《家姐話，幫我追女仔》: 四十四

 
真係第二個世界嚟，呃蝦條、影人相、仲要亂咁share畀身邊啲人睇——難為家姐真心鍾意你。
 
我努力咁整理思緒。
 
同家姐講？實hurt死佢；唔同佢講？仲hurt，實有排煩——主要係，我冇可能就咁睇住家姐畀人玩。
 
屌，垃圾輝咁垃圾，家姐都真心鍾意佢？
 
冇出息呀你！




 
我同婷婷偷偷哋跟住輝哥同朋友。
 
佢哋去緊個方向，就係我屋企。
 
嗯，輝哥口中嘅、今日生日、保守嘅女仔，真係就係我家姐。
 
原來唔再可以置身事外，因為家姐係我親人——
 
係我想、要保護嘅人。




 
即使我哋唔係真係特別、特別close，平時都唔係特別着緊佢，但係，原來，我呢刻好緊張。
 
好似為佢感到難過……點解佢要咁慘呢？點解會遇到個仆街呢？點解佢又會鍾意個仆街呢？我心情好亂，最大嘅，就係唔開心。
 
婷婷一路都捉住我膊頭，可能我反應唔大，甚至係冇乜反應。
 
「點算啊而家？」婷婷問。
 
眼見輝哥同佢個friend已經分道揚鑣，我哋亦都越嚟越近屋企，我個心跳得越嚟越快。




 
下一刻，我就收到家姐WhatsApp：「輝話佢就嚟上嚟喎，不如你同阿婷等間先搵我？」
 
冇啦。
 
我再唔做嘢，家姐要冇啦。
 
婷婷都攞起我部電話睇，然後搖一搖頭：「WhatsApp同恩姐講呢件事？」
 
行入一條後巷。
 
Well，可能因為越行得好近，又冇乜人，所以輝哥回頭，就見到我哋。
 
「咦，你咪係細佬囉？」
 




輝哥停低，打量我哋。細你老母，邊個同你有親？你條仆街，我恨不得剪爛你再打成肉碎呀！！！
 
「你去緊邊？」我問。
 
「搵緊你家姐呀，佢話聖誕同我過，又撞正佢生日喎，真係有緣啦。」
 
我非常憤恨，點解佢仲可以講得咁輕挑？
 
輝哥又講：「你呢？好靚喎你隔籬個女仔，Hello！我叫阿輝。」佢同婷婷打招呼。
 
屌你，收皮啦好冇？
 
我西晒面，婷婷只係望一望我，冇應到輝哥——我哋都知你咩料啦，唔使喺度扮晒嘢。
 
輝哥冇因為我哋唔理佢，而覺得尷尬，反而繼續講：




 
「我買咗啲蛋糕仔上去啊，你哋食唔食？畀幾個你哋吖，可以一啖食晒㗎，好快手，又唔會整污糟，好方便。」
 
佢好似好歡快、心情好好；仲模仿咗一啖食晒個蛋糕個樣。
 
但係，我望住佢呢個動作，竟然係諗起佢啱啱講今晚要食咗家姐，有食唔得、罪大惡極。
 
家姐喺佢眼中，同舊蛋糕仔一樣，可以一啖食晒、快手、乾淨、方便；因為家姐傻、家姐蠢，因為家姐真心鍾意佢。
 
所以，佢可以一啖食咗家姐……
 
最後，家姐只會被無情捨棄，就好似舊蛋糕變咗殘渣，只會被沖入大海。
 
我突然好痛心，諗起好多畫面，係家姐好蠢咁話等輝哥嘅時候。
 




而呢一刻，輝哥見我哋都係冇應佢，又自顧自輕快咁向前行。佢心情好到，令我心情好差，我諗起啱啱佢喺便利店講過嘅嘢，我諗起家姐為過佢喊然後極度憔悴嘅面容。
 
電話又震：「佢話就到。」
 
我忍唔到。
 
我上前，捉住輝哥膊頭，然後用膝頭哥頂佢背脊；等佢跌落地，再㩒住佢個身，打佢塊面——媾女媾得咁開心？我真係好嬲。
 
輝哥擺喺袋嘅comdom都跌咗出嚟，佢反應唔切，只能畀我㩒住。
 
婷婷冇阻止我，只係低頭，又㩒兩吓電話。
 
「做咩打我？」輝哥問。
 
「我聽到晒你喺便利店講嘅嘢。」你仲好意思問。




 
「Wow……唔怪得之。」輝哥試圖起身，輕挑咁講。
 
「你條仆街！」我嬲到仆街。
 
「女我就大把，我唔會蝕，係你家姐鍾意我咋。」你仲笑得出，咁講嘢？
 
「收嗲啦！」
 
「佢想畀我屌㗎。但原來佢細佬係痴線㗎，而家你求我屌佢，我都唔屌。」輝哥冷笑，我異常心寒。
 
「屌你條仆街含撚死啦。」
 
我真係㩒住佢打，佢都有回拖，但姿勢上係我佔優，因為我壓住佢。
 
我好嬲，打打吓，好想喊，然後我將呢種感覺化成力氣。
 
直到有途人經過，叫晒分開我哋，我哋先停。