麥東冬: （四十五）最後晚餐

拎住條已經串返粒吊墜嘅水晶鍊，我相信東冬返緊嚟。

我時而坐低，時而沿住公園踱步，坐立不安。

我第一句應該講咩好？
多謝你幫我？唔該哂你？我好掛住你？
唔得唔得，太肉麻。


我企喺度想著想著，就見到孭住背囊嘅佢跑緊過嚟。





「你...」我開口。
但佢緊緊咁攬住我令無辦法繼續講。

好溫暖。

我將雙手放到佢腰後。

「我今晚就會走喇...」我抬頭對佢講。
「剩返好少時間…」




「嗯。」我垂低頭，將額頭挨落佢膊頭。
「咁我哋去玩啦！」佢拖住我行出公園，去商場方向。


沿路我哋將依兩日發生嘅事講畀對方知。


「原來你做到咁多嘢㗎？！」東冬聽到後覺得好有趣，繼續講：「咁不如我哋去食飯咯！我成日都無食過嘢好肚餓啊。」






於是我哋入咗商場裡面嘅一間西式餐廳。

總算第一次正正經經同佢食到一餐飯，亦係最後一次。

雖然周圍嘅人見到佢一個人嗌兩個餐都會用奇怪嘅目光望佢，但佢一啲都無覺得尷尬。

佢坐喺我身旁，左手一路拖實我隻手，就連低頭食嘢嘅短短幾秒，視線都唔願意離開我，好似怕我隨時會消失一樣。


由細到大，我都被認為係個好獨立嘅人，令我從來都唔敢喺其他人面前表現得軟弱。
特別係媽媽離開咗嘅依幾年，好似提醒咗我一路以嚟學習獨立係無錯。

但自從認識東冬，我發現所謂獨立只係一種習慣，唔係我真正想要嘅嘢。
我都好想依賴人，更加想被人需要。





我用力攬住東冬。

佢放低餐具，用手抱住我塊面，目光放柔對我講：「我食飽喇，我哋去第二度啦？」