惡靈指數100%: 尋人

收到路小姐send嚟嘅資料之後，發現失蹤嘅細路女的確就係自己之前見到嘅小客人......路千遙。

相中嘅路千遙比同年嘅小朋友瘦小，衣服都好殘舊。而且笑容好少，一副文靜老積嘅表情，形象反而比較接近第一次見面嘅佢。

其實易玄光盡量唔想將事件往靈異同科幻嘅方向諗，但搵咗幾日，都毫無頭緒。而且突然出現嘅血寫紙仔，都好難用科學去解釋。暫時只能夠假設迷路女童同路千遙係有關係，兩邊一齊查。

血寫紙仔上嘅字跡似係小朋友字，但絕對唔會係路千遙寫。路千遙雖然算聰明老積，但始終只有五歲，執筆未穩。而血色紙仔嘅字雖然唔算靚，但相對工整好多。

易玄光有再返之前靈探嘅地方，但都冇再遇到路千遙，都冇遇到迷路女童。





網絡上太多有關迷路女童嘅唔同版本，年齡大約喺五至十歲。易玄光抱住懷疑嘅心態，嘗試搵返之前見過迷路女童嘅年輕人，等佢哋回覆，睇吓有冇啲咩新嘅線索。

佢煩躁咁摷亂個頭都冇頭緒，已經變咗頹廢同接近放棄嘅狀態。甚至諗過打電話俾路小姐，退咗個委託就算。

「叮噹......」

聽到又有客人嚟，易玄光粗略執返正個樣同髮型，然後掛嘅服務業嘅笑容去開門：「歡迎光......」

見到門外企住一個只有十幾歲，啱啱升中學嘅男仔。易玄光嘅笑容瞬間凝固：「阿時？」





「叔叔，好耐冇見啦。」阿時表面神色冷淡，但暗中觀察住易玄光嘅情況。見佢憔悴咗唔少，都有啲擔心。

「做咩突然嚟搵我啊？」易玄光露出尷尬嘅笑容。

男仔係易玄光嘅侄仔，叫易琛時。佢細個好親近同崇拜易玄光，佢都係易玄光夢想成為靈媒嘅最主要原因。

但易玄光始終都冇靈能力，都未見過靈體，所以喺靈媒嘅工作上並無起色，反而越做越霉。好彩以往嘅工作都只係客人自己心理作用居多，並唔關靈體事。所以佢只要隨機應變，勉強都將除靈事務所開到而家。

家人試過無數次勸易玄光放棄，而佢都有心動。但諗起當時自己係一意孤行，唔理反對去做靈媒，自己更加放唔低面子。佢覺得起碼要做返少少成績去證明自己，證明做家人睇。





而佢最對唔住同唔識面對嘅，就係由細到大都崇拜自己呢個咁冇用叔叔嘅侄仔，易琛時。

「因為呢個......」阿時拎起手機，打開討論區嘅頁面，遞俾易玄光睇。

原來年輕人將佢哋去靈探，遇到迷路女童嘅事開post放咗上討論區，仲上咗熱門。迷路女童嘅都市傳說越傳越廣，多咗好幾個版本。

其中最新又多人講嘅版本，就係迷路女童問完人係咪搵佢之後，會帶嗰人去異空間。

不幸遇到迷路女童嘅人需要同迷路女童玩尋寶解迷嘅遊戲，如果搵唔到迷路女童嘅真實身份，就需要永遠留喺異空間......

因為越嚟越多人相信同恐懼，迷路女童而家轉化為惡靈嘅指數直線狂升，最後停止喺94%......

