惡靈指數100%: 瘋狂嘅媽媽
「吓？」易玄光皺起眉頭，疑惑咁望住眼前好似內訌嘅年輕人。
「唔好意思，我哋係嚟為琴晚嘅事道歉。真係好對唔住，靈探嘅費用我哋會今日內過返曬俾你。」拎住攝錄機嘅年輕人臉色發白，勾起一個牽強嘅笑容，向易玄光彎腰道歉。
態度夾雜住一絲絲嘅討好，同琴晚嘅尖酸刻薄嘅嘴臉完全相反。
佢雖然係同易玄光講嘢，但視線一直冇法由攝錄機嘅螢幕移開。佢喺細細嘅螢幕裡面，見到螢幕上嘅紅色所佔嘅面積越越嚟大，就好似已經行到鏡頭面前。
男仔忘記去呼吸，只係瞪大眼望到實，連眼都唔敢眨。
突然出現一個細路女嘅臉佔據咗成個螢幕......
「啊！」 男仔嚇到拋開攝錄機，跌坐喺地下。
「對......對唔住啊！」佢驚恐咁爬返起，身拉埋女仔逃跑，好似見到鬼咁。其餘兩個同伴對突發嘅事都手足無措，唯有追上去。
易玄光將攝錄機執起，被一班年輕人搞到一頭霧水。目送佢哋離開之後，就轉身返公司。攝影機仲係度錄影中，但易玄光是但合埋個螢幕，就將攝錄機放埋一邊。
佢每日返到公司做嘅第一件，就係喂烏龜仔青青。雖然隻烏龜最開始只係因為佢一時心軟，先幫細路女暫養一段時間。結果等咗幾個月，細路女都冇再嚟睇過佢。
隨住日子一日一日咁過去，易玄光都慢慢開始對烏龜仔上心。幫佢換咗個靚嘅魚缸，放唔少石頭做裝飾。而平時烏龜仔一見到易玄光返嚟，都會興奮咁衝上前，不停拍打住魚缸迎接佢。但今日有啲奇怪......
烏龜仔望到易玄光之後，即刻匿埋喺裝飾用嘅大石後面，將自己嘅身體縮入龜殼裡面。就連易玄光倒龜糧俾佢，佢都一直唔出嚟食。
可能係因為通宵完，易玄光覺得今日嘅身體特別易攰。佢戴起眼罩，準備趁住冇生意嘅時候補眠。
「叮！」
佢收到客人嘅WhatsApp，中斷咗佢嘅休息。佢打開之後，發現琴晚去靈探嘅客人send咁句說話俾佢：請小心，迷路女童跟住咗你。
佢睇到之後，皮膚忍唔住起曬雞皮。然後帶住少少怒氣咁咬住牙，自言自語：「可惡，班死仔又屎忽痕喺度惡作劇，真係唔識死。」
雖然易玄光認為班年輕人只係惡作劇，但收到啲咁嘅msg之後，多多少少都有啲心寒同坐立不安。
易玄光都冇心情再瞓，於是拎起年輕人遺落嘅攝錄機，喺公司四圍錄影，研究啲新功能。
鏡頭快速掃過門口，眼利嘅易玄光好似見到有一個紅色又矮小嘅身影企喺玻璃門外，定定咁望住佢。當佢再將鏡頭轉過去，紅色嘅身影已經消失唔見，一切都只係眼花睇錯。
紅色嘅身影......令佢諗起琴晚重遇嘅小客人。
易玄光走過去打開門，外邊走廊好冷清，一個人影都冇。佢閂好門，轉身返埋座位處理文件。
「叮噹......」隔咗一陣，門外傳嚟門鐘嘅聲。
新嚟嘅客人係兩個年輕嘅女人，其中一個神情呆滯，任由另一個女人拉住行。
神情呆滯嘅女人一入到嚟，無意中瞄到烏龜仔之後，即刻衝上去：「遙遙！呢隻係遙遙嘅烏龜！」
「你捉咗我嘅遙遙去邊？」女人嘅眼神由呆滯轉為憎恨，撲向易玄光，好似想殺咗佢咁，狀態近乎瘋狂。
「家姐你冷靜啲，呢隻龜唔係遙遙嗰隻......」另一個女人應該係佢個妹，即刻拉住瘋狂嘅女人，然後不停安撫返佢嘅情緒。
「真嘅？唔係遙遙嘅？真係唔係？」瘋狂嘅女人慢慢平靜落嚟，但嘴裡不停講住重複嘅問阿妹。
易玄光都拍一拍心口，深呼吸，平靜返剛才受嚇嘅情緒。然後問比較似正常人嘅阿妹：「請問有咩幫到你哋？」
「剛才真係唔好意思，我哋姓路，係想請你幫忙搵一個失蹤嘅細路女。佢係我家姐個女，自從佢失蹤之後，家姐就間中會係咁......」路小姐憂心望住旁邊暫時沉默不語嘅家姐。
「嗯......路小姐，你係懷疑失蹤嘅女仔已經死咗，所以搵靈媒？」易玄光沉思咗一陣，語氣肯定咁講。
「你亂講！遙遙佢仲未死㗎！我要走，唔要搵靈媒！」剛才嘅說話又刺激到瘋狂嘅家姐，憤怒咁望住眼前嘅男人，好似隨時要衝上去咬佢咁。
路小姐都見怪不怪，又再一次安撫完家姐之後，就拉易玄光埋角落，細聲講：「我係呃佢話搵私家偵探，所以佢先嚟，所以希望你幫手保密。」
見易玄光點點頭應承，佢都鬆咗一口氣，繼續講：「其實我家姐個女已經失蹤咗幾個月......私家偵探、報館等等，我哋大部分都搵過曬，但都係冇消息。因為希望已經唔大，所以先想試吓搵靈媒幫手。」
