《家姐話，幫我追女仔》: 三十

我每日都練。放學之後，我會跟郭靖返屋企，跟佢學彈結他——頂，學睇譜都用咗我好多時間。終於叫做知道手指要擺邊、掃邊嘅時候，我竟然已經覺得好勁……慢慢彈到一句、兩句、三句，去到彈到半首。
 
「半首，夠啦，過到一分三十秒都OK啦，入到決賽先學埋佢。」我講。
 
「好，你而家練熟啲先。」郭靖話。
 
我成日都留喺屋企食飯，留到婷婷問我，點解成日都唔返屋企、要去郭靖度？因為，婷婷見我冇再同佢一齊、聽家姐講書。
 
我答：「做緊啲好重要嘅事！遲啲你就知！」
 




婷婷話：「神神祕祕啦。」
 
其實，雖然睇落唔嗲唔吊，但我一定要入決賽！初賽嗰日，婷婷有其他補習要走先，佢同Chris都只係決賽嘅司儀。所以，我每日喺屋唱、喺屋練彈結他。
 
我開始感覺到專心地去為一件事奮鬥嘅感覺，原來係咁正㗎，好熱血沸騰。
 
去到夜媽媽，我仲彈緊。
 
「你幾時會瞓呀？」家姐忍唔住問：「好大聲噃。」
 




「忍多兩日OK？」我冇同家姐講，如果入到決賽，我只會練得更加狼死。
 
家姐對我舉咗兩秒中指：「好啦，你一定要彈得好好聽，我自己戴耳塞瞓覺。」
 
多謝你呀家姐！
 
雖然你冇幫過我，但多謝你唔強行叫我瞓、唔好再彈，已經好好。
 
終於、終於——嚟到初賽。
 




臨上台之前，喺後台我仲係咁哼啲曲，唔知點解，越嚟越到我出場，我就越嚟越凍，隻手越嚟越多汗。
 
個心呯呯跳，大聲過晒出面唱緊嘅人嘅聲，好似就嚟缺氧咁。
 
屌，淆底呀！！！！！唔想出去呀！！！！！！！！！
 
「接住落嚟係5A班嘅楊知俊，佢為我哋帶嚟嘅歌曲係《每天愛你多一些》！」
 
到我啦。
 
我同自己講，冷靜少少，婷婷又唔喺下面，唔好驚。
 
但係我一行出去，成個人都震震震震，好多較咗震機又有好多message彈緊出嚟咁。
 
同時，都勁多人嗌我個名：




 
「楊知俊！！！」
 
「阿俊加油！」
 
「歌神自彈自唱喎！！！！！」
 
「主席好型！」
 
第一次知我有咁多朋友，同班同學、同過班嘅同學、中文學會啲朋友、足球隊啲波友……
 
喺台上望落去，下面暗暗地，我只見到一個個人頭喺度郁。
 
當我坐低，預備彈結他，又竟然聽到郭靖同Winnie嗌我：
 




「楊知俊！一定要入決賽呀！而家你每天愛邊個一些呀？加油！」
 
相信，只要唔係聾嘅，都會聽到佢哋把聲。我諗，真係太明顯了，識我嘅人都知嗰一個「邊個」，就係婷婷；而唔識我嘅，都跟住一齊起哄。
 
我仲要犯賤抬頭望禮堂走廊啲老師，個個即刻交頭接耳，好八卦咁樣。
 
Well，其實我個身就keep住震，畀佢哋咁講一講、wow一wow，我就更加緊張。
 
「楊知俊，預備好就可以開始㗎啦。」司儀見我settle晒但又唔彈，開始催我。
 
好。
 
我將手指放喺吉他上，開始彈。
 
我努力令自己變得平靜，思考今日上嚟嘅目的。




 
雖然婷婷唔喺台下，但佢一直喺我嘅心裏面，我想同佢講——
 
無求什麼 無尋什麼
突然天地 但求夜深
奔波以後 能望見你 
你可否知道麼
 
其實，每日我返學最開心嘅事，就係見你，或者見到你。每次你對住我笑，無論當時係點樣嘅天氣，都好似𣊬間放晴，如果你出現，從來就冇深秋同寒冬，只有春暖花開。
 
平凡亦可 平淡亦可
自有天地 但求日出
清早到後 能望見你
那已經很好過
 




好鍾意你皺晒眉篤cal嘅樣，鍾意你就算唔識，都會努力去試，真係唔識先至再問我。點解會有人做數都咁可愛呢？你知唔知道自己，喺你最唔擅長嘅領域上嘅表現，都十分十分吸引我呢？
 
我計過最複雜嘅數，並唔係課業上面嘅數字。
 
只想知道，點樣可以令你開心啲，每日都有笑容。我想每一日，都同你分享一切一切，無論係快樂，定係悲傷。
 
當身邊的一切如風 是你令我找到根蒂
不願離開 只願留低
 
雖然，我只係你嘅朋友，或者，只係你嘅好朋友。但我好想同你講，呢個世界得你令我感覺到，我唔止要庸庸碌碌、無無聊聊咁過每一日，我仲可以有自己想做嘅事，即使呢件事會有人睇唔起——追求你；但係，我都會繼續，因為見到你開心，我都會好開心。
 
你同其他人，永遠唔一樣。
 
情是永不枯萎
 
我對你的感情如是，永不枯萎。
 
唱多幾句，就夠鐘，台下老師「叮」咗個鐘，開始有人拍掌，有人嗌我，如同上台嗰時。
 
我成個人嘅身體都好似僵咗咁，我感受唔到自己，隨住越嚟越大聲嘅叫喚，我終於鞠躬，感謝台下……
 
感謝呢個有勇氣嘅自己。
 
感謝呢一刻未聽到嘅婷婷，係佢莫名地闖入我嘅生活、腦海、心，每一分每一秒，乃至啱啱，令我緊張但又平靜。
 
等待結果——喂！其實我覺得唱得幾好聽噃！