《家姐話，幫我追女仔》: 十五

「吓，你話咩話？」我聽到Winnie講咩，但都係反應唔切，下意識咁扮聽唔到。
 
搞咩啊，咁突然穿煲嘅？我只係同咗郭靖講咋喎；平時，就算其他人起哄，我都盡量唔承認唔否認，冇做得好明顯㗎啦喎？
 
「唔使扮啦，郭靖話咗畀我知。」Winnie好似好不屑我啲演技咁。
 
吓——郭靖個衰仔出賣我？
 
我即刻望向郭靖個位，先至見到，原來佢都好忐忑不安咁望住我哋兩個；而我一望過佢，佢就即刻低頭，避開我眼神。
 




既然郭靖都出賣咗我，咁我都冇講啲咩去向Winnie否認，直接行過去問郭靖：
 
「你點解同Winnie講呀？唔怪得完小息嗰陣時你哋兩個咁怪啦——原來係咁。」
 
其實我唔係驚其他人知，我係驚人哋知完，再同返婷婷講咋——雖然，佢先係最應該知嗰個，但我真係唔想咁快畀佢知，尤其是係人哋講佢聽。
 
重要嘅事，應該當面講、又有眼神接觸㗎。
 
「我冇心㗎……」郭靖內疚咁講，下一秒，又突然好嗲：「人哋都唔想㗎，唔好嬲我啦好唔好啊？」佢簡直就係人形嗲嗲emoji。
 




郭靖開始講點解Winnie會知——
 
一出課室，Winnie就拉咗佢去樓梯口、望到校外風景嘅企位；單刀直入咁問佢：
 
「楊知俊係咪鍾意婷婷？」
 
「唔、唔係啊。」
 
原本郭靖真係以為佢係出嚟買薯片嘅，話題突然間咁轉，令佢有啲愕然，仲要係問兄弟嘅秘密？
 




「做咩唔講真話㗎你？」Winnie正身對住郭靖，不滿咁講。
 
「講咗真話啦我已經。」郭靖努力死守。
 
其實郭靖已經算好好義氣啦，如果係其他人嘅事、又撞正Winnie想知，佢實查得清清楚楚、然後主動同Winnie一五一十咁交代㗎喎——知佢籠嘢啦；但係呢，佢一見到Winnie面帶少少無奈嘅樣，內心又有啲不忍，但仍然努力抑壓。
 
「你呃我嘅。」Winnie哀怨咁望住郭靖，「又話永遠都唔對我講大話？」
 
郭靖真係有咁講過，佢以前表白嘅時候，有讀一連串嘅「戀愛宣言」，譬如「我會一直鍾意你」、「唔會覺得其他人好過你」等等；估唔到，Winnie都仲記得。
 
不過，郭靖又唔明點解Winnie咁肯定，所以，佢唔出聲。
 
Winnie見郭靖唔講嘢，又出一招對其他人冇用，但對郭靖嚟講絕對係殺手鐧：
 
「仲諗住你肯講就同你出街添。」




 
其實，Winnie一講完就後悔，事關佢都好肯定個答案係咩啦？使咩多此一舉呢？但係，佢又冇反口嘅打算。
 
「真係？」
 
郭靖即刻冇晒飯氣攻心嘅睏意，成個人都醒晒。
 
要咩朋友？要咩兄弟？兄弟只可以喺你冇女人嘅時候，做你嘅女人；但阿俊日日都忙住追婷婷，根本冇乜空閒發揮佢嘅功能——
 
既然係咁，對唔住都要做一次啦！最多畀俊仔con兩吓啦。
 
「佢係鍾意婷婷。」郭靖誠懇。
 
「我都估到㗎啦。」Winnie話。
 




郭靖黑人問號：你估到又問？又肯同我出街？為咗唔令你冇得反悔，即刻約實你先：
 
「星期六好冇？我再諗去邊。」
 
「好！」婷婷心情大好。
 
郭靖解釋完來龍去脈之後，即刻攬住我：「多得你，多謝你。」
 
其實，郭靖入返課室之後，的確係有啲內疚，話晒係出賣兄弟喎。但係，隔咗好短嘅一陣，佢就覺得開心更多，始終Winnie難約，而兄弟識自己執手尾㗎啦。
 
「畀你害死。」我無語，原本Winnie都未可以咁實牙實齒。
 
「算啦，成就吓我哋啦，偉人！」郭靖沾沾自喜。
 
我行返過去位度，Winnie就話：「有嘢同你講，不過我而家要同婷婷補習，我再WhatsApp你啦。」




 
Winnie用唔太友善嘅眼神望住我；我見到婷婷就嚟入返嚟課室，即刻話：
 
「唔好講畀婷婷聽。」
 
「一定。廢事佢傷心，真心對待嘅朋友竟然對自己有非分之想！」Winnie都見到婷婷。
 
吓——乜原來我鍾意婷婷，係會破壞友誼？噢，如果婷婷鍾意我，咪唔會囉，係一種友情、愛情嘅結合；但如果唔係，見面都會老尷啦。
 
慘。