《家姐話，幫我追女仔》: 十二

咁我同郭靖返到課室，仲有大概四個字嘅小息時間；婷婷遲多五分鐘先同Winnie一齊入嚟，有傾有講，睇落好好多啦喎。
 
Winnie就坐喺婷婷前面嘅空位，咁郭靖就當然唔執輸，都坐喺我前面啦。
 
都尷㗎，因為，我就當住佢哋呢兩個有得睇、冇得食嘅人，由膠袋攞咗合芝麻糊出嚟：
 
「婷婷，食吓甜品。」
 
「畀我㗎？芝麻糊喎，點解嘅？」
 




「家姐知你唔舒服，叫我買㗎，話你食咗會好啲。」不過講咗呢句，我又後悔啦，咁會唔會好似畀家姐搶咗我嘅功勞囉？喂，話晒錢同力量都係我出㗎喎。
 
「點解恩姐會知嘅？」婷婷關注呢一點。
 
我諗咗一諗，都係如實咁答：
 
「今朝見你唔太舒服吖嘛，唔知可以點，就唯有問身邊最親嘅女人。」為咗婷婷，我竟然要將家姐叫成「最親嘅女人」，感覺都真係怪怪哋。
 
婷婷聽完之後，只係話：「我鍾意芝麻糊。好多謝你。」
 




其實我唔care恩姐點解會知，之所以會問，只係想畀自己緩衝吓——阿俊真係太太太有心啦，好體貼。
 
「趁熱食吖。」我從膠袋攞埋隻羹出嚟。
 
「哇！」
 
Winnie用不懷好意嘅態度嘅眼神望住婷婷，再挑一挑眉望吓我：
 
「你對婷婷咁好嘅，做咩啊？」但佢嘅語氣極其篤定。
 




「喂啊，阿俊本身就對人好好㗎。」準備食嘅婷婷，連忙搶先我一步答呢個問題。
 
「又唔見佢買甜品畀我？我想食合桃露。」Winnie繼續挑住眉笑，Well，我係唔會再畀人chok到我嘅。
 
「使咩我買喎。」我望一望Winnie，再將眼神移去郭靖度。
 
Winnie即刻睥一睥我；但郭靖就順住我、對Winnie講：
 
「係啊，如果你想食，我可以買畀你㗎。」
 
仲喺褲袋攞出銀包，然後準備起身行出班房，再出校門咁款。
 
「唔使唔使，我講笑咋！」Winnie見到咁，就即刻講——可能佢真係唔想郭靖打鐘都返唔到嚟，或者，唔想郭靖為佢做任何事。
 
「嗱，女人話唔要，即係要。我明嘅，好快返！」郭靖壓低把聲，試圖聽落有磁性啲，然後又真係開始行出去。




 
「喂！」Winnie見到咁，即刻企起身，追出去。
 
玩大咗少少少少添，真係唔明佢兩個做乜。
 
婷婷一邊食，一邊講：「佢哋好盞鬼。」
 
「係，一個願打，一個願捱。」係囉，咁咪幾好囉，雖然佢哋真係情願，但表面上又係咁喎。
 
「多謝你。」婷婷又重複。
 
「客咩氣，你係今日嘅病人吖嘛，當然要好好咁對待啦。」我盡量漫不經心咁講。
 
「唔止今日喎可能。」婷婷意思係，佢未嚟完M。
 




「每一日我都可以好好咁對你㗎！」我講完，婷婷尷尷尬尬咁望住我；我再講：「因為我哋係好朋友嚟㗎嘛。」
 
真嘅？以後都係一樣？
 
「嗯嗯。」婷婷慢慢咁點頭。
 
下一秒，佢就話：「不如一切share？我食唔晒。」
 
又係嘅，啱啱先食完飯。女人個甜品胃，唔係個個都咁大嘅！
 
「好啊。」當然好。
 
「得一隻羹，但我用過，你介唔介意？」婷婷小心翼翼咁問。
 
嗱，作為一個男性，通常都係唔會介意食靚女嘅口水尾，而如果呢個靚女係你鍾意嘅人，咁就係求之不得啦——間接錫錫喎！OK，雖然婷婷冇咁諗，我都係講吓等自己開心吓啫。




 
「唔會啊。」然後，我接過婷婷隻羹，就開始食。
 
食咗兩啖，見婷婷冇嘢做，又眼甘甘咁望住我，所以我再潷咗一啖——嚟，要有多啲媾女嘅舉動了。
 
家姐之前提過：「食飯嗰陣喂吓佢囉，你哋又夠熟，唔驚畀佢覺得你狗公嘅，睇佢咩反應都好啦。」
 
「咁佢推開我咪好柒？」
 
「怕咩，你都柒慣。」果然，係親生家姐。
 
於是，呢一刻，我就將匙羹遞去婷婷嘴邊，笑住點一點頭示意佢。
 
其實，我好緊張，個心呯呯咁跳。
 




大佬，啱啱先食完甜嘢，唔想即刻食檸檬啊；何況，我諗起家姐話：
 
「好機會，測試吓佢對你嘅主動有冇反感啊。」
 
我等待緊婷婷嘅反應，突然時間好似過得好慢，每一秒都喺度敲打緊我個心。