當中喺post度，年輕人粗略提到迷路女童事後跟住咗一齊靈探嘅靈媒先生。雖然冇公開名，但根據其他網民推測，嗰個靈媒先生百分百就係易玄光。

「係啊......嗰個靈媒先生就係我......」易玄光好大方咁承認。





「放棄啦，唔好再去查迷路女童嘅事......都唔好隨便招惹靈體，感覺太危險。」阿時用不容拒絕嘅語氣講。

「冇可能，我已經接受咗委託。」易玄光都毫唔客氣咁直接拒絕。

兩叔侄最為相似嘅地方，就係固執又硬頸嘅性格。只要決定咗，就好難再令佢哋回心轉意。

雙方對待，佢哋之間嘅空氣隱約有啲火藥味。最後阿時嘆咗一口氣，無奈咁講：「咁我都幫手查！」

比起性格穩重又可靠嘅阿時，易玄光喺家族中嘅地位明顯更加似一個反叛期，令家長擔心嘅問題少年。雙方長輩同後輩嘅立場好似調轉咁，令易玄光相當煩躁。

阿時細個係好可愛，細膽又怕鬼......明明而家都只係個啱啱升上中學嘅十幾歲細路，偏偏性格成長到咁老成，真係令易玄光覺得好唏噓。

「唔需要，你放學就快啲返去，一陣阿哥阿嫂擔心就唔好啦。」易玄光有啲唔耐煩，擺起一個長輩嘅表情。然後起身借尿遁，先避開自己囉嗦嘅侄仔。





「又走咗去......」阿時恨鐵不成鋼咁咬實牙。

「叮！」

易玄光離開時冇帶埋電話，電話螢幕因為收到msg而開啟發亮。阿時下意識望過去，眼尾見到係客人回覆易玄光，有關迷路女童嘅事。

阿時心虛咁望一望緊緊閂埋嘅廁所門，小心翼翼咁拎起易玄光嘅手機。平時怕麻煩嘅易玄光根本唔會喺電話度設定密碼，所以其他人用手指一掃佢電話嘅螢幕，已經可以打開。

阿時拎起自己嘅電話，將易玄光同嗰位客人嘅對話、枱上嘅文件，全部影相影落嚟。再將客人最新嘅回覆刪除，放返好電話同文件，一臉正常，做到神不知鬼不覺。

「我返去啦。」阿時只係坐咗一陣，就孭起書包離開。

易玄光都覺得有啲奇怪，阿時居然咁輕易就放過佢，但總算鬆咗一口氣。

既然叔叔唔肯俾自己插手，阿時就決定要先易玄光一步，查清楚迷路女童嘅事。起碼比起完全冇靈感嘅易玄光，自己嘅成功率應該會比較高。





阿時細個係可以睇到靈體，都成日被嚇到喊，大個咗先慢慢失去呢個能力。但而家睇唔到反而仲更加驚，如果唔係因為易玄光，佢真係冇興趣再插手靈異界嘅事件。

阿時仔細咁研究文件內容，同埋見過迷路女童嘅年輕人send俾易玄光嘅最新資料，當中搵到幾個重要信息。

一. 迷路女童其實唔止一個，佢哋見到嘅第一個係十歲左右。而另一個就只有佢哋其中一個先清醒嘅同伴見到，係大約五歲左右嘅細路女。

二. 當中嘅五歲細路女，經目擊嘅女仔認完易玄光俾佢哋嘅相之後，確定就係失蹤女童路千遙。

三. 路千遙俾咗張類似尋寶地圖嘅畫佢哋......

阿時忍住恐懼，當睇曬全部資料之後，校服都已經被自己嘅冷汗浸濕。細膽嘅一面，連佢自己都覺得好掉臉。佢迫自己冷靜，拎出筆記細心分析所有資料。

依佢哋咁講，路千遙好大機會已經遇到不測，成為另一個迷路女童。





咁而家嘅任務係咩呢？要搵返路千遙嘅屍體或者魂魄，幫佢返屋企？萬一佢真係變咗迷路女童，自己又要點做好？要點同返易玄光解釋？

路千遙係用紅色嘅唇膏畫尋寶圖，張圖好奇怪，畫咗唔同嘅公仔，好難睇得明。

屋仔、倒轉嘅月亮、向日葵、大樹、貓......到底係咩意思......

阿時係想爭取時間，早易玄光一步查到。但望一望外面昏暗嘅天色，最後都係退縮咗。佢決定等到放假先出發，喺正午係陽光最猛，靈體最弱嘅時候。

參考網上嘅資料，推測最大機會會遇到迷路女童嘅地方。

帶咗成個大大嘅行山背囊，裡面袋住十字架、護身符，蒜頭、聖水......只要諗到可以除靈嘅嘢，佢都袋定防身先。

雖然做足準備，但搵咗成日，依然搵唔到迷路女童。

阿時好肚餓，已經體力透支。而大陽都落咗一半山，將天空染成橙紅色。

「唉......都係返屋企......」佢氣餒咁自言自語，準備轉身離開。

「哥哥，你係咪搵我？」突然喺阿時身後出現一個細路女嘅聲，輕輕將佢叫住。

阿時心裡一寒，身體完全僵硬咗，唔敢回頭。

「哥哥？」見阿時唔應佢，細路女行到阿時身後，拉一拉佢嘅衫角。

天色已經暗落嚟，旁邊嘅街燈都著起。阿時低下頭，忍住心裡面嘅恐懼，眼角偷瞄一吓輕力捉住自己嘅手。

矮小嘅細路女直接走到佢視線前，好奇咁同佢對視。

「路千遙！」搵到細路女嘅阿時並冇驚喜，只有驚嚇，佢嚇到即刻退後好幾步。