《家姐話，幫我追女仔》: 二十五
如常返學。
調咗位總係好唔慣，一入課室就習慣性咁行去我之前個位，行行吓先醒起已經調咗位，又去返而家個位。
我依然，會買一包檸檬茶畀婷婷；不過婷婷話實在飲得太多，所以我都係星期二、四先會買畀佢。
我坐喺位等婷婷返嚟——係！我已經慣咗早早咁起身，再早早咁入課室，攞定啲數學練習出嚟畀婷婷，或者mark返啲重點出嚟。
跟住，我就見到婷婷都入咗嚟啦，佢同我一樣，都行錯咗去原本嗰個座位。
我嘅目光一直喺婷婷身上，當佢發現自己行錯，都抬一抬頭笑自己，然後見到我望住佢。
好似，畀我見到佢出醜咁，所以婷婷唔好意思咁望住我傻笑，然後再慢慢一步步咁行過嚟；向住我嘅方向，面帶笑容咁行過嚟——有冇人明呢種感覺，自己鍾意嘅人對住自己、笑住咁過嚟，只係咁單純嘅一個舉動，都好似好值得不斷回味。
「早晨，行錯咗添！」婷婷講。
「我都係啊。」我答。
婷婷好快就坐低，擰轉身，自然咁接過我嘅檸檬茶同埋練習：「多謝。」
呢個時候，Chris就入咗嚟，坐咗喺婷婷隔籬，同我哋say hi；婷婷由原本望住我，到望住Chris。
Chris坐低，同婷婷講：「我買多咗份三文治呀，一齊食吖？」
「我食咗早餐啦。」事關，我冇再買燒賣魚蛋畀婷婷，佢話屋企人叫佢留喺屋食，健康啲。
「Share半份畀你吖？好少㗎咋。」Chris向婷婷展示厚度：「如果唔係我食唔晒就嘥㗎啦。」再默默咁望住婷婷。
雖然婷婷面有難色，亦都察覺到我嘅目光，所以都望一望我；但係婷婷都係話：
「好啦，少少得啦。」
我喺後面聽住，有少少莫名嘅不忿，不過冇人睇得見，而我都唔知我不忿啲咩。
「你仲有檸檬茶添喎——我知，楊文俊買畀你嘅！」Chris用我聽到嘅聲量提起我，但仍然無視我。
「係啊，你又知嘅？」婷婷好奇。
「我知道見到啊。其實一直都想同你講，檸檬茶冇益㗎，又多糖。」Chris答。
其實Chris係冇講錯嘅，但我忍唔住講：「鍾意咪得囉。」
「鍾意都唔一定好㗎嘛，咁就要揾其他嘢取代。」Chris應完我，同婷婷講：「冷泡茶你啱唔啱啊？而且又無糖。」
「唔啱，婷婷鍾意甜。」我喺後面代婷婷答。
「唔係問緊你啊。」Chris稍稍轉頭望咗我一眼，然後又用眼神問婷婷。
「唔使啦唔該，我鍾意甜嘢。」婷婷望一望我，再答。
YES！感覺好似婷婷撐我咁。
「咁你都飲少啲手頭上嗰包啦。」Chris訕訕。
婷婷望住檸檬茶，又真係冇再好似以前咁飲，而係咬咗三文治先。當然啦，我就冇咩資格講啲咩，但我見到，個心都有少少唔舒服。
婷婷一邊食，一邊做練習；Chris問：「好勤力喎。」
「唔練唔進步。」婷婷答。
「有咩唔識，可以問我啊，我應該都得。」Chris講。
「唔使麻煩你啦，佢唔識嘅問我就得啦，之前一直都係咁。」我向前面講，強調「一直」。
婷婷都點頭，之後冇再理過我哋。
Chris成個身擰去右邊，只對我講：「你得唔得㗎？」啫係質疑我咁話啦喎？
我數學係第二，Chris係第一，每次，都係差少少、少少，好偶然先會有一次高分過佢。
「OK㗎我都。」我唔執輸。
Chris係乞人憎版嘅出木杉，佢靚仔、聰明、成績好，乜都識啲咁，好多人都葡萄佢；但點解乞人憎呢？係佢身邊實在太多女，真係幾乎大部分女仔都鍾意過佢咁濟，佢亦都有同過其他班嘅班花拍拖，係得自己班嘅婷婷冇，或者未。
我唔會畀呢件事發生。
「好好好，但而家婷婷問我會方便啲囉。」Chris講。
「大家咁近，有咩唔方便？」我反駁。
「後面點及隔籬呀，我同佢講嘢細聲少少，你都已經聽唔到啦。」Chris講。
下一秒，佢就擰返過去，喺婷婷耳邊講咗啲嘢，之後婷婷就喺度笑，再細細聲答佢兩句。
Chris向我嘅方向斜視，好似喺度講：「見到啦？」
頂，好想知佢哋講緊咩。
之後上堂，我成日都見到前面嘅Chris有陣時會同婷婷講吓嘢，婷婷都有畀反應，笑吓、點吓頭、講吓嘢，但我乜都聽唔到；有時，見到Chris指住婷婷本書，再指一指黑板，好似同佢講解緊咁——
之前做呢啲嘢嘅人，一直都係我；而家係Chris Wong條撚樣？你都咁多女埋身啦，可唔可以唔好搶走婷婷？我好似畀你取代咗咁。
我專心唔到，實在睇得太清楚Chris嘅姿勢，同埋婷婷嘅神態。
英文堂又有嗰啲咩二人同隔籬位輪流present，喺我聽緊隔籬肥仔傑讀稿嗰時，其實對眼同對耳都早已飄走，留意前面做緊咩——婷婷好認真咁正眼望住Chris，一邊流暢咁講英文。
「Good！」Chris畀咗個手指公，扮係扱印咁，扱喺婷婷嘅膊頭上面。
快啲放開佢！我都冇試過咁樣對婷婷；但係，我唔可以講出口！
最緊要嘅係，婷婷冇講啲乜，只係由Chris，然後又專心聽Chris嘅feedback……
其實只係咁，但都已經令我，十分不爽……