麥東冬: （四十三）「永晴」

東冬同禾姍搭清晨嘅列車出發嘉義。

佢哋根據永晴所畀嘅地址同用半桶水嘅台語問路，總算順利咁搵到間屋。
間屋有兩層，灰色牆身嘅設計同周圍嘅獨立屋差唔多，唔算太起眼。

再三確認無搵錯，東冬按下門鐘。

叮噹。

打開門係一個灰色頭髮嘅中年男人。




東冬認得佢就係永晴爸爸。

「嗯？？你們找誰呢？」中年男人隔住鐵閘問。
「你好叔叔，我叫東冬，是永晴香港的朋友。」東冬戰戰兢兢回答。
「哦...你好，有甚麼事嗎？」
「我們找到她的吊墜，所以來交給叔叔你。」

叔叔聽到後好錯愕，即刻開門畀佢哋入屋，招呼佢哋。






叔叔著急問：「你們真的找到吊墜？怎樣找到的？可以先讓我看看嗎？」

東冬即刻喺背囊拎出吊墜遞畀叔叔，接住講：「在她出事的地方找到的...」

叔叔仔細檢查吊墜：「太感謝你們幫忙了，我還以為不能找回來。」

「請問叔叔...永晴墳墓在哪裡？」東冬問。

「在我們家的後庭院，怎麼了？」叔叔愕然。





東冬隨後企起身，眼神堅定對住叔叔問：「我想去看看，請問可以嗎？」

「可以啊…在這邊。」叔叔示意帶東冬去。


東冬望一望依然坐低嘅禾姍。
「我有點累想休息一下，你去就好了。」禾姍微笑對東冬講。


庭院雖然唔大，但種滿花草，花香四溢。
旁邊仲有個小型嘅鞦韆椅，有隻狗仔伸住脷喺上面曬太陽。

「其實也不完全是她的墳墓啦，只是她生前的物件都埋在這裡。」叔叔指向插喺草地上，寫住「永晴」嘅牌仔講。

「那我可以看看她那手鍊嗎？」





「你好像知道的也不少，你們認識很久嗎？我沒有從她口中聽說過你欸。」叔叔既好奇又帶防備咁問。

「我們認識不久，但感情蠻好。我是聽說遺物完整的話永晴才能真的安息，所以我希望能幫她完成心願。」東冬嘗試簡化成件事令叔叔明白同接受。

叔叔點點頭，深深吸一口氣，將永晴塊牌下面嘅木板用力揭起，拎出個鐵盒仔。