《家姐話，幫我追女仔》: 四

五、六點，我哋去行果欄，見到好多檔口都喺度嗌：「十蚊三個！好平！又甜又多汁！」
 
啲人來來去去，大嘅發泡膠盒又一個個咁抌喺地上，或者用膠攬裝住佢哋，再攞嚟裝生果。蕉、火龍果就擺喺地賣，荔枝、芒果、提子就攤喺大枱。地下又有好多水跡，成個果欄都由唔同嘅顏色組色。
 
「又幾有Feel喎，不過有啲嘈。」婷婷喺我耳邊講。
 
「有咩Feel？」
 
「嗯……好有煙火氣咁。」
 




「你可以攞嚟寫同屋企人買嘢……仲有咩？唔知啦。」我問。
 
「意象、比喻，可以成段都用生果做象徵。」婷婷認真咁講。
 
婷婷畀家姐荼毒了。但係，認真諗嘢嘅婷婷，比平時更加成熟；個天有啲日落嘅橙紅色，輕輕咁映落婷婷嘅頭髮度，佢好似識發光咁，真係好靚。
 
「哦，生果好食呀。」我答。
 
「咁你買啲畀恩姐食囉，佢咁好人。」
 




婷婷即刻講，仲話我哋平時麻煩得家姐太多啦：Excuse me？我諗婷婷唔知道，每次有曱甴都係我幫家姐打死嘅，外賣都係我幫佢嗌、我幫佢抌——其實係家姐麻煩我多啲！不過家姐真係幾好人嘅，所以我都唔會反駁婷婷。
 
「食完飯先啦。」我點頭。
 
婷婷影低咗好多相，譬如大大座橙山，真係好多咁疊埋一齊，佔咗好多位；又譬如有貓仔喺度玩地下嘅紅色膠袋，專心到唔理好多人行嚟行去。
 
婷婷話：「呢啲景象，令人覺得好舒服啊。可能恩姐真係想我哋出多啲嚟，好過淨係得讀書，咁悶。」再跟手send咗幾張相畀家姐。
 
唔係呀，其實，家姐係想幫我製造機會，一定係咁。
 




多謝家姐間接令婷婷放鬆咗。
 
好快，我哋就去咗食飯。婷婷唔係細食量嘅女仔，但佢仲係好瘦，但個胸都唔細——唔係我特登𥄫㗎，咁啱留意到㗎咋；所以，除咗一人一碗拉麵之外，我哋仲叫咗幾個小食。
 
冇呀，冇特別，我都想有特別……真係只係傾一啲好平常嘅嘢：
 
「就中六啦，我唔想畢業。」婷婷一邊食住雞軟骨咁講。
 
「咁喺走之前建立多啲回憶囉。」
 
「但係畢咗業，我哋班就散晒㗎啦，冇得再一齊。我真係好鍾意我哋班啲同學。」
 
「咁呀——約多啲班飯囉！我約！」順帶一提，我係班會主席。
 
「佢哋唔出嚟咁點？」婷婷笑，又問我。




 
「咁我哋同佢哋對住Google Classroom嚟食飯囉，個cam可以對住邊爐，引佢哋蒲頭出嚟食！」
 
「掂喎。」
 
「使乜講。」
 
「你A1會擺咩啊？我想入C大中文系，仲同啲朋友約好一齊入C大㗎，差未知你咋？」
 
我原本未諗好㗎，話晒都係中五咋嘛，又未排Jupas，好難講得咁死、話想揀咩科邊間；但係畀婷婷問一問，我突然之間諗起，畢業之後，就冇得日日見佢啦——而我唔想。
 
「C大，未諗好科。」我就咁答。
 
「好耶！咁我哋成班朋友都可以一齊入同一間U咯！」
 




婷婷好似好憧憬咁。其實佢口中嘅「成班朋友」，我都係唔熟㗎，同班但接觸唔多，我只係同婷婷熟。
 
我喺度諗，如果最後我入唔到C大，但婷婷同佢嘅朋友都入到，咁佢仲唔會因為我而唔開心呢？定係，就咁Let it go？
 
「喂，做咩停晒口？」婷婷叫一叫我。
 
「冇啊，我都希望我哋可以一齊入到咋。」我更希望可以好似而家咁，成日見到你。
 
「咁一定要一齊加油啦，我真係想同你一齊讀書㗎，都唔知點解，可能真係慣咗對住你，覺得好安心。」
 
婷婷好似意有所指；我唯有係寸寸哋咁講：
 
「係？咁你就要加油追吓我啦。」
 
當然係我要追吓婷婷先啱。喺我眼中，婷婷係一個好簡單嘅人，讀好書、做好嘢，就係佢嘅目標；呢兩年，因為想更加靠近婷婷，所以我都比以前畀心機咗。




 
家姐有次見到我啲測驗，都O晒嘴：
 
「進步咗喎好似。」
 
「係㗎。」
 
「搞咩，唔似你喎，突然咁上進？」家姐依然好不解，大概就係由嗰時開始，隱隱約約感覺到我鍾意婷婷，或者有鍾意嘅人？
 
「大個仔啦嘛我。」
 
可能我真係反常，家姐竟然話：「神神化化。」
 
婷婷又講：「入到大學，我就終於可以拍拖啦！」婷婷又講，用一個充滿期待嘅眼神咁食嘢。
 




「點解？入唔到就唔拍？」咁拜托你一定要入到……
 
「屋企人驚我畀男仔呃啊，所以唔畀我咁早拍拖，大學就可以啦。」
 
「咁咪好，你要小心保護自己。」
 
「唔會嘅，我諗我鍾意得嘅，都係好人，唔會呃我㗎。」婷婷笑一笑。
 
呢個諗法太危險啦，世界太多鹹濕仔同衰人，點知佢哋其實係點呢？
 
我嘗試破壞婷婷嘅幻想：「你身邊得我唔會呃你㗎咋。」
 
我唯一隱暪你嘅事，就係鍾意你。