麥東冬: 《後續》（四）

我調返嚟香港做嘢已經幾個月。

喺太古間書店嘅飲品區幫手，我感受到禾姍嗰時喺度返工應該都幾悶。
好彩梓軒都嚟咗做兼職幫我解吓悶，佢話佢都要識返個台妹喎。


今日係書店一年一度嘅奶茶買一送一優惠，多人得好緊要。

我同其他幾個職員都手忙腳亂，忙到連氣都無時間唞。





沖吓沖吓，我見到前方嘅人群突然紛紛散開。
原來係有網台做緊訪問，大家都唔想入鏡。

我嘅視線亦好自然望到做緊訪問嘅嗰個女仔。

個女仔戴住帽，頭髮黑黑長長，好熟口面，有啲似……
我行到另一個位置，瞇起眼嘗試再睇清楚一啲。


真係好似佢。






「喂搞咩啊停哂手嘅？」梓軒撞一撞我令我回過神嚟。
我搖搖頭繼續做嘢，但仍然忍唔住係咁偷望個女仔。


個訪問似乎完咗。


佢行緊出門口喇。






唔得，我一定要睇清楚。


「好急屎一陣返嚟，頂住先。」我大聲向幾個同事講咗一句，就除低圍裙準備跟出去。
「死仔依家先嚟……」

我知道我唔跟出去睇嘅話一定會好後悔。