《家姐話，幫我追女仔》: 二十七
「你都睇到？」我問，咁明顯咩。
「Winnie睇到，然後叫我睇。」郭靖指一指Winnie答。係喎，佢哋坐隔籬，真係好，成日對住。
Winnie話：「好進取吓喎Chris，佢咁好，佢要出手嘅話，你就冇咩希望㗎啦。」
「吓，佢有咩好？」郭靖問。
「外在唔講啦，好細心好體貼喎，又好好人、有耐性。」Winnie少少花痴咁形容。
「你做咩讚到佢咁好？」郭靖應該係呷醋。
「人哋真係好喎，之前秋季旅行，我哋組啲人個個嫌炭重，Chris係隔籬組，但一聽到都幫我哋托過去喎。婷婷都話佢好好人啊。」Winnie回憶。
「唓，我哋都可以㗎，係你唔揾咋嘛。」郭靖講。
「人哋一聽到就幫，佔領先機，你哋冇行㗎啦。講真，邊有女仔唔鍾意Chris嗰類㗎？完美男友喎。」Winnie不斷肯定Chris。
「膚淺。」郭靖不屑。
我默默咁聽住Winnie嘅說話，大概理解Chris喺啲女仔心目中係點樣嘅存在——就係我冇得比……
不過我好奇，就話：「但佢好多女喎，唔覺花心咩。」
Winnie事不關已：「呢層就唔關我事啦，有得睇，冇得食嘅。」
「喂，婷婷你老死喎，唔擔心佢咩？花心喎，追到手都唔會對佢好喎。」我問。
「Chris對佢啲女朋友好好㗎，分手之後，從來冇人講佢壞話，只係讚佢咋喎。咁有咩好擔心呀？人哋口碑咁好，同你呢種未知數唔同，點知你會唔會反轉豬肚唔認人？」Winnie答。
呢個真，雖然Chris真係多女，但分手、拍拖，都冇人試過講佢唔好嘅事，每次都係話Chris好好仔，人又gentleman——點解？明明成日轉女，都有咁好評價？好唔合邏輯喎。
「楊知俊先唔係啲咁嘅人。」郭靖幫我講嘢。
呢個時候，婷婷同Chris已經折返。
我問婷婷：「一齊放學？」
婷婷答：「好啊，不過我要同Chris揾一揾老師先，等我一陣。」
我知，佢哋係今年嘅歌唱比賽司儀，要一齊對稿。
等婷婷落到嚟，我哋三個一齊出校門。佢兩個一直喺度傾自己嘢，我插唔到嘴。
「我哋係咁傾Sing con啲嘢，會唔會悶親你呀？」Chris發現，終於又特登問我。
「唔會呀。」話會嘅話，咁咪會顯得我好上心？
「可能之後放學都成日會係咁㗎啦，除非你唔同婷婷一齊放學啦。」Chris嘅語氣我聽落，似係挑釁囉。
「我OK呀，冇所謂。」我相信我只能咁答。
行行吓，Chris就要行另一邊啦，之後就得返我同婷婷。
尷尬嘅dead air，已經唔再好似以前咁，覺得輕鬆。
「做咩完全唔理我呀？」我問，好似好小家咁。
「幾時？」婷婷反問：「我哋有講嘢啊。」
「上堂嗰時。」
「冇必要冇啦啦揾你啊。」
我聽到之後，定咗兩秒，又真係有啲道理嘅：「咁cool呀你，淨係同Chris傾偈。」但明明以前我哋每堂都有傾偈㗎。
「唔想同啲記性唔好嘅人玩！」其實婷婷嘅語氣係拉長嘅。
「咩記性唔好？」我反問。
婷婷沉默兩秒，突然向我抬頭，直接講：「嗰張紙，係我哋天下太平張紙。」
我load咗一load，終於知佢係講緊所謂未枕嘅、未玩完嘅太平天國：「哦——係喎。」
「冇心裝載。」婷婷輕輕咁講。
「咁小氣嘅你？」我問，明明佢唔係呢種人啊？
