《家姐話，幫我追女仔》: 二十九

「冇啊。」我輕輕咁答。
 
Bad end味濃，如果戀愛應該係開心嘅，點解鍾意咗輝之後，我會流咁多眼淚呢？
 
其實唔係冇人approach我㗎，只係，我只想要輝呢個人。
 
真係好奇怪。
 
輝話目送我離開，我行前多幾步，然後打算再轉身，同佢離遠再講多次拜拜；點知，當我回頭望佢，只見到佢嘅背影越行越遠。
 




嗯，其實輝冇做錯任何事，只係，我因為咁而唔開心。
 
返到屋企，我見到細佬喺度播唔同嘅歌——睇嚟係揀緊歌上台唱。青春呀！之前，我喺SingCon嘅台下聽，見到情侶上台拖住手唱《你的名字我的姓氏》，真係覺得好sweet；或者，有人上台一邊唱《我的宣言》、《櫻花樹下》，佢嘅同學就會喺台下起哄，叫另一個嘅人名——大概就係演唱者鍾意嘅人啦。
 
而家先知道，原來呢一份單純嘅勇往直前，係幾咁難得。
 
「點啊，你揀好啦？」我問細佬。
 
「未啊……一係就係啲慘情兵歌，一係就已經就嚟談婚論嫁嗰種一生一世，好似都唔啱我咁。」
 




「咁你繼續揾吓啦，唱得好聽都好重要喎，唔好走音。」
 
細佬終於擰轉頭，望過嚟回答我：「好——」佢望住我對眼：「哇，你做咩事？」
 
「冇事。」咦，我把聲已經好正常，個樣都應該已經回復平時咁㗎啦喎。
 
「對眼好閃喎你，喊完嚟啦一定。」細佬篤定。
 
我冇答。
 




「其實你鍾意佢啲咩呢，成個mk仔咁，你又話鍾意男人又pure又true？我真係唔明。」細佬講。
 
「我都唔明。」係，我笑。
 
「呀輝哥仔實會害死你㗎，冇必要鍾意佢啦。」細佬又繼續望個mon。
 
「好啊。」我答，敷衍、無奈地。
 
有時我知道咩係好、咩係唔好，咩係應該、咩係唔應該，但我個心嘅感情，總係無可救藥地同理智割裂。
 
*
 
繼續播歌，一邊播，家姐都一邊聽。
 
我㩒㩒吓，揾到一首歌，旋律、歌詞都係簡簡單單，但又好代表到我「每日只想見到婷婷」嘅諗法。




 
「張學友喎，識聽。」家姐都哼到幾句。
 
「呢首好唔好？但會唔會太老、太舊？」我擔心冇乜人聽過呢一首歌……
 
「啲老師可能會有共鳴多啲囉，」家姐笑咗出聲：「佢哋啲偶像咪就係四大天王。但我覺得又唔使驚同學唔識嘅，都係聽㗎咋嘛，你唱得清楚啲就得啦。呢首歌係好冧喎。」
 
「係咪㗎？冇問題嘅話，我就揾結他譜㗎啦喎。」我話。
 
郭靖就有學小提琴同結他嘅，我揾完樂譜，就會叫佢教同借結他畀我練㗎啦；郭靖都應承咗，仲話我好勇。
 
「哥仔點解要唱solo？」雖然郭靖知係李sir拱我上去，但都係好驚訝。
 
「既然不能反抗，唯有接受。」我搖搖頭：「到時教我彈啦，我啲手指就靠你調教啦！」
 




「好嘅俊俊。」郭靖屌咗出聲：「終有一日，我可以叫婷婷做阿嫂，然後向佢投訴你性騷擾我。」
 
「我都等緊呢一日。」
 
其實，收到歌唱比賽嘅簡介會通知書之後，我有一吓諗過，不如就唔去啦——我唔上台又點？邊個吹得我漲？
 
但係，下一刻，我又喺度諗，自己口口聲聲話鍾意婷婷，到底我應該點樣可以畀佢感受到更多呢？或者，畀佢認識到更加多面嘅我呢？只係每日對吓佢好，又真係一個可行嘅方法咩？
 
喺呢日復日嘅同婷婷相處，其實我開心，但又有少少少少迷失，唔知道方向係啲點。
 
有一日，我因為Chris同婷婷行得埋，而感到灰心，我問家姐：
 
「明明我都已經對婷婷咁好啦，點解都好似冇用咁？」
 
「唔評論有冇用，但對鍾意嘅人好，唔會係加分項啊；其他人追佢，都會對佢好㗎喎，好只係基本要做到嘅事。如果因為你對佢好，單純因為咁，佢就鍾意你，咁將來人哋對佢好，佢都可以鍾意其他人㗎喎？所以，不如展示更多嘅你自己，吸引佢仲好啦。」家姐諗咗一諗，慢慢咁答。




 
除咗家姐自己嘅愛情，其他嘅嘢，我覺得，佢講咩都好似好有道理咁。
 
我想畀婷婷知道，我都可以好勇敢咁企喺台上自彈自唱，同平時嘅我可以好唔同。
 
我想令婷婷聽到我嘅歌聲、心聲，同埋，聽到我。
 
所以，我先決定真係參加比賽。
 
除咗對婷婷好之外，我希望畀佢知道，楊知俊呢個人本身，都值得佢鍾意㗎！