麥東冬: 《後續》（五）

個女仔雙手拎住嘢飲，不慌不忙咁行落兩層電梯，行出商場門口，向公園嗰邊方向行。

我一路跟住佢，保持住一定距離。

入到公園，我忍唔住行快兩步想迎面睇清楚佢個樣。

當我差唔多追到上去嘅時侯，望到有樣好大件嘅嘢從天跌緊落嚟！
緊急之際，我下意識即刻一手拉開個女仔，拖佢埋一邊有瓦遮頭嘅位置。






「嘭！！！」


一聲巨響，吸引公園所有人都望過嚟，再望上樓上，討論發生咩事。

我亦係咁望上上空，諗緊會唔會仲有嘢跌落嚟。

「唔好意思…」個女仔細細聲對我講，我先意識到原來我仲捉住佢隻手。

「啊…對唔住。」我即刻放開手。





我望住佢手上得返一杯嘢飲，再望一望地下倒瀉咗嗰杯。

「唔好意思啊！整瀉咗你杯嘢！我係嗰邊書店職員嚟，我整返杯畀你吖！」我難堪又著急地講。
佢搖頭揮手：「唔緊要啊好小事！唔該哂你救咗我啊！」


在場嘅人都似乎進入咗緊急狀態，要避開嘅避開，要八卦嘅八卦。

唯獨我同個女仔靜靜咁肩並肩企喺度。







我打破沉默，帶點緊張：「啱啱喺書店見到你做訪問。你一個人飲到兩杯咁多？」

「唔係啊，我約咗屋企人喺度等，見佢未到我去湊熱鬧買啲嘢飲咋。」佢回答。

「哦～原來係咁。我叫東冬啊，你……」我微微打側身望向佢，打算問佢叫咩名。

突然有個女仔趕過嚟對佢講：「阿晴你有無事？痴線㗎！點會成張床褥掟落街㗎？！想殺人咩！」然後好激動咁指住上面嘅單位不斷破口大罵。


我同佢望住個女仔咁誇張嘅反應，對望而笑。