《家姐話，幫我追女仔》: 四十二
人有好多幻想，我哋四個喺班房切住蛋糕食、聽住郭靖同Winnie喺度打打鬧鬧，突然覺得十年、廿年之後如果仲可以係咁，就非常好。
「如果唔係因為婷婷，我先唔會平安夜都見你囉。」Winnie話。
「我就唔係咁睇啦，咁難得嘅機會都畀我哋撞正，代表我哋真係好有緣啦！」郭靖回嘴。
「食蛋糕啦你，嘈住晒。」Winnie又切咗一舊蛋糕畀郭靖。
婷婷都係笑笑咁望住佢哋，冇出聲，然後喺耳邊偷偷哋同我講：「佢哋感情真係好。」
我反問：「咁我哋呢？」
「佢哋有我哋一半咁啦。」婷婷細細聲答。
如果，我可以同婷婷結婚，郭靖同Winnie一定係我哋嘅伴郎、伴娘。
Well，諗得有啲長遠添，而家都未一齊，但諗吓就覺得開心！
食完蛋糕，我棒返啲禮物，擺喺一個大袋裏面。
「唔係就咁就走吓話？」郭靖話。
「唔好阻住人啦你，走啦快啲。」Winnie推開郭靖。
「多啲人熱鬧啲吖嘛……你呢，係咪陪我一齊走？」
郭靖同Winnie越行越快，慢慢就冇咗影；我同婷婷喺後面，得返兩個人時，突然有少少尷尬。
我哋同之前唔一樣㗎啦，但又唔係真係咁唔一樣。
「你今日好靚。」我唔記得自己有冇講過。
「你都係吖。」婷婷潤我？
「咁……跟住你有冇話想去邊？」死火，其實我淨係諗咗啱啱幾個鐘留喺學校，冇預到之後做咩。
「冇所謂啊，求其行吓，或者唔行都得啊。」婷婷答。
「Umm……好啊。」
「啊！或者我煮啲嘢你食啊？」婷婷提議。
「哦、哦，好啊。」我感覺婷婷主動咗好多，係一種感覺嚟：「咁食完我哋出去行？」
「恩姐喺唔喺屋企？煮埋佢嗰份？」
「唔喺啊，得我哋。」我講咗大話。
然後我打開電話，WhatsApp家姐：「我同婷婷上嚟呀，我想二人世界，你可唔可以行開一陣？」
「追到？」家姐秒回，睇嚟真係喺屋。
一半啦：「算係，please。」
「得，好好對人。」冇收我一百蚊！！！家姐我愛你！！！
最後呢，真係婷婷煎咗啲蛋餅，䜴油雞翼，淥咗幾條菜，我哋一邊睇電視一邊食。
「好食！」啱啱見到婷婷喺廚房嘅背影，我覺得好窩心——佢仲有呢一面，得我睇到。
「求其煮少少咋。」婷婷開心嘅，但把口就咁講。
「真係唔知邊個咁好彩可以做到你男朋友呢？」我語氣充滿歎息。
「係囉係囉，我都想知。」婷婷附和。
之後……
冇呀，冇做任何嘢，未一齊吖嘛。
只係，我哋坐嘅距離近咗、貼咗，就算掂到對方，都唔會縮開。
呢一種不言而喻嘅親密，更加令我覺得，我哋將來一定會一齊，等一等，大家都努力捱埋個試，就專心拍拖。
啲禮物擺喺我度，廢事婷婷一次過攞晒成袋，太誇張；婷婷一直睇、一直笑、一直喊，搞到我都唔太好意思。
但有人欣賞我嘅用心，尤其是你，我都好感動。
之後，我哋出街行吓，勁——多——人，個個一雙一對、一家大細。
婷婷問：「恩姐聽日生日喎……你有冇準備嘢畀佢㗎？」
我搖頭：「冇喎，都咁多年，何況佢約咗仔。」
「邊個？」
「咪嗰個輝哥……」
「唔係衰人嚟㗎咩？佢唔同恩姐一齊喎。」婷婷疑惑。
「係呀，但——我都唔知女仔諗咩，有好男仔又唔鍾意，係都要痴落啲衰人度！」我大歎氣！
「我鍾意好男仔啊。」婷婷捉一捉我衣角。
「我知！你例外！」我挑眉。
「揀返份禮物畀恩姐啦，我哋一齊揀。」婷婷提議。
所以，我哋又一齊行街。其實我唔特別想揀禮物，但同婷婷一齊，乜都好似好好玩。
「呢隻色好睇！」
婷婷話，見家姐每日個樣都好頹，可以搽吓唇膏，精神啲等佢原本嘅美貌出返嚟；Err……救唔返㗎啦，家姐再頹啲個樣，我都見過啦。
「好睇！」
但係揀咗就OK，唔使再煩。
「我揀多樣，我都要送。」婷婷話。
「我送埋你嗰份咪得囉！唔使再買啦。」
「唔得，畀多啲誠意啦，恩姐咁好人，又聖誕節喎，買多份。」婷婷壓低聲線：「可能佢聽日見完嗰個衰人心情差，要𠱁吓佢。」
「嗯嗯。」是但啦！
最後，我送婷婷返屋。走嘅時候，婷婷話：「我今日超開心，多謝你啊。」
「我都係。」
「你要記得……我鍾意你。」
怦、怦、怦。即使知道，仍然激動。
「你都要。」我摸摸佢頂帽。
「咁——遲啲見啦？」婷婷歪頭。
「好。」
「再見。」
「再見。」
結果，講完之後，冇人走。
「再見啦！」婷婷笑。
「好！」我點頭
我哋對望。
「不如坐多陣先？」婷婷笑。
「好啊。」我同佢一齊走隔籬啲櫈坐一坐。
終於，我哋傾多陣偈，就走。
婷婷今次真係轉身，行兩步就擰轉頭望吓我仲喺唔係度；我一直喺度。
佢笑得好燦爛，而家係冬天，但佢係夏花。
再行前幾步，佢就要入大廈啦，回頭，認真咁同我揮一揮手，然後內進。
我留多幾秒，然後轉身。
心動嘅感覺，含蓄、激烈、美好，希望之後，都仲係咁。