麥東冬: （四十一）沒道理

今晚無東冬陪伴嘅我，自己一個坐喺公園。
好想知道佢依家喺台灣點。

我抬頭望天，嘗試尋找月亮嘅蹤影，只見烏雲密佈。
估唔到可能係喺度嘅最後一晚，會係雨天。

不出幾分鐘，更開始傾盆大雨。
公園杳無人煙，寂寞感亦變得更濃。

無意中見到遠處有個人慢步行嚟我個方向。佢同我一樣無被雨濕透。





佢行到我面前我先睇得清楚，原來係自由太古站長。

佢從容咁坐低喺我身邊，問：「自己坐喺度？」
「嗯，你呢？」
「收咗工周圍行吓。煩緊咩？可能我幫到你。」
「係咪可以唔使講出口你都知？」我問。

佢呼口氣，皺起眉合埋眼。






過咗陣佢就張返開眼，用一貫平淡冷靜語氣：「原來係咁。咁睇嚟你就走。」

「係，咁你可以點幫我？可唔可以幫我翻生？」我帶點晦氣問。

「唔可以。但我可以開解你，令你離開得舒服啲。」

我無言。

佢繼續：「你應該知道自由人只要了結咗心願，就無必要再留喺度。你一開始就只係因為粒吊墜先唔走，你同佢發生嘅一切都係bonus，甚或乎佢嘅存在只係幫你搵返粒吊墜，就係咁簡單。」





「點解你可以講得咁置身事外。咁點解你唔離開？你死咗之後無遇到任何令你感動嘅人，開心嘅事㗎咩？」我反問佢。

「有遇到。但我留喺度幫自由人，係為咗完成自己心願。如果有日我心願達成嘅話，我一定會離開。」


好多時旁人講嘅道理我哋都明。
只係做決定時需要幾大嘅勇氣，佢哋又明唔明？

每次諗到以後再見唔到東冬，就有種無形嘅壓力同痛由心口蔓延，感覺有如當日發生意外嗰刻一樣，令我無力穩住，將我撕裂。


我無心再反駁，靜靜坐著。






突然，站長一手拉起我，講：「唔好坐喺度喇，去食嘢。」

「吓食嘢？！」