《家姐話，幫我追女仔》: 八

等我買完早餐——一包印尼撈，再攞住一包檸檬茶行樓梯上班房嘅時候，就喺樓梯嘅轉角位見到婷婷。
 
婷婷向下望，都見到我，佢碌大隻眼：
 
「哇！你做咩咁早嘅？我冇睇錯呀嘛？」
 
我即刻行快兩步，嚟到婷婷身邊，遞包檸檬茶畀佢：
 
「貨真價實嘅楊知俊，為你奉上我嘅早晨檸檬茶服務，祝你有美好嘅一天！」
 




我仲要扮係進貢咁，雙手奉上；婷婷好似好開心，笑笑口咁問：
 
「搞咩啊你，咁好死？」
 
「你話㗎嘛，一齊早啲返嚟做吓嘢囉。」我諗咗諗，吹大多兩句：「我都想考得好㗎，之後唔為意，而家見到大家都咁努力，開始有壓力啦。」
 
鬼咩，呢班成績唔錯㗎，個個都熊心壯志，我已經算係最Hea嗰批嚟。
 
「咁咪好囉。咁何解我又有檸檬茶飲呢？」
 




婷婷同我已經到咗班房，佢將飲筒插入去，趁仲凍，開始飲兩啖；我話：
 
「想你精神啲，廢事做做吓恰眼瞓啦。」
 
其實檸檬茶真係有提神作用咩？又澀澀哋，我就唔太好啦；但婷婷鍾意，當然要投其所好啦。
 
學家姐話齋，等你慣吖嘛。
 
我同婷婷一齊行出班房，開locker攞書——真係第一次！平時，都係佢一早攞咗，然後我再狗衝返學校開locker。
 




原來，同婷婷一齊並肩行，問佢使唔使攞進階練習簿，提佢今日補課要用書，同步打開locker再關上嘅感覺，係咁好。而家又早，並唔多人，好似真係享受緊屬於我哋兩個嘅閒適咁；同平時放學，啲人一窩蜂堆晒喺走廊嘅混亂，完全唔同。
 
「你個冇痴timetable嘅，記唔記得有咩堂㗎？痴SU送嗰張迷你版啦。」
 
婷婷攞完，行過嚟睇我；我慢慢咁鎖返locker：
 
「我唔記得，都有你提㗎嘛。」的確，婷婷成日都提我。
 
「驚你無神神咁記多幾個名，激死恩姐咋！」婷婷面紅紅咁講——家姐每年都會嚟我家長會。
 
「嘻嘻，我就知道你最好！」
 
女人係要𠱁嘅——家姐係咁講，但我唔知點𠱁，家姐就話：
 
「讚佢！盲目讚佢！佢開心時你開心，互惠互利。」




 
婷婷馬尾郁郁吓咁行返班房，之後就攞咗佢啲練習出嚟，同我一齊做。講真，如果可以同婷婷喺學校、着住校服咁拍拖，此生完滿。
 
嗚，我真係好想。
 
郭靖一入班房，見到我同婷婷已經埋首做數，即刻過嚟拍我膊頭：
 
「喂！搞咩今日咁早返到嚟？」
 
是的，而家都只係07：35，對我嚟講，係好撚早。
 
「返嚟做數呀，努力㗎嘛！博盡無悔！」我抬頭，對住郭靖做咗一個質疑嘅表情。
 
郭靖又睄一睄我隔籬嘅婷婷，然後陰陰嘴笑：
 




「扮咩吖你，醉翁之意不在酒。」
 
我同郭靖交換咗一個大家心照不宣嘅眼神，之後，佢就去揾Winnie啦，我就縮返個身入座位。
 
點知，見到婷婷欲言又止咁望住我，最後就淨係講咗一句：
 
「快啲做啦！專心啲。」
 
我都唔夠專心添——到底郭靖啱啱同阿俊講咩呢？我只係聽到「醉翁之意不在酒」，咩意思？
 
搞到我又計慢咗添。
 
做做吓，婷婷就問我一啲佢唔識嘅題目。
 
我都盡量嘗試解釋畀佢聽。教學係一門好玄嘅嘢，教嘅人唔明點解學嘅人會唔識，學嘅人又唔明點解教嘅人可以諗到咁嘅方法，但好神奇地，如果運作得好，大家都會識多咗。




 
好似而家咁，婷婷問我啲三角形嘅數，我答咗佢；望住佢恍然大悟嘅樣，我好有滿足感。
 
真係好想一直都好似而家咁，日日都見到婷婷；同佢打打鬧鬧，上堂落堂咁就一日，不知幾sweet。
 
班主任李sir入到嚟，見我勁是正咁坐喺度寫嘢，就叫我名：
 
「楊知俊，做咩咁早返到學校嘅？」佢可能好驚訝，因為佢成日都要簽我嗰張「遲入課室」記名紙。
 
「早晨嘅陽光呼喚，早啲返嚟畀你點名。」
 
「幾驚你係早早返嚟抄施洛婷啲功課添。」我同李sir都熟，所以佢會咁樣講吓笑。
 
上年，就係佢睇得出我鍾意婷婷，所以今年先編我同佢坐。
 




我去李sir度攞走我張數學卷，佢同我講解完之後，就問：
 
「之前，我見到你同施洛婷一齊放學喎。」上年，我同婷婷完咗中文學會嘅活動，會一齊走。
 
「咁同樣時間走吖嘛。」我不以為然，但其實都有少少緊張。
 
「你怕怕醜醜又幫人拎嘢喎？」李sir斜眼笑住望我。
 
「我對女仔好。」
 
「下年編多啲你同施洛婷坐啦，好冇？」
 
「好！」我老虎蟹都話好㗎，近水樓台吖嘛。
 
「明晒啦。」李sir奸笑，拍我膊頭：「加油呀，阿sir撐你，成功請我食飯。」
 
咦，同對住家姐一樣，我都係屬於花式自爆。
 
好彩李sir冇出賣我，只係有時寸吓我啫：
 
「今日係施洛婷做值日——唔使啦，楊知俊，你出嚟擦黑板，知你最鍾意幫人㗎啦。」
 
「喂，楊知俊，你同施洛婷兩個唔好傾咁多偈，有咩問阿sir，細聲講大聲笑做咩？」
 
「楊知俊！你專心少少，望咩望到入晒神？隔籬好靚女？」
 
都係㗎。
 
總之，我都幾多謝李sir。