《家姐話，幫我追女仔》: 三十四
我急急轉身，去返後台，想睇婷婷做咩？喊？笑？點解咁突然？
我見到婷婷對眼紅晒，有水光。
講真，見到女仔喊就真係淆底，而且佢仲要係聽完我唱先喊，到底做咩事啊？
但我一入去後台，其實就代表婷婷要上返台。
「啱啱楊知俊同學嘅演唱，冧唔冧到你呢？」Chris對台下問。
「冧到！」台下嗌。
「睇嚟大家都鍾意啱啱首歌，我都好鍾意。」婷婷帶住哭腔咁講，但聽得出佢盡量平靜。
Chris又拍拍婷婷膊頭。
我喺後台見到婷婷後側背影，就好似平時我坐喺班房裏面望住佢，但比平時遠好多，我根本唔知佢做咩。
「睇嚟呢位同學好感動咁喎，相信大家都係啦——warm嘅感覺唔好停，事不宜遲，我哋落去下一個環節啦……」Chris繼續主持。
我落返台，見到婷婷抿吓嘴，有時又得體咁笑，佢喺度忍緊眼淚，失去咗一半嘅主持功能，變咗Chris好多都係自己講，婷婷有時應兩句；隔咗兩分鐘先回復原狀。
講真，我已經唔想知自己咩成績。
我只想知婷婷做咩喊。
但佢一直喺台上，而我就只能喺台下，真係好撚煎熬！！！就算小息，婷婷都喺禮堂。我返入課室，只覺得毫無靈魂，無論其他人點過嚟起哄我、yo我，我都冇心機。
今日係學校嘅聖誕聯歡，應該好開心㗎嘛，你做咩喊㗎？
我好擔心、緊張。
「婷婷喊，點解？點算？」我WhatsApp家姐，但佢冇上線，冇覆到我。
唉，囉囉攣。唔通係Chris同佢講咗啲嘢？唔通係我唱得唔啱佢心水？但又有咩好喊？
一直等，等到所有比賽唱完，宣佈結果。
係婷婷宣佈嘅獨唱組，佢已經面色自如，重新
「好啦！我哋已經有咗三甲名單啦。相信大家都好期待啦係咪？而家宣佈。」
我望向台，心諗，我有冇獎呢？
「季軍，係唱《自動棄權》嘅6D班陳冠希，睇嚟冇人放棄到佢喎？恭喜！」陳冠希咁靚仔都要棄權？有獎攞就好勁啦。
陳冠希上台，同校長合照，再落返台。
好，如果我真係一個男主角，按道理，我應該會攞到冠軍，媾到女，走上人生顛峰——總唔會有垃圾作者寫到我冇獎攞啩？畀我攞獎！！！我要送個獎畀婷婷。
「亞軍，就係啱啱深情演唱《每天愛你多一些》嘅5A班楊知俊同學，恭喜佢！」婷婷把聲非常興奮，已經冇咗啱啱嘅哀愁。點解呢？女仔變得咁快嘅？
Well，冇冠軍，但都有亞軍個盃，夠做！
我急急腳上台，經過婷婷，見到佢好開心咁望住我；同埋，見到Chris好不屑咁望住我——Chris仲好意思咁樣？可能係佢整喊婷婷㗎！
我對婷婷點頭，接過獎盃，我對住婷婷舉盃，好想話佢聽，我得咗啦！多謝你呀！
影咗一張相之後，我對住攝影師舉咗個暫停嘅手勢。
然後，我行去不遠處，拉婷婷過嚟。
「做咩啊你？影埋相先啦！」婷婷愕然。
我對住婷婷個咪：「有意義嘅相要同我真正想一齊影嘅人影，先有意義。」Sorry校長，冇顧到你感受。
但我意思係，我一直講、唱畀嘅嗰個女仔，就係你呀，施洛婷。
婷婷呆晒，畀我成功拉到台中間。
校長又冇講咩喎，台下不斷起哄，我企中間，婷婷企我隔籬，我將個盃遞畀佢，同我一齊攞住。
「閃！」「Wow！」全部都係起哄聲。
我同婷婷對視一吓，大家都怕怕醜醜……攝影師不耐煩，開始嗌：「3、2、1」，我哋望返鏡頭，好真心咁笑一笑。
返到去cut走校長，perfect。
「我心目中嘅冠軍，係你啊。」婷婷影完，勿勿同我講一句。
「多謝。」我答。
我落返後台，經過Chris，佢話：「挑，亞軍都搞咁多嘢。」
「唔抵得呀？」我得戚咁講。
喂，好叻㗎啦喎，因為我一邊同Chris講嘢，一邊聽到冠軍係6A趙學而，點贏呀？佢唱《最佳位置》冇得輸㗎。
之所以，我今日會咁，係因為我唔想再留喺「最佳位置」，因為嗰個，冇可能係我同婷婷嘅最佳位置。
我唔出嚟，唔勇敢啲，婷婷有可能會畀Chris呢啲姼嘅人呃到㗎，我唔想。
Chris冇應我。我氣沖沖咁問：「婷婷做咩喊？你整？我見你拍佢膊頭。」
「唔關我事啊喂，安慰女仔係咁㗎啦。」Chris無辜地答。
「吓，咁點解咁突然？」
「你等間問佢啦。」Chris欲言又止。
*
「因為感動囉，仲有咩原因，有人為自己而自彈自唱改詞喎，點會唔冧。」我回覆，但細佬睇唔到，冇再上線，應該仲喺禮堂。
*
終於完晒sing con。
我行過啲老師，個個都問：「你同施洛婷一齊咗？」其實佢哋都好八卦的。
「冇啊。」
「咁又唱歌畀人？」
李sir經過，代我答：「只有追緊先會做呢啲嘢。」
我笑，跟大隊返課室。
婷婷終於喺課室，我遞個獎畀佢：「送畀你吖。」
「唔得唔得。」婷婷碌大對眼：「你㗎嘛。」
我講：「唔係因為一個女仔，我唔會上台唱，都唔會有獎㗎。」Well，雖然係李sir推我上去嘅……
婷婷望住我，好柔和，好似所有星星都喺佢對眼裏面——佢又想喊咁，然後笑。
婷婷對眼不斷眨，唔望我，但又會笑笑咁望住個獎。
我終於問：「做咩我唱完之後，你喊啊？」
「好聽。」婷婷唔好意思咁講。
「邊有人咁？」我不解。
「好花心思喎你，我覺得好犀利。」婷婷輕輕帶過。
死啦，我唔知點覆添。
其實我都已經表咗白㗎啦算係，只係冇問婷婷嘅意願。
我都唔諗住問。
「嗰個女仔，一定好感動㗎啫。」婷婷輕微地眼泛淚光，笑住同我講。
我攞咗張紙巾出嚟，遞畀婷婷：「睇得出。」
之後，我哋冇再講過呢件事，開始快樂咁過聖誕聯歡，食嘢時，我攞出電話睇到家姐嘅WhatsApp——等我仲擔心咗咁耐添。
希望婷婷真係開心啦！