《家姐話，幫我追女仔》: 十三

婷婷舉一舉起隻手，似係想接過隻羹，但佢再望一望我，只係輕輕咁將塊面哄埋嚟，唇抿到芝麻糊，再到我向下傾隻羹，佢就食晒呢一啖。
 
「唔該。」婷婷舐一舐嘴唇。
 
即使之前已經食咗咁多啖，但而家，依然覺得好甜。
 
唔咩該吖？我應該、應該要多謝婷婷！媽咪呀！佢算係半肯定咗我呢段時間以嚟嘅苦心，係咪？
 
本來以為，唔使食檸檬，就會冇咁緊張，但點知見到而家佢笑，我個心跳得仲快，好似就嚟跳到爆咁。
 


畀你餵嗰個係我，我都盡量等自己唔表現得怕醜，點解你塊面會紅過我呢？
 
「客咩氣？」我反問。
 
我諗，婷婷肯畀我餵，啫係佢都唔抗拒我啦？定係只係出於朋友情誼，先至唔好意思拒絕呢？
 
呢個時候，郭靖同Winnie行返入課室，見到呢一幕，即刻：「嘩！！！」
 
郭靖係出於羨慕；Winnie就應該係出於懷疑同驚訝。
 


「做咩你可以餵婷婷㗎？」Winnie問。
 
婷婷突然間畀人咁樣起哄，即刻緊張，驚其他人都見到咁，就語無倫次咁反問Winnie：「咦你哋——唔係去買、去食甜品咩？」
 
「我阻止咗佢。」Winnie睄一睄郭靖；再望向我：「你未答我問題喎俊哥仔。」
 
「你都可以餵郭靖㗎。」我心情大好，歡快咁講。
 
「呢鋪我撐你呀。」郭靖對住我講，又用發光嘅眼神望住Winnie。
 


Winnie冇理到郭靖，只係狐疑咁望吓我，又望吓郭靖，之後奸一奸笑：
 
「好囉，你陪我買包薯片。」
 
「真嘅？」
 
郭靖驚訝，原因係，從來得佢死纏爛打跟住Winnie，而Winnie從來冇叫過佢陪自己做任何事；所以而家聽到，佢就覺得超級感動，好似苦盡甘來咁！即刻講：「好啊好啊。」
 
雖然我都覺得奇怪，但係都冇理到。
 
婷婷已經冇事，不過都唔想做嘢住，又廢事玩電話啦，佢係好學生；婷婷話想重拾童年回憶喎，所以我就陪佢玩「天下太平」。我哋揾咗張紙，然後就不斷咁寫同畫啦。
 
好耐好耐冇玩啦，不如今日都輕鬆吓啦，難得——嚟M吖嘛？
 
其實玩乜吖，婷婷就算唔用飛機、大砲，都一早攻陷我呢座寂寞的城啦。


 
哎喲，好衰唔衰，我係咁猜贏婷婷——Why？點解今日手氣咁好？平時同家姐猜邊個落街買飯，我就成日都輸？
 
婷婷啲保護罩係咁畀我炸爛，仲要開始攻擊佢啲旗啦。
 
我仲想玩耐少少喎，開過鋪新嘅就冇咁有癮㗎啦；第一次永遠係最好嘅！
 
「會唔會好快玩完㗎？我好黑仔。」婷婷鼓一鼓腮，笑住講。
 
「唔會，一定唔會。」我向佢保證。
 
到下一次，我哋再猜嘅時候，婷婷出咗包，而我特登慢過佢，然後出揼。
 
「我輸咗，你揀啦。」我答。
 


「你慢出喎，好明顯。」婷婷冇我咁好氣，但都開心咁笑。
 
傻仔，知你讓我啦——我都係講咗一句咋嘛，多謝你。
 
「唉，唔小心唔小心。」我擺一擺手。
 
婷婷揀咗加返層保護罩畀自己：「保命要緊！」
 
之後，婷婷嘅手運就好似開掛咁，不斷猜贏我。場上嘅形勢開始發生變化！我哋勢鈞力敵咁，大家都仲係幾完整咁，冇穿冇爛。我望一望低頭認真嘅婷婷，覺得好搞笑，天下太平都玩得咁專心？好可愛。
 
咁靚嘅女將同我對緊壘，希望唔好完啊！
 
好嘅，最後，都係分唔出勝負，猜嚟猜去，你贏一次又我贏一次，張紙已經畀我哋畫到花晒。
 
「分唔到勝負添。」我話，而且，都就嚟要上堂啦。


 
「聽日再繼續囉。」婷婷收埋嗰張面目全非嘅紙，得「天下太平」四隻字係清晰。
 
之後再開多鋪新㗎囉。啱啱吹水，我先知道，原來阿俊同郭靖係由幼稚園識到而家！唔怪得之佢哋咁Friend啦；仲有，恩姐幫我補習係計平咗我少少㗎，我竟然從來都唔知添。
 
「好啊。」你肯，當然好㗎。
 
事關，我哋有吹到水用嚟擾敵，咁擾擾吓都了解多咗佢嘅，譬如，知佢第二鍾意嘅顏色係紫色、唔鍾意但又接受到蔥嘅味道、校裙上嘅藍色係中二VA堂唔小心整上去嘅——呢啲無關痛癢、但都係婷婷呢個人嘅資訊。
 
打鐘，郭靖同Winnie都入返課室啦。
 
佢兩個經過我隔籬嘅走廊時，郭靖用抱歉嘅眼神望住我；而Winnie則用食花生嘅神情對我笑。
 
咩料呀呢兩個人，食包薯片食到咁？
 


放學之後，Winnie趁婷婷去擺書入Locker，走過嚟同我講：
 
「原來你真係鍾意婷婷嘅，我都估到㗎啦，唔怪得你對佢咁好啦。」