嚟。

「你點解唔跟我走啊？你知唔知隻鬼頭先差啲就殺咗你，將你變埋迷路女童啊！」阿時剛才嚇到個心差啲停，所以忍唔住大聲鬧眼前嘅細路女。

遙遙反叛咁擰轉面，低頭沉默，心裡面已經當咗阿時係敵人。

見遙遙完全唔俾面自己，阿時都有啲尷尬，努力諗方法氹佢：「遙遙你唔掛住你嘅家人同朋友仔咩？你嘅媽媽見你失咗蹤，好想擔心你，好想你返去。」

遙遙聽到之後呆咗一吓，終於肯開聲應阿時：「係呃人......」

「吓？」阿時聽到佢嘅說話有啲反應唔嚟。

「媽媽佢只係呃人，佢唔會希望我返去。」遙遙臉色冷淡咁講出事實。

「有咩可能啊？你媽媽咁緊張你......」阿時回憶喺新聞所見到，路千遙媽媽因擔心失蹤嘅女，而瘋狂嘅表現。但當佢拉住遙遙隻手，發現佢手臂上隱約嘅疤痕，佢瞬間沉默。

「係咪......好痛？」仔細觀察咗一陣，阿時不可置信咁問佢。

疤痕並唔似近期做成，呢個恐怕就係遙遙寧願跟住迷路女童，都唔選擇自己媽媽嘅原因。

阿時怕遙遙會冷親，將自己嘅風褸除落嚟俾佢，溫柔咁幫佢著住。

遙遙感覺到阿時其實冇惡意，都開始接受佢，對佢露出小朋友特有嘅天真笑容：「已經唔痛。」

「媽媽嘅女......路千遙已經死咗。而家嘅遙遙，只係有一個家人，就係小黑姐姐。」遙遙嘅表現冇傷感，好似純粹分享一件平凡嘅事。

佢嘅反應令阿時開始思考，自己想帶佢返去嘅決定，到底係咪真正可以拯救眼前呢個細路女。

始終都唔希望見到佢變成另一個迷路女童，阿時唯有堅持氹佢：「你唔想好似普通小朋友咩？去返學，識好多好多朋友。」

正當遙遙猶豫不決，阿時拉起佢嘅手，幫佢做決定：「行啦，我哋一齊走，一齊離開呢個地方。」

遙遙順從咁俾阿時拉住行，明明行嘅只係直路，但就好似原地踏步一樣，一直行唔出公園。

「點解會咁......明明已經跟住你俾嘅地圖......」阿時苦惱咁踎喺地下，抱住頭自言自語。

遙遙行到阿時面前，輕輕用手指幫佢梳理好凌亂嘅頭髮，低聲回憶自己畫過嘅地圖：「屋仔、月亮、向日葵、大樹、貓......係出去外邊嘅記號！」

「所以......我由一開始就調轉咗睇？」阿時靈光一閃，心裡因自己嘅猜測而發涼。