惡靈指數100%: 遊戲
睇過相嘅阿時一眼就認出對方，但而家仲未知佢係人定係鬼。
路千遙依舊著住紅色嘅公主裙，臉色蒼白，嘴唇搽咗鮮紅嘅唇膏。帶少少成熟又性感嘅化妝，完全唔符合佢小朋友嘅形象，違和感十足。
「你識我？」遙遙估唔到阿時可以叫出佢個名，見阿時退後，佢都行返前幾步。
「唔好過嚟啊！」阿時喝止佢嘅腳步。
路千遙深邃嘅雙眼，會令同佢對視嘅人不自覺失神。但阿時根本冇心情去欣賞，而家腦海只係俾恐懼佔據。
阿時將背囊轉向前抱實， 戒備咁擋住自己大部分嘅身軀，然後隨手喺裡面抽出去一樣有用嘅嘢。
佢抽到嘅係一細包嘅食鹽，拆開包裝，擺出一個陰森恐怖嘅表情威脅路千遙：「唔好再行埋嚟！就算你係細路，我都唔會客氣......」
呢個場面，總覺得好似曾相識......
「哥哥你都係除靈大師？係靈媒哥哥叫你嚟？」路千遙原本無神嘅雙眼，快速咁閃過一絲光彩，再次行近阿時。
阿時即刻向佢灑鹽，但用完全包鹽，路千遙都係一啲反應都冇。
點解......
「哥哥......」
聽到路千遙叫佢，當機嘅阿時即刻回過神。知道自己除靈失敗，佢下意識轉身逃跑。
路千遙只能夠目送佢嘅背影，然後深深咁嘆氣。雖然有少少失落，但更多嘅......係鬆咗一口氣。
「嗄......嗄......嗄......」
阿時唔知自己跑咗幾耐，但佢發現自己跑嚟跑去都好似只係喺同一個地方。
「可惡......呢度係邊度？」阿時心情開始有啲急躁，後悔自己咁衝動，自己一個嚟查迷路女童嘅事。
佢想打開goole maps查地圖，但自己嘅箭咀居然不停喺地圖唔同位置上跳躍。
完全搵唔到返去嘅路，都唔知道自己嘅位置，無論點行，都會返到同一個地方......
阿時已經開始氣餒，抬頭對住星空大叫：「路千遙妹妹，頭先對唔住啊！我冇惡意，我係嚟幫你返屋企㗎！」
佢希望路千遙可以聽到，放佢一馬......
「喵......」
有一聲若有若無嘅叫聲回應佢，雖然聲量好細，但足夠令精神緊張咗咁耐嘅阿時嚇到心跳停咗一拍。
「咩啊......」四圍都好暗，阿時緊握住拳頭，慢慢咗行近燈柱。希望借住微弱嘅光線，得到一絲安全感。
燈柱嘅外形好老舊，而且電線外露。燈泡只係靠幾條電線吊住，風吹過，就會好似風鈴咁微微搖晃。光一閃一閃咁，好似隨時會燒。
阿時將全部嘅精神都集中喺環視四圍嘅環境，佢發現有一對閃爍嘅大眼一直喺草叢定定咗望住佢。視線令佢內心一涼。
感覺唔似係屬於人類嘅雙眼......阿時壯去膽，行過去睇係咩嚟。
「啪啦！」
剛走出幾步，電線終於承受唔住燈泡嘅重量，直線跌落地，喺阿時嘅腳邊碎開。
現場而家只能夠依靠月光去睇四圍嘅環境，阿時被突發情況嚇呆咗幾秒。當佢回過神，發生緊握嘅拳頭唔知幾時緊實咗一張紙。
紙仔上隱約見到用血寫住：遊戲開始
遊戲？係咩遊戲啊？
阿時僵硬咁回頭望燈泡破碎嘅位置，正正就係喺剛才自己企嘅地方。如果行遲半秒，應該會正中自己頭頂。
呢個遊戲......會死人......
阿時只覺得身體好似瞬間淋完凍水一樣，全身發寒。感覺自己而家嘅情況雖然同網上流傳有些小出入，但都有相似之處。
如果係同迷路女童玩遊戲嘅話，大概係指玩尋寶解迷嘅遊戲，搵出迷路女童嘅真實身份。
但迷路女童嘅真身唔係路千遙咩？自己明明已經知道答案，但點解仲會被困喺同一個地方？
阿時內心充滿疑惑，拎出行山電筒，順手搵搵衫褲袋同四圍環境，睇吓有冇咩題示。
佢喺衫袋摸出路千遙之前留底嘅尋寶圖，打開佢，睇咗好耐都係睇唔明佢嘅圖畫想表達咩。
屋仔、倒轉嘅月亮、向日葵、大樹、貓......
係要佢順序去搵，先搵到出路？月亮喺天空上面係有嘅......但環視四圍都搵唔到屋仔。
「喵......」一聲微弱嘅叫聲打斷咗阿時嘅思緒。
一隻黑貓喺草叢突然跳出嚟，優雅咁走到阿時面前，定定咁望住佢。佢嘅頸綁住紅色嘅蝴蝶結，紅到發亮嘅貓眼，好似睇到獵物一樣。
「原來只係隻貓......」阿時怕怕心口定驚，佢覺得自己嘅心臟承真係受唔住過多嘅驚嚇。
終於見到有自己以外嘅其他生物，阿時總算鬆咗一口氣。佢露出溫柔友善嘅笑容，伸出手想摸黑貓。但被黑貓一個閃身避開，然後轉身跑走。
呃......等等......係貓？
阿時突然靈光一是，諗起路千遙嘅尋寶圖度都有畫貓.......
