麥東冬: （三十五）想回到過去

「好突然啊...難得你哋開始有進展，佢就要走。」我對坐喺隔離嘅東冬講。
「係囉，好可惜。」佢嘅語氣比我意料中平淡。
「你會唔會唔捨得佢？」我好奇一問。
「嗯...少少啦，但又唔係以後都唔見，台灣同香港好近即嘛。」

係嘅，佢哋要見面唔難。

「叮叮。」
東冬個電話忽然響起。
原來係禾姍tag返佢今日啲相，佢將個電話遞畀我睇。





「影得好靚啊！哈哈雖然我都喺度但佢無tag我…」我講。
「我知道你喺度咪得囉～喂你IG係咩？我想睇吓！」佢好雀躍咁問我。


「你都成日貼嘢㗎喎。」東冬開咗我個account後講。
「係啊，我好中意記錄自己生活嘅依種感覺。」
「最後依個post好多人留言...」

「原來有咁多人都知我已經...唉好懷念以前嘅生活、我啲屋企人同朋友啊...點解係我要死喎！」我怨憤地講。





「雖然你依家無真實咁同佢哋一齊，但佢哋一定無唔記得你！你睇，佢哋仲會成日tag你㗎。就算將來你真係離開咗依度，我都一定會記得你。」東冬安慰我。

其實聽到佢咁講我好感觸，只係佢又提醒咗我總有一日係會離開佢，失落感又浮現。

東冬似乎對我嘅過去好有興趣，每幅相都會認真睇，有唔明嘅地方亦向我問個究竟。
我哋一齊望住電話，並肩而坐，越靠越近，近到我感覺幾乎已經穿入咗佢身體裡面一樣。

同佢一齊睇返以前嘅種種經歷，就好似帶佢回到過去，依種感覺好得意。





佢睇睇吓，開咗一幅相問：「依度係邊度嚟？」

「係我台灣嗰邊間屋嚟。我以前一得閒就會返去探我爸爸。如果我無估錯，我爸爸應該葬咗我返去。你睇唔睇到我戴住條手鍊？」我指住電話問。

東冬諗到一啲嘢咁，興奮地講：「啊之前都諗唔到！我可以將你條手鍊嘅相放上網，問吓會唔會有人執咗粒吊墜！」

「好喎！」

我隨即指示佢開出一幅清楚見到手鍊嘅相。
東冬放大幅相嚟睇，睇咗好耐，然後放低電話。

「點啊？放依幅好唔好？」我問。

「嗯，好。我有啲攰，想返去喇。」佢沒精打采咁答我。





佢無緣無故嘅冷淡令氣氛變得尷尬。

我感覺到佢似乎發現咗啲野，但見到佢無情嘅眼神，我唔敢問，只好目送佢返屋企。