麥東冬: （三十八）為我好

今晚，我同之前一樣，喺公園等東冬返嚟。

並肩而坐，我感應到佢有好重要嘅說話要對我講。

「啱啱同伊琳食飯傾咗啲咩啊？」我問東冬。
「都係傾吓大家嘅近況咁，都有問佢關於你嘅事。」
「嗯？有咩要問？」
「例如問吓如果搵到粒吊墜之後你會點...永晴，不如今晚我哋唔好坐喺度，周圍行吓啦。」佢忽然起身對我講。






我邊行邊望住佢：「咁伊琳話我會去邊度啊？」

「佢話你想去邊就會去邊。其實你係咪好想離開依度？」

「邊個會想做遊魂野鬼吖，大家都有心願未了先留咗喺度。雖然我都未諗到自己會去邊，但起碼係個真正嘅解脫。你唔會想我離開咩？」

「嗰時伊琳要去外國，最近禾姍又要返台灣，遲啲又到你要走。其實我點樣諗都唔係好重要？因為我哋每個人都有各自各嘅一生，我無資格同權利去干涉你哋嘅決定，我都想你哋開心嘅。」


傾吓傾吓我哋入咗另一個公園。





「東冬，其實你係咪有咩想同我講？」我忍唔住問佢。
「點解你知道...？」
「嗯...覺得你今晚有啲奇怪，可能平時我哋好少周圍散步，但你今晚...」
「我想同你去多啲地方，有多啲回憶。你坐上去吖。」佢指住前面個鞦韆。

我坐咗上去，背住佢，而佢喺我後面默默幫我推鞦韆。
我專登唔講嘢，等佢開口。

「永晴，我喺你出事嗰日執咗你粒吊墜，原來一直都喺我度...對唔住。」





我「嗯」一聲回應。

「你會唔會嬲我？我都係最近先發現...」

我擰擰頭：「唔會，我好開心你坦白話畀我知。你好勇敢，如果我係你可能都會唔知點開口。」

東冬輕輕捉實個鞦韆令我停低，講：「其實我知道嗰一刻我都唔知點做好。因為唔單止係唔知點開口同你講，而係我...」

「我都唔捨得。」我依然背住佢，繼續講：「但你有無見到啱啱你一路推我嘅時候，周圍嘅人點樣望你？」

「依啲係我同你兩個人嘅事，我唔介...！」

「我介意啊！我留喺度只會拖累你，你連同我正常食餐飯都唔可以㗎！」





「你無拖累我啊，我哋仲有好多其他嘢可以做，好多地方可以去！」

「我淨係想離開依度咋！如果你真係想我好，希望你可以幫我將粒吊墜交畀我爸爸！！」

我無心力同佢再拗落去，亦唔敢擰轉頭被佢見到我已經淚流滿面。


「永晴...」

我感覺到有一股暖氣從後面包圍住我。

「你一定要等我返嚟。」