冇時間諗太多，佢追上黑貓嘅腳步。終於唔洗再喺同一個位置徘徊，佢跟住黑貓嚟到大樹前。
大樹底下有一個細細嘅空心樹窿，好似隧道一樣。黑貓跑入去，但並冇喺另一邊出返嚟，反而好似憑空消失一樣。
「呃？」阿時覺得驚奇，目前所有非科學嘅情況，都令佢難以理解。
樹窿嘅大細應該勉強夠阿時捐過去，佢吞一吞口水，深呼吸，做足心理準備。然後先將大背囊推入去，自己再縮起身，慢慢爬過去。
佢辛苦咁爬出樹窿之後，一抬起頭，就被眼前嘅景色所驚豔。
面前有一大片向日葵花海，全部都朝向大樹嘅位置。螢火蟲喺花海間飛舞，令場面有一夢幻嘅感覺，簡直係去咗另一個世界。
貓、大樹、向日葵......
尋寶圖所畫嘅圖案都一一喺阿時面前倒序出現，不安嘅感覺令阿時想退縮回頭。但低下頭，佢發現剛才嘅樹窿已經消失得無影無蹤。
已經搵唔到退路，只能夠一直向前行。
跟住要搵嘅係倒轉嘅月亮......
阿時搵咗好耐，完全冇頭緒。到最後，阿時嘅體力已經就嚟支撐唔住，又肚餓又眼瞓。
佢大字形咗瞓喺花海中央，聽住隔離河流嘅嘅水聲， 呆呆咁望住滿天星星嘅星空發吽哣。
電話同外界通訊唔到，而阿時都喺度浪費咗唔少時間。屋企人應該都已經發現自己唔見咗......
正當阿時沉醉喺自己嘅思緒中，突然有一把女仔聲問阿時：「你係嚟做咩？」
「係啊......我係嚟做咩？」阿時下意識回答。
諗諗吓覺得唔太對路，阿時即刻坐返起身，四圍張望，搵剛才講嘢嘅人。
「你係咪搵我？」
聲音喺大樹嘅方向傳嚟，樹後企咗一個十歲左右嘅女仔，著住紅色嘅連身裙。佢小心翼翼咁伸出頭，偷偷觀察阿時。
「你好，我叫易琛時。你叫咩名啊？都係喺度盪失路？」阿時估唔到喺咁嘅環境仲可以遇到人，所以對待女仔嘅態度都忍唔住親近。
「呃......嗯......」女仔表情有啲驚同不安，唔敢講出自己個名。
「係啊？你一定好驚啦......我哋一齊去搵出口，兩個人嘅話，都會比較安心。留喺度隨時會再見到迷路女童，我哋要快啲離開。」阿時溫柔咁摸一摸女仔柔順嘅頭髮，想安撫佢嘅情緒。
「點解要離開？你好討厭我？」女仔低頭含糊咁問。
「吓？你講咩話？」阿時聽得唔太清楚，想女仔重複多次剛才嘅說話。
女仔剛想開口重複，阿時就感覺到自己衫袋嘅電話喺度震動。佢驚喜咁發現電話終於收到信號，而且仲係易玄光打俾佢。
「你等一等，我要接個電話先。」阿時唔好意思咁同女仔講聲，然後撳接聽電話。
「易琛時！你呢個死仔去咗邊啊？而家全世界都拆曬天咁搵你啊！」平時懶懶閒嘅易玄光罕見咁發火。
「叔叔.......」阿時其實都已經知自己做錯，所以心虛咁回應。
「唉......唔洗講我都估到你，一定係去咗搵迷路女童啦，係咪？早知你個死仔唔會咁易放棄，咁硬頸嘅性格都唔知似邊個。」搵咗成晚，終於聽到阿時嘅聲音，易玄光總算鬆咗一口氣。
「我俾路千遙困喺異空間啊......好彩而家遇到多一個女仔，我同佢會一齊搵路出嚟。」阿時向易玄光解釋。
「呃......路小姐......啫係路千遙嘅家人。佢除咗我之外，另外仲有搵一個知名嘅靈媒，孫師傅。」易玄光聽到阿時嘅說話之後，聲音變得沉重。
「真㗎？」孫師傅係阿時嘅偶像，所以阿時嘅聲音興奮到抖震。
「孫師傅算過，路千遙雖然遇到大劫，但暫時陽壽未盡，應該仲有得救。你喺另一個空間，最好唔好亂信"人"......」易玄光將佢嘅擔心講出嚟。
「嗯.......」阿時背脊一涼。
係啊，呢個地方點突然有"人"出現......
自己一個喺異空間同鬼打牆嘅情況吓忍受太耐，所以見到有無害嘅"人類"出現，內心就想去親近同相信。
明明之前整理過靈探年輕人所俾嘅資料，知道迷路女童係有兩個。既然路千遙係人類，咁另外一個十歲嘅紅裙細路女一定就係迷路女童。
十歲嘅紅裙細路女......
阿時僵硬咁回頭，身體忍唔住因恐懼而抖震。
佢發現身後嘅女仔一直喺度喃喃自語：「點解唔留底陪我一齊玩？明明我只係想大家留意到我，同我做朋友。」
「你好驚？我感覺到，被人類所恐懼嘅力量.......好正。」女仔抬起頭，內心嘅矛盾，令佢嘅笑容變得猙獰扭曲。
迷路女童而家轉化為惡靈嘅指數係98%......