麥東冬: （四十二）特異功能

我同站長並肩而行，佢似乎係帶緊我去附近深夜仍然營業嘅酒吧。
雨勢一直都無減退，喺咁大雨之下行走但全身滴水不沾，感覺好神奇。

「你叫咩名啊？唔想叫你做站長咁怪。」我問佢。
「叫我阿樂就得。想食咩？」
「其實我唔係好明，乜我哋食到嘢㗎咩…？」我皺著眉，滿肚疑問。
「你真係唔識㗎喎，咁你依段時間咪好悶。」
「我記得我死咗之後，開頭有段時間係好餓嘅，但慢慢就唔再覺得喇喎。你唔好同我講其實我係要食嘢…」我不安地問。
「唔係，過吓癮啫。就依間啦都唔錯。」佢指住前方間酒吧。





酒吧有幾層高，裡面咩國籍嘅人都有，佢哋完全無被雨天影響心情，相當熱鬧。
阿樂帶住我，喺檯同人之間穿插， 一路左望右望客人檯上嘅食物。

佢忽然彎腰望住一碟啱啱上檯嘅牛扒。

「趁班港女掛住影相仲未食，我哋食先。你聞唔聞到？」佢示意叫我一齊彎低身。

我彎腰不斷用鼻大力咁索，然後望住佢擰擰頭。

阿樂企返直個人，問：「你平時點感覺到佢？」





「嗯…佢喺我身邊嗰陣好易有種暖流，之後我就會感受到佢嘅感覺，有時甚至好似喺佢身體裡面咁。」

「你合埋眼，想像住依種氣流，聞多次。」佢對我講。

於是我合埋眼諗住東冬，再聞多次。

『哇真係聞到！塊牛扒好香啊！』

「聞到？夠集中嘅話可以食埋落肚，當然只係一種感覺，唔會真係食咗。」





我企返起身，興奮咁問佢：「好神奇啊！仲有啲咩我係唔識㗎？！」

「我估你都唔知可以『移動物件』。但依個好嘥精神，郁完會好攰，就好似做人嗰時幾日無休息無食飯咁。所以我哋無咩事都唔會亂嚟。」

「我唔怕啊，我都就走啦，想試吓玩啊。阿樂你快啲教我吖！」我不斷搖動阿樂手臂，哀求著。

佢無奈呼氣一聲，點頭。


依晚係我死後，第一次覺得原來做鬼都有得意之處。

我亦明白到，人同鬼真係兩種完全唔一樣嘅存在。






我一定要等佢返嚟，將依一切都同佢分享。

離開後去邊都唔重要，我只係想喺離開之前，同佢有一段無辦法忘記嘅回憶。