《家姐話，幫我追女仔》: 七
就係咁，我就開始咗經常性同婷婷一齊嘅生活。
OK，所謂一齊，其實都只係成日喺學校見，同埋佢成日會WhatsApp問我數。係咁㗎咋。
郭靖知道咗之後，就話：
「好開始啊，佢都叫做肯日日同你傾偈吖……」
郭靖頹一頹；講真，雖然我之前講到郭靖係一個鹹濕仔，但係，其實佢內心係一個幾純情嘅人，由中一開始，佢就鍾意婷婷嘅朋友，Winnie，咁佢以前就表過白㗎啦，但係就畀Winnie拒絕咗；而家，郭靖仲同緊Winnie做所謂嘅朋友，但其實好多時都係郭靖行過去同Winnie吹兩句水，但Winnie就唔多理佢。
但郭靖冇放棄，仲話要同我一齊追女仔；終有一日，我可以拖住婷婷，而佢就可以拖住Winnie。
講真，難啲。
事關我一直唔明郭靖鍾意Winnie啲咩，更加唔明點解婷婷同Winnie咁Friend——婷婷咁温文，而Winnie就咁巴渣，都幾惡死；只係，婷婷又話其實Winnie好好人㗎，只係講嘢難聽咗少少、少少。
睇嚟，郭靖要追到Winnie，真係要過五關斬六將。
「Winnie都會同你傾偈嘅。」我答郭靖。
「嗯、哦、可以嘅——咁都叫傾偈咩，係我講，然後佢應吓我咋嘛。」郭靖委屈咁答。
「可能佢尷尬呢，你之前咁樣表白，佢又未從你鍾意佢嘅呢一個咁鮮明嘅形象走出嚟，對住你咪有啲唔自在囉。」我分析得頭頭是道。
「唉，所以，唔好表白呀，鍾意就鍾意，唔好衰多口。」
郭靖一副悔不當初嘅樣。
其實，郭靖同Winnie一直都好好朋友，都因為係咁相處，郭靖就畀Winnie嘅熱絡性格所吸引，然後又想同佢一齊，所以就同佢表咗白。
當郭靖問完Winnie「可唔可以做我女朋友？」之後，Winnie即刻走夾唔唞，話佢哋只係朋友，根本唔到嗰啲關係——
所以，「唔好表白」就成為咗郭靖嘅愛情哲理；佢話，如果冇表到白，佢同Winnie仲可以好開心咁每日一齊，而唔係好似而家咁。唉，衰衝動囉！有啲嘢，真係好難忍㗎嘛，郭靖歎氣：以為你肯日日同我傾偈，就係鍾意我，點知唔係。
總之，都因為咁，我都決定唔好咁快同婷婷表白，再睇多陣先。
人哋失敗嘅經驗，真係好值得我呢個花生友借鑑。
同婷婷傾多咗偈，當然就開始講啲廢話啦。
婷婷話：「點解你成日都踩點入班房㗎？得一次係早返，好容易遲到。」
是的。
上次見到婷婷喊完嚟嗰次，係我唯一一日早返學，事關家姐較咗鬧鐘，但個人唔喺屋企，大大聲咁嘈醒咗我，仲要我行入隔籬房熄咗個鬧鐘，個人即刻醒晒。我見冇嘢做又忟到爆，所以就快啲返學校算數。
「咁早返嚟都冇嘢做。」我不以為然。
「返嚟食早餐囉，唔好成日唔食啦，對健康唔好。」婷婷講。
其實我又真係冇食早餐嘅習慣，瞓得一秒得一秒啦，食咩早餐喎？但婷婷咁講，我又想撩吓佢：
「做咩啊？好想早啲見到我咩？」
「點會，諗多咗啦你。」婷婷怕怕醜醜咁講：「我都只係想快啲有人陪我一齊操數，冇咁悶咋嘛！」
「晨早流流做數？」我覺得好不可思議。
「個腦Keep住轉，先可以一直快啲，我阿哥都係咁㗎。」婷婷眼都唔眨咁講。
「好Chur……」喂，真係喎。
不過，婷婷講到咁，我都開始早啲起身，早啲到學校。
為咗，早啲見到佢，早啲陪佢。
追一個瘋狂讀書嘅女仔，真係唔易呀。
家姐見我早起身，就驚訝：「楊知俊小朋友，你病咗？」
「冇呀。」我已經換緊校服添。
「係咪要我幫你打電話去校務處請假？」家姐對呢啲事又好接受，即使佢自身係一個好學生。
佢以為我早起，係為咗扮病唔返學。乜家姐咁諗我㗎？
「唔係呀，我想陪婷婷咋，佢話我成日踩點。」
都係嘅，我成日都去唔切locker攞嘢，啲prefect趕我返課室，上堂成日因為冇書而記名。
「哦，明晒，果然愛情嘅力量係強大嘅。」家姐笑吟吟。
「係㗎。」我梳頭，等自己睇落型少少。
「由今日開始，每日買一包檸檬茶畀阿婷飲啦，佢好鍾意。」家姐講。
「OK，每日都買？」
「等佢習慣吓你嘅關心囉，你追緊佢㗎嘛。如果有日你唔返學，佢就會好唔開心㗎啦。」搞咩，家姐咁熟手嘅好似；但又幾有道理喎。
家姐補充：「你而家教佢做數、陪佢傾偈，呢啲都好易產生感情㗎啦。」
「真唔真啊？」我質疑。
我諗起郭靖，佢都成日同Winnie一齊咗，但係都冇結果啊。
「至少畀一個感覺阿婷：你會一直喺佢身邊。」家姐答。
我點頭；又醒起，點解家姐又咁早起身？又唔使六點幾七點就上堂：
「你做咩咁早起？」
「約咗朋友食早餐。」
我望一望個鐘，見到係時候出門口，咁先可以早過婷婷到課室；所以就同家姐講拜拜。
「真係羨慕你哋，好pure好true呀。」家姐同我講，終於正正常常咁同我講加油。
我都好羨慕呀……好想有個人用咁純情嘅方法嚟追我，但係，我已經過咗着校服嘅年紀，係咪冇可能再有咁樣嘅感情呢？
我換衫，落樓，同輝哥食早餐。
就係咁，之後嘅每日，我都會早啲買一包檸檬茶畀婷婷，睇住佢一邊啜住飲，一邊篤cal。
早啲見到婷婷，或者，見到婷婷，就係我每日返學嘅動力！