《家姐話，幫我追女仔》: 二十六

我認我係呷醋。
 
如果Chris唔係乞人憎版嘅出木杉，而係好似我隔籬嘅肥仔傑咁，咁我應該會覺得冇乜嘢。
 
啫係呢，其實Chris已經乜都有，樣佢又靚仔，成績又掂，多才又多藝，仲要身邊大把女；如果佢真係有心冧婷婷，真係唔難——男神喎，好少媾唔掂女㗎嘛？
 
我有危機感。
 
而而家，只係啱啱調位，Chris就好似、已經搶走晒原本我同婷婷會一齊經歷嘅事。
 




仲要，佢好似真係想搶咁，而唔係咁啱得咁橋。
 
Lunch time返到嚟，我見到婷婷枱面多咗條繽紛樂；婷婷未入課室，而Chris已經喺佢隔籬坐緊。
 
可能見到我望住婷婷枱面，Chris就同我講：「你係咪想食啊？但我只係買咗兩一包，得兩條咋，我同婷婷一人一條。」
 
「唔想喎，但點解你要買畀婷婷？」我問。
 
「啱啱英文堂講起童年回憶吖嘛，咪買佢嘅童年畀佢回味一吓——我諗你唔會唔知啩？」Chris答，仲寸寸貢咁。
 




「點會？」但其實，我真係唔知婷婷想食。
 
但都由呢刻開始，我知道，Chris想追婷婷，如果唔係點會咁做？又唔係得閒。
 
我沉默兩秒，再講：「唔好搞婷婷啦，你咁多女。」
 
Chris挑眉：「識吓朋友啫，唔使咁㗎喎。買嘢畀佢食，又唔係你尊屬。」
 
「你又知我有？」
 




「唔係盲嘅都見到啦。」
 
即係Chris一直都有望過嚟啦，一直都有望住婷婷啦——又難怪嘅，班花之中，得婷婷佢冇追過咋！
 
呢個時候，婷婷都入咗嚟，見到枱頭條朱古力，驚喜地問咁啱喺枱前嘅我：「你買㗎？你又知嘅？」
 
阿俊又知我鍾意？我又提過咩，定佢咁啱估得中？
 
我望住婷婷呢吓嘅驚喜樣，有啲心痛——因為知道嘅人其實唔係我；只係調咗個位，為佢帶嚟情緒轉變嘅人，原來可以唔係我。
 
「Chris買㗎。」我答。
 
婷婷側一側頭，唔自然咁講：「吓——哦、哦，好。」然後攞出銀包，畀返錢Chris。
 
哎吔，你咁啱企喺我枱前，以為係你買嘅添，等我仲開心咗一吓。但點解Chris又咁好人嘅？明明我哋都唔係太熟。




 
「唔使啦，幾蚊咋。」Chris講。
 
「要嘅，多謝你。」婷婷拒絕。
 
爭人嘢唔太好嘅。
 
哦，其實佢哋都係唔太熟嘅。我買嘢畀婷婷，其實佢都有畀返我，不過係補習費畀多啲家姐，當係幫我補吓我嗰份錢；但至少，唔係佢哋而家好似好疏離咁吖。
 
「真係客氣。」Chris笑住講：「你家教好好喎。」
 
「哈哈。」婷婷唔知點應，就咁樣笑。
 
我喺佢耳邊講：「以後你鍾意咩，我都可以送畀你。」
 




婷婷笑：「做咩啊你？」
 
你今日好奇怪呀？又冇點出聲，一開口就咁。
 
Chris坐喺度見住我哋兩個陰住陰住咁傾偈，就講：「不如坐低先傾啦。」佢都不滿聽唔到我哋吱吱浸啩——咪同之前我聽唔到你哋一樣囉……
 
仲要，Chris聽唔到係一時，我聽唔到將會係成個月呀！
 
婷婷聽到就坐喺位啦。但我哋一坐低，Chris又淨係同婷婷講嘢：「好悶啊而家，有咩做？」
 
「伏喺度休息吓囉。」婷婷答。
 
「不如我哋一齊玩天下太平啦。」Chris提議。
 
「吓——」我喺後面忍唔住細細聲叫咗出嚟，咁多嘢你唔玩，同我撞橋？電話唔好玩咩、覺唔好瞓咩，係都要學我做old-school嘢。




 
「唔要，」婷婷答：「我要做嘢。」
 
叻女！係囉，玩乜喎。
 
然後，婷婷又好似諗起啲咩咁，擰轉身，同我講：「上次張紙我未抌㗎，仲喺度。」
 
我反應唔嚟：「吓，咩紙？」
 
「咁就算啦，冇嘢啦。」然後婷婷又擰返轉頭，繼續做嘢。
 
我每日都夾住喺手冊裏面㗎，諗住你會記得我哋可以繼續玩埋未完嘅天下太平！我以為，你會記得添！
 
竟然我有少少失望。
 




唔知點解，其實我平時冇咁小氣㗎，但而家好似都係有少少失落咁；我原本覺得你一定記得㗎嘛。
 
我又真係醒唔起。
 
Chris都只係望一望我，眼光裏面有種「你憑咩？」嘅感覺。
 
我知道，佢想追婷婷，而佢覺得有壓力了——因為婷婷理我多過理佢。
 
雖然係咁，我仍然知道，只要Chris再發力，日子耐咗不斷做返我做嘅嘢，其實婷婷都會理得佢多啲。
 
而呢一刻，Chris根本冇失望，或者冇表現出嚟，只係望住婷婷做數，有時會同佢講，用某個方法快啲；婷婷都真係專心聽，同表現出崇拜，同有時望住我嘅樣係一樣。
 
放學嗰陣時，Chris又同婷婷一齊擺書，我喺後面望住佢哋、跟住佢哋，突然覺得好攰。
 
鍾意咗班花，而競爭對手係個乜都掂嘅靚仔——如果擺上連登問，可否話我知我有幾多成勝算？
 
而且，上完兩堂中文，婷婷又同Chris傾得埋啲古人嘢；直到放學仲傾得勁開心。
 
Chris知道我喺後面，又得戚咁對住我笑一笑；事關婷婷呢一陣都冇同我講過嘢。
 
突然郭靖拍一拍我膊頭：「濕濟喎！Chris從來冇試過媾唔到女㗎；我今日望向你嗰邊，佢同婷婷傾得好開心。」