麥東冬: （四十六）大細路

太古雖然唔大，但基本設施大部份都有。

我哋離開餐廳後，東冬帶咗我去一個我好多年無去過嘅地方–
冒險樂園。

「哇我好耐無嚟過喇。」我環視一周後對佢講。
「點解啊，我間唔中就嚟玩㗎喇！」

佢喺背囊拎出銀包，用會員卡喺金幣機前㩒金幣。
純熟嘅手勢，相信佢真係成日嚟。





「你平時就係好似啲啊伯咁坐喺度全日？」我望向側邊一個坐低嘅老人家，低頭暗笑。

「佢哋點同我啊！我推銀好犀利㗎！」佢自信滿滿答我，喺推銀機前：「我控制，你話畀我知邊個位入好吖。」


每次成功推到金幣落坑，佢面上都會露出不經意嘅微笑。相反，當似乎推唔郁任何金幣嗰陣，佢都會皺一皺眉。
睇住佢成個大細路咁，我有種好滿足嘅感覺。

趁東冬唔為意，我嘗試運用琴晚阿樂教我嘅嘢，伸手入隔離嘅推銀機裡面，試吓輕輕督一吓金幣。





好似真係有郁到！

我企返去東冬隔離，合埋眼，一手用力一掃！

啪啪啪啪啪！！！
過半金幣被我一掃而落。

東冬被嚇到，然後望住我大笑起嚟。
「哈哈哈哈！咁我哋好多嘢可以玩喇！」佢好興奮地講。






我哋圍住全場，差唔多所有嘢都玩咗一玩。

夾公仔，籃球，保齡球...
好彩周圍嘅人唔多，無人留意到空中隨意飄浮嘅物件。


最後一站去到掟彩虹。

東冬先用手指夾住金幣，裝作掟嘅動作，而我就喺佢手中接過金幣，畫出一道拋物線，最後放喺彩虹最細藍色嘅位置。


叮叮叮！





職員搖鈴。

我同東冬相望偷笑。


好耐無試過玩到咁盡興，東冬似乎都同我一樣覺得好開心。


但踏出門口，我哋由樂園返回現實。

「你仲有無邊度想去，或者有咩想做？」佢對我問。

「不如溜冰吖？我以前成日都好怕跣親而唔敢玩，我估我依家無依個問題啩。」我望一望自己對腳，苦笑回應。

東冬溫柔地對我微笑，「嗯」一聲之後就拖住我行去溜冰埸方向。