麥東冬: 《後續》（三）

喺台灣嘅依兩年，我已經比喺香港釋懷咗好多。

可能因為我一有時間就會去你屋企探吓世伯，聽佢分享吓你以前嘅事。
更加重要嘅係我會將寫畀你嘅信，喺你墓前燒掉。
其實我一直以嚟都唔知你收唔收到，只係我慣咗咩都同你講。

除咗忙住返工之外，我有時間就會周圍去旅行㗎喇。
開住你IG，我去勻哂你去過嘅地方，連動作都跟埋你擺添啊！
去到每一個地方，我都幻想你當時喺嗰度嘅情景。依種感覺好特別，好似嗰一刻你就喺我身邊咁。





上一次我去台北嗰時，仲撞到禾姍。原來佢就嚟結婚喇～
我哋傾咗好耐偈，佢同我講其實好多嘢我哋都估計唔到，如果一直捉住以前嘅嘢唔放，咁我哋都無空出嘅雙手迎接新嘅嘢。

我成日都好想返去以前同你坐喺公園嘅每一晚。好想睇多次你每個動作每句說話每個表情，唔係想改變啲咩，只係好想好想再感受多一次。我有段時間用盡方法想放低你，甚至忘記你，咁樣我就唔會再有回到過去嘅渴望，咁樣我先可以有新嘅開始。但禾姍嘅說話令我醒起，你一直都唔係喺我手上面，而係喺我記憶裡面。我無需要，亦無辦法將依段經歷抹走。所以我會帶住你，去面對所有事情，無論係開心定唔開心嘅事。

我決定返香港喇，唔再逃避。

你會支持我㗎呵，永晴？






東冬上