「咩小氣啊？」婷婷搖頭。
「話緊你，小氣鬼，咁都記到放學。」我笑，佢個樣好得意，好似小朋友扭計。
「同你呢啲冇心裝載嘅人唔同！」婷婷繼續向前行。
「吓，但你都只係會同我玩，我見你拒絕咗Chris㗎。」見到婷婷咁可愛，我又得戚咁講。
「我都可以同佢玩。」婷婷講。
「真係？」
「係啊。」
「咁我同佢只可以揀一個，你揀邊個？」我問。
冇咩原因，只係突然好想問，我同婷婷一齊停低腳步，
婷婷轉身，馬尾喺後面望我：「問啲咁嘅嘢嘅。」
我點點頭：「係啊。Chris對你好好喎，人又靚仔，又乜都叻。」
「佢真係好好人㗎。」
「但佢好鍾意媾女，可能就係想媾你啊；靚女差你未追過咋！」
婷婷笑：「我冇興趣喎。」
我連續咁講：「難講啊，今日你哋可以一直傾唔理我，聽日就會連同你放學都唔得㗎啦。再遲啲你就會淨係理Chris。」
點知婷婷笑得仲勁：「你先係小氣鬼。」
我哋都係小氣鬼。
「咁你真係唔理我喎。」我話。
「好啦好啦，唔好嬲啦。Chris又唔會做啲咩，個個都話佢好人㗎。」婷婷答。
「啲女仔係咁講囉，但男仔都覺得佢好煩㗎喎。」
「點解？」
「姼。霸佔太多資源。」我一本正經咁講。
「唔抵得呀？」婷婷挑眉咁問。
「佢追其他人，我冇所謂啊，本來就係咁。我唔想你畀佢呃咋。你係我——好朋友嚟㗎嘛。」我答。
「唓，如果我真心鍾意佢，佢又真心鍾意我，就唔係呃啦。」婷婷反駁。
我諗我嗰吓面色一定好難睇，因為一想像婷婷會鍾意其他人，我個心就好難受；而且，婷婷都講得啱嘅。
我齋諗已經講不出聲。
好快我同婷婷要分開行，臨走之前，婷婷同我講咗一句：「揀你呀。」
咩呀？無啦啦揀咩呀？
但婷婷已經轉身，走咗，之後WhatsApp問佢，佢又扯開話題。
之後嘅返學日子，幾乎每日都重複，不過好彩，見佢哋都冇點曖昧嘅。我由感謝李sir仍然將我同婷婷編得咁近，到怨恨佢點解編Chris喺隔籬。
李sir答我：「你追咁耐都仲喺半桶水，唔畀壓力你點得？得Chris睇落有啲競爭力咋。」
「佢兩個越行越埋啦，一齊坐又一齊做MC。」我講。
「冇㗎，你想人哋見到你，你都要企喺台上面。」李sir應。
「得啦，我知我要努力啲讀書。」
「唔係啊，佢哋一齊做Singcon司儀，咁你咪去報Singcon囉！由佢哋介紹你出嚟，都咪話唔威。」李sir話風一轉，做咩突然講SingCon？
「做咩話題轉得咁快……」我呆咗呆。
「我哋班冇人報，人哋班班都有，隔籬班啲班主任寸我。」李sir坦誠。
「哦……」
李sir講：「去報啦，班會主席嘅職責。施洛婷都話敢喺台上唱歌嘅人好有魅力喎。」
我真係醒唔起：「吓，佢幾時講？」
「份司儀稿咁寫。」
「都唔知係咪。」我懷疑。
「Go！冇理由畀Chris霸住個台㗎嘛？」李sir游說。
「我諗吓先。」我猶豫，雖然都就嚟畢業，應該試玩吓，但係都係有啲驚，solo喎。
「啫係OK啦，等間幫你報，記得預備初賽。」李sir快速講。
「吓？諗吓咋喎。」我即刻擺手。
「啫係OK，靠你啦班會主席，靠歌聲征報施洛婷啦。」李sir堅持。
就係咁，兩日之後，我就收到學生會嘅通知，叫我出席歌唱比賽嘅簡介會……