麥東冬: （三十六）笑話

東冬返到自己間房，坐低。
佢回憶起曾經喺公園嘅某個晚上。

---

嗰晚，買完奶茶，佢自己一個坐喺長凳。
喺公園散步嘅人唔少，好多仲拖住狗仔。

佢當時啱啱開始留意到禾姍，禾姍畀佢嘅感覺好特別。
每次見完禾姍，佢嘅感官彷彿都被放大，對外界嘅一切都特別敏感，特別正面，特別多想法。





佢咬住支飲管，甜絲絲咁同每隻經過嘅狗仔對望。
『好可愛啊！如果可以同佢坐喺度睇就好。』
當時嘅東冬無時無刻都有千萬個念頭聯想到禾姍。

佢本來幻想得投入，被身旁一隻肥嘟嘟嘅哥基分咗神。
隻哥基異常興奮咁聞個草叢，好似有啲好吸引嘅嘢，不停伸脷舔著。主人用力想拉佢走佢都唔肯。


主人抱走咗隻哥基後，東冬先見到草叢有嘢閃住藍光。





『哇好靚啊...』佢行埋草叢拎起粒吊墜。

佢坐返埋凳，舉高吊墜，望透佢。

『如果今晚有月光照射一定仲靚！好想畀佢睇吓啊。唔知邊個跌㗎呢？會唔會係佢行過公園嗰時跌？』只係幻想吓都足以令東冬興奮。


突然間，佢覺得個肚開始隱隱作痛。





『唔通係杯奶茶...？之前幾次飲都無事！』

『隔離個女仔都應該睇得出我肚痛...』

『粒吊墜…放返喺草叢度會唔會被狗仔擔走...？』

『啊！之後再算啦！個肚好痛啊！！！』

---

東冬打開櫃桶，望住永晴粒吊墜，懊惱不已。

佢責怪自己點解會完全唔記得依件事。
之前同永晴努力搵嘅嘢，原來一直喺自己度。





『笑話。』

佢喺櫃桶將伊琳畀佢嘅頸鍊同粒吊墜拎出嚟。
依兩樣都係令佢唔可以再見到永晴嘅嘢。
而今次嘅抉擇比上一次難好多好多。

佢嘅思緒亦複雜到無辦法決定任何嘢，只能空白。