《家姐話，幫我追女仔》: 三十五

 
*
 
我攞上手阿俊送畀我嘅盃，好重身；佢竟然話送畀我……
 
我冇講出口——我喺聽到改詞嘅部分，諗起一次次同阿俊嘅相處。好奇妙，明明佢喺眼前，我竟然諗起舊時。
 
我覺得，佢口中嗰個女仔，係我。
 
唔係覺得嘅，正確啲嚟講，係我知道……




 
我諗起——
 
之前坐阿俊隔籬，我有數學題問佢嘅時候，其實，佢都未必即刻答到我，但係都會超級認真放低手頭上嘅嘢，然後盡量拆；我知道，因為我唔識，所以佢温多咗好多，為咗教我。
 
其實我應該知道。
 
我唔舒服嘅時候，阿俊落MI攞藥、買甜品畀我，啲藥唔再苦，因為有佢嘅用心。我從來，都冇遇過男仔咁樣對我，可能有人話鍾意我，但冇乜人有實際行動；阿俊從來都同其他人唔同。
 
其實我應該知道。




 
調咗位之後，每次我擰轉頭，都可以對上阿俊嘅目光。世界上有咁多凑巧咩？所謂不期而遇，其實會唔會有好多都係因為有心？阿俊成日睥住Chris，佢兩個互潤，我看在眼內。
 
我覺得自己醒咗好多㗎。
 
阿俊呷Chris醋，因為Chris可以陪得我多啲？但係，我唔想解釋啲咩，我唔想同阿俊講，其實我個心從來冇Chris——似乎，只係可以裝到一個人。
 
不過，我係唔會將呢件事講畀阿俊知；因為，哈哈，我見到佢呷醋，我竟然好開心。
 
哎喲～




 
其實我應該知道。
 
阿俊都冇特別隱藏，其實都算明顯啊，佢何曾對其他女仔咁好？難道友情真係可以令我收獲到特殊待遇？唔會單純係咁㗎。
 
佢其實都OK受歡迎，都多朋友㗎，雖然佢話自己毒撚，但每次喺班上講嘢，有好多附和；搞學會，竟然能夠令好多師弟妹都記住佢喎。但係，佢對其他人嘅好係有禮貌，但係又有啲疏離，總之，同對我唔同……
 
其實我應該知道。
 
我聽到阿俊話，唱首歌送畀一個女仔。
 
我知道，佢係講緊我——仲有邊個呢？仲可以係邊個呢？
 
Chris一直喺我隔籬講：「都唔知係邊個呢，我見楊知俊都同Winnie行得好埋，唔通係畀Winnie嘅？」
 




但我知道，唔係，唔係Chris講嘅咁。
 
Winnie冇對阿俊有柔情目光（笑），應該冇被阿俊掛念？更加唔鍾意lemon tea。仲有，佢哋唔太熟。我都驚訝於自己突然梳理得咁快……
 
因為，我見到間奏嘅時候，阿俊望住我，我有種感覺，佢真係唱緊畀我聽。
 
改詞喎，自彈自唱喎，仲要好聽喎……
 
耳邊傳嚟Chris嘅聲音，但係我只聽到阿俊嘅歌聲。
 
當我聽到「不願沉溺 只願情依」，突然忍唔住，唔小心喊咗，我都唔知點解。
 
我諗，其實，我都係？或者，唔係？內心總有個明確嘅方向，先會咁有情緒。
 
係咪？




 
我好感動，真係感受到佢嘅認真？努力？原來佢仲可以咁。呢一點，佢同其他人係唔同㗎。
 
其實我應該知道。
 
我見到阿俊有獎，其實我好開心好開心，佢值得㗎！甚至冠軍！仲要扮到冇嘢咁宣佈，喺我讀佢個名嗰吓，又莫名其妙覺得好似仲開心過自己攞獎。
 
你好好，你真係好好。
 
影相嘅時候，阿俊拉埋我一齊……我諗，已經相當、相當明顯，當住全校喎，校長都被佢冷落，我何德何能？
 
但我好快樂，喺一片起哄聲之中，我感覺到係我笑得最開心嘅時刻。
 
雖然我一路都懵盛盛咁，但我唔係咁蠢㗎！所有嘅暗示，全部見光，我睇到啦。
 




其實我應該知道。
 
而家，我已經知道。
 
咁我呢？
 
恩姐話我鍾意咗阿俊，唔再係我一開始同佢講嘅好感啦。但，真係咩？到底鍾意應該係咩感覺？開心？想同佢一齊？
 
阿俊鍾意我，我係覺得開心㗎……
 
但我又好似唔太肯定自己想唔想同佢一齊——我唔知呀，點解會仲難過做數！！！
 
我諗，婷婷需要時間諗清楚？佢一直係一個好慢嘅人？所以，我只係畀佢知道，但唔敢要佢答。
 
好彩，佢冇問；因為，我答唔到佢……




 
如果愛情係做功課，有分數、答案，唔考創意、靈感、轉數，咁會簡單好多、清楚好多。
 
阿俊同Winnie都喺我隔籬，食嘢、玩遊戲，對我嚟講，就係最好最好，至少呢一刻，係永遠唔會有分離。
 
*