麥東冬: （三十七）好或不好

東冬想搞清楚點樣處理粒吊墜係最好，於是第二日約咗伊琳出嚟幫手。


「我唔知點開口講畀佢知，原來佢粒吊墜一直係喺我度，佢會唔會覺得我玩佢？」東冬問伊琳。

「應該唔會嘅。如果當初唔係你執到，你就唔會見到佢，你哋亦唔會識到對方，而之後一切都唔會發生。依個可能係你哋之間嘅緣份？」

「我就係唔想我哋嘅緣份咁就完咗。我知其實我係一定要畀返佢，只係我無勇氣畀，因為我唔捨得佢啊！」

「你記唔記得嗰陣我決定去working holiday，你最初都唔想我去㗎，但你最後都放手支持我。如果你真係想佢開心嘅話，你應該係去問佢最想點樣，盡力幫佢達成啊。」





「但我同永晴嘅情況同我哋嗰時都唔同！佢係會喺我哋依個世界消失，我根本都唔知佢究竟會去邊！我做唔到咁灑脫啊。」東冬越講越不安。

「以我嘅睇法同認知，如果再無咩留戀嘅話，佢想去邊就去邊㗎喇。但一般都唔會選擇留喺度，因為以靈魂角度，咁樣係停滯咗，靈魂本身中意不斷進步。」

東冬對伊琳嘅說話一知半解，嘆氣一聲，繼續問：「咁如果我決定畀返粒吊墜佢，係咪就咁畀佢就得？跟住佢就會即刻喺我面前消失…？」
「唔一定即刻消失嘅，同埋我以前睇過類似嘅嘢，其實你係唔可以就咁直接畀到粒嘢佢㗎。」
「吓！咁我要點做？」
「你知唔知佢有無墳墓？如果有嘅話，你要去佢個墳前畀㗎，燒又好埋又好，因為意識…」





伊琳都未講完，東冬又再嘆一大口氣：「唉！我唔想佢走啊！！」
「我知我咁講你會唔開心，但事實係人鬼殊途，你畀佢離開係對大家都好...」


喺返屋企嘅途中，東冬一邊聽住歌，一邊反覆思量伊琳嘅說話。

「乎你想　乎你猜　是誰人整眠煩惱
煩惱著　無情的風　無情的雨　阻礙咱的路
甲你疼　甲你惜　甲你捧在我雙手中
我一生唯一的希望　要給你快樂　好或不好」





望住車外嘅風景，東冬覺得自己依一刻係台劇男主角，百感交集。
而聽完依首歌後，佢決定好一陣要同女主角講啲咩。