麥東冬: （三十九）我們一起出發

東冬買咗第二晚去台灣嘅機票，亦約好禾姍一齊上機。
去機場之前，佢約咗梓軒食晏。

「你條友最近淨係cow女都唔搵吓我！呷醋啊！」梓軒翹起對手，皺住眉望住東冬講。
「最近發生好多事，禾姍今晚返台灣喇。我會同埋佢過去。」

「啊！！！！」梓軒突然大叫。
「咩事啊你又…？！」
「出咗幾次街就同個台妹『搭飛機』！我同你識咗咁耐你都無同我『打』過！」
「我唔想同你打…」東冬無奈回應，然後解釋：「同埋我同佢唔係嗰種關係啊。」




「唉都唔明你仲怕咩，人哋一直都咁主動。有女不追非君子，人情練達皆文章啊施主。」

東冬皺起眉：「唔知點同你講好。」


梓軒見東冬愁眉深鎖，就喺袋拎咗紙筆出嚟，寫咗幾行字，褶埋遞畀東冬。

「寫咩啊...」東冬接過張紙，想打開睇。

「唔好打開吖！」梓軒㩒住東冬隻手，繼續講：「你想表白嗰時先打開，對住佢講依幾句咁就實掂！」





東冬完全無心情諗同禾姍嘅事，將張紙隨意放喺褲袋。


去到機場，東冬同禾姍會合。

「我本來以為你只是來送我的機。昨晚突然說會跟我一起回台灣，真的嚇我一跳勒。」禾姍對東冬講。

「是啊，忽然有要事要到台灣一趟。反正你今晚也要走，倒不如一起出發吧。」





「那你是留在台北嗎？今晚住哪裡啊？」禾姍好奇問。

「其實我要去嘉義那邊，打算明天一早就搭高鐵去。今晚…也是隨便在台北找家民宿住就好了，反正我一個男生也沒甚麼所謂吧。」

「其實如果你不介意，可以來我家啊，在車站附近蠻方便的。」

「吓...真的嗎？」東冬有啲唔好意思咁問。

「我可以啊，你不方便嗎？」

「不會啊！先謝謝你。我們先上機吧，下機我們再見。」臨上機東冬對禾姍講。