《家姐話，幫我追女仔》: 三十一
落到台，沿路不斷有人講「好靚仔呀！」、「溝死女啦，點夠你玩？」、「型到爆呀woohoo！」
慢慢，由台上好撚震，變成得返啲餘震，嗰一種僵硬嘅感覺，真係未曾消退。
郭靖攞住我支水，遞過嚟：「大佬飲啖水先。」
「點？」我即刻問。
講真，只要唱得好、入到決賽，你叫我廿四小時開住震動模式都得——唯有咁樣，婷婷先會聽到我。
「冇得頂啦屌，好聽都算，仲要自彈自唱！邊個夠你揮？」郭靖一邊講，一邊檢查佢部結他。
「希望入到決賽啦……」我話。
我個心一直都好chur，落到台之後，都冇點緩解到緊張。
原來人嘅腦係咁奇怪，我一邊幻想自己入唔到決賽，最後將一切雄心壯志收喺心底；一邊幻想入到決賽，婷婷聽到之後不斷被起哄，唔知點解又無啦啦有札花，我喺度表白……
直到初賽完，我仲諗緊。
我連同婷婷生嘅BB都改埋名，一仔一女。
初賽司儀用冷冰冰嘅語氣宣佈結果——可能佢都已經攰，話晒都搞成幾個鐘；之但係我越嚟越精神。
「第一位，6D陳冠希。第二位，4B向海嵐。第三位，6C張敏。」
喂，大佬，咁冇氣氛嘅讀得。
「第四位，5D黃秋生。第五位，6A趙學而。」
你冇氣氛，我自己有，得返最後一個名額咋——
「第六位，啫係最後一位入到決賽嘅同學，係——係邊位呢？」
屌你。
「就係——中五嘅。」
快撚啲講得唔撚得？我畀你搞到更加緊張。
「男仔嚟嘅。」
咩料呀，嚟到呢度先搞氣氛？屌屌屌屌屌，唉，不過好彩，我係中五、又有棍。
「5A班，楊知俊！」
屌！正！Yeah！！！！！！！！！！！！
我得咗啦！！！！！！
OK，其實我表現得好冷靜，始終只係入咗決賽咋嘛，唔代表咩——但係！婷婷就可以聽到我唱啦！
「Wow！都話你得。」郭靖同其他同學都行埋嚟恭喜我。
「繼續練，我要練得狼過舊時！」我大聲叫嗌。
呢種感覺，真係好撚正。原來，想做一件事，認真做，最後達到目的、或者一直向緊前，係咁正。
多謝婷婷，多謝——自己。
我只同咗家姐講，冇同婷婷講，反正佢最後會知。
家姐話：「哇，好叻喎，歌神。」雖然聽落有少少潤我，但佢又真係叫我唱一次佢聽，然後讚好聽。
然後，家姐又叫我齋彈一次半首，佢拍低咗一條片，話細佬難得咁叻喎。
「恩姐！阿俊原來參加咗singcon，但我冇去到睇……」19:30
「唔緊要啦，佢都入到決賽啦。」19:45
「佢竟然識彈結他？」19:46
「學得好努力㗎，都算係咁啦。」19:47
「我想聽～～～～～」19:48
「三十秒限定，純音樂。扮唔知啦。」20:15
人總有好多美好幻想，我冇擔心咁多，淨係喺度FF婷婷到時聽到，會好陶醉。
第二日，返到學校，喺課室坐定定，如常擺咗包檸檬茶入婷婷櫃桶。
好快，就見到婷婷——同Chris一齊行入嚟。
一日嘅美好心情被破壞晒，佢哋仲要有傾、有講、有笑，有冇搞錯？
「恭喜你喎，」Chris同我打招呼先：「入到決賽，幾好吖，不過唔知最後有冇獎啦。」
「收風咁快。」我不屑咁笑一笑，關你咩事？
「係呀，我哋決賽司儀嚟，咪又係搞手，當然快知。」Chris答。
Well，其實喺禮堂同睇班group都知啦。
婷婷坐低之後，擰轉身：「你做咩唔同我講你會上台呀？早知唔去補習啦，我都想聽你唱。」
佢對眼好似無辜嘅狗仔，好可愛，好似有啲嬲，但係又好開心咁。
「咁所以我就努力咁唱入決賽，到時你咪聽到囉！」我答。
「好彩你入到決賽——吖唔係！實力取勝。所以我就有得聽啦。」婷婷傻更更咁講：「如果唔係，錯過咗真係好大損失，我都冇聽過你唱歌嘅。」
Chris插嘴：「校歌你都冇聽過咩，走晒音咁。」
唔知呢句嘢有咩好笑，但婷婷就笑：「低能，校歌點同？」
「咪都係歌！我都識彈校歌出嚟添——楊知俊，使唔使我教你？」Chris不以為然。
「唔使啦，做好你嘅司儀先啦。」我睥一睥佢，低能仔。
之後，婷婷竟然同Chris傾一啲好無聊嘅嘢，我聽到啲咩校歌、校長、口形、操場、好曬……仲要傾得好開心。
唉，如果係之前，呢啲嘢，會係我同你傾㗎。
原來，到目前為止，我有過嘅澎湃嘅心理，都係得我自己知，而你感受唔到。
希望，有一日，你會感受到。
Chris去洗手間。婷婷坐咗喺佢個位度，同我講：「好勁呀你真係，我就唔會夠膽企上去啦。」
「我內心有嘢支撐我，畀勇氣我。」我答。
「係咩？」婷婷問。
係你。
「希望入決賽囉，而家唔玩，幾時玩？」希望你會聽到。
「咁你加油，到時我會喺台下嗌你個名㗎！第一次聽你唱歌添，好好期待啊。」婷婷笑。
「放心，唔會令你失望。」我信誓旦旦。
你唔會令我失望，彈得好好啊你。
嗰一日我嘅所有表演、表現，全部都只係屬於你一個。
希望你鍾意。