「好嘅，大概都明白。你有冇女仔嘅詳細資料同佢失蹤嘅經過啊？我需要詳細分析一吓......」易玄光講到一半，就被尖銳嘅女聲打斷。
「遙遙！遙遙就喺外面啊！」
瘋狂嘅女人見到外面有一個紅色嘅身影向佢招手，佢即刻開門，衝出去。喺長長嘅走廊不停張望，尋找紅色嘅身影。
喺升降機嘅裡面，再次發現紅色嘅身影，向佢招手。
「嘻嘻嘻......遙遙......媽媽而家就過嚟啦......等埋媽媽......」瘋狂嘅女人以為細路女想同佢玩捉迷藏，所以笑得好開心而且幸福咁跑過去。
「家姐，唔好自己走開！」
路小姐同易玄光見女人出咗去嘅時候，已經即刻追上去。但都趕唔切，只能夠見到升降門慢慢閂埋。
「遙遙？遙遙你喺邊？開門啊！」
「啊！放我出去啊！我要去搵遙遙啊！」
「砰！砰！砰！砰！」
門一閂埋，就聽到女人嘅尖叫聲同撞門聲。易玄光不停撳制開門，但門依然冇反應。
「家姐啊......」路小姐擔心到就快喊出嚟。
見升降機一直下降，易玄光叫路小姐喺原地撳實升降機制，睇下有冇機會會升返上嚟。而佢自己就跑後樓梯，睇下追唔追到女人。
「嗄......嗄......嗄......可惡！」
升降機一直下降，易玄光追咗好幾層都未追上。佢平時嘅生活習慣可以算係好吃懶做，所以體能上完全跟唔上，但佢都嘗試盡力去追。
一直到最後，佢已經跳咗無數級樓梯。雙腳又麻又痛，終於喺地下嗰層成功追上部升降機。
「嗄......嗄......」佢扶住牆，大口大口咁喘氣，等待升降機門打開。
門慢慢打開，剛才仲好瘋狂嘅女人跪坐喺地下，默默咁流淚。
「喂......你有冇事？」易玄光真係好怕佢再一次發癲，所以小心翼翼咁伸出手扶起佢。見女人並冇反抗，佢都鬆咗一口氣。
易玄光留意到女人其中一隻手緊緊咁捉住一張紙仔，但明明記得剛才女人係兩手空空咁入升降機。
「張紙仔係唔係你㗎？可唔可以俾我睇吓？」易玄光用氹小朋友嘅語氣問。
當女人發現手上唔知幾時多咗張紙仔，連佢自己都好驚愕。搖搖頭否認，然後順從咁將紙仔交俾易玄光。
紙仔上嘅紅色大字好搶眼，因為顏料未全乾，所以化開得好嚴重。隱約見到寫住：多管閒事！
紅色嘅威脅嘅字句，令易玄光心驚。而且仔細睇，啲字所用嘅並唔係普通顏料，反而似係鮮紅......
佢將紙仔放喺鼻下面聞一聞，的確帶有淡淡嘅血腥味......
易玄光帶住女人返上公司，同路小姐會合。
路小姐上而下咁檢查女人有冇受傷流血，但並冇發現。因為擔心自己家姐嘅情緒，所以都決定提早帶住佢返屋企。
臨走時，路小姐有啲欲言又止。最後鼓起勇氣，將自己嘅猜測講出嚟：「呢個純粹係我個人猜測......其實我有啲懷疑最近都市傳說裡面嘅迷路女童，就係遙遙......」
「點解咁覺得呢？」易玄光好奇咁問。拎起紙筆，準備將線索記底。
雖然佢嘅職業係靈媒，但佢自己係一啲靈能力都冇。
世間嘅靈異事件，其實大部分都只係人類自己多疑，去疑神疑鬼。所以只要消除客人嘅疑心，令佢哋安心，已經算係完成任務。
「因為我喺網絡上睇咗，迷路女童嘅傳言係近幾個月先出現。而衣著嘅描述......又同遙遙失蹤時所著嘅好相似......」路小姐仔細咁分析。
「只係咁樣，都證明唔到啲咩㗎。」易玄光無奈咁搖搖頭，比起啲純幻想嘅靈異事件，佢更加相信實質又科學嘅證據。
路小姐猶豫咗一陣，細聲補充：「最重要係......迷路女童初期出現嘅地方，同家姐掉底遙遙嘅位置好近......」
「你講咩話？」因為佢講得太細聲，易玄光聽得唔太清楚。
「呃......冇咩特別啦，關於遙遙嘅資料，我返到去再send俾你啊。」路小姐尷尬咁笑一笑，然後拉住自己家姐快步離開，明顯有啲事想隱瞞。
始終都算係客人嘅私隱，易玄光都唔想去深究太多。但提起迷路女童，佢再次記起靈探時重遇嘅古怪小客人。
易玄光心血來潮，喺儲物櫃嘅深處拎返小客人原本用嚟養烏龜仔青青嘅箱，仔細觀察。翻轉箱底，先發現上邊貼住張似係小朋友字跡寫嘅人名貼紙。
貼紙上寫住：路千遙......