《家姐話，幫我追女仔》: 三

星期六，我真係同咗婷婷出街；咁其實所謂出街，都係食個飯周圍行囉……
 
家姐Send咗一啲地方畀婷婷，叫佢跟住行，跟住感受喎——家姐又鳩噏，我就真係唔明，作幾行字都要搞咁多嘢，唔使感受啦，留喺屋企睇多幾本書咪仲好。
 
我問家姐點解要辛苦婷婷周圍行；佢話：
 
「或者，寫嘢的確係唔使咁麻煩，但媾女要。」
 
佢打量吓我，又講：「着靚啲啦。行完帶人食個甜品，唔好行一陣就返嚟呀。」
 




家姐叫我好好照顧婷婷，慢慢行，唔好咁早返。
 
我又聽家姐講嘅，突登換咗我最鍾意嘅Tee，加一件麻質外套，都算係咁啦，婷婷都睇慣我頹㗎啦其實。
 
見到婷婷，佢比平時返學、放學就嚟我度嘅校服look更加活潑。佢上身着住一件白Tee，下身襯藍色碎花裙，冇再扎馬尾，頭髮一直落到腰。有、仙、氣！真係想同佢講：Hi女學——
 
「楊知俊！」婷婷同我打招呼，之後我哋就一齊行。
 
下晝三點，婷婷話：「不如去食個Tea先，而家好曬，而且我都見餓。」
 




緊係好啦，喺街度行點專心望到婷婷喎？行咩啊，家姐根本只係想我唔再留喺屋企，佢想一個人霸晒成間屋。
 
婷婷帶我去一間冰室，番茄主題，我哋就開始食。
 
食食吓，婷婷突然問我：「你係咪有鍾意嘅人呀？」
 
「吓……做咩咁問嘅？」
 
今次係我第一次喺讀書環境以外嘅地方見到婷婷，我哋平時都冇乜講過私人嘢，佢突然之間咁問，老實講真係有啲嚇親我。
 




「聽恩姐講，你有喎。」
 
「佢仲講咗啲咩？」
 
仆街，家姐又話幫我守秘密？轉個頭出賣我？
 
「冇啦，佢淨係話你都大個仔，有鍾意嘅人囉。係呢，我識唔識呢個人㗎？」婷婷見我突然大聲咗咁多，好好奇咁問。
 
「都……算識嘅。」
 
死啦，死啦，咩事啊而家？我唔想咁樣爆自己煲喎。
 
「係邊個？講唔講得㗎？」
 
婷婷睇落真係好想知。但你知道咗嘅話，仲可唔可以同我開心咁食下午茶㗎？以後我哋仲可唔可以有傾有講呢？恐怕——未必可以好似而家咁啦。




 
「唔話你知，等你心思思！」
 
我講笑咁帶過咗，婷婷都禮貌咁冇再追問落去；到我問：「咁你呢？」
 
「我都唔話你知啫！咁——你鍾意咩類型？」
 
「頭髮長長，心哋善良㗎囉……」我望住婷婷散落嚟嘅頭髮。
 
「我哋學校差唔多全部女仔都長頭髮㗎喎！」
 
佢笑一笑，話覺得我講緊廢話。
 
「咁總有啲人特別啲嘅。」
 




我都對婷婷笑一笑。呢個無可比擬嘅人，咪就係你囉——但唔通我真係咁講出口咩。
 
「哦。」婷婷望一望我，又繼續食嘢。
 
尷咗，不過都正常嘅。
 
好快就食完。之後，我就開始陪婷婷行街，行商場歎冷氣，都行吓出面啲街，隔籬有唔同嘅舖、馬路、樹、花、人，上面個天有雲……我問婷婷：
 
「你感唔感受到啲咩？」
 
「感受唔到，但只要唔係留喺屋企温書，就點都好啦。」佢又幾坦白。
 
「都係。」講咗㗎啦，家姐真係純屬老點婷婷，只係間接為我製造機會咋嘛。
 
「又唔係功課，當玩咁行，就好似有趣好多啦。我都冇幾可咁周圍同人行，你算例外啦，唔計女仔嘅話。」




 
婷婷又真係冇咩男仔Friend，雖然都多人撩佢講嘢，但係佢因為唔太識點接人哋嘅說話，所以都冇太理佢哋；佢對住女仔又反而輕鬆啲，感覺親密啲。
 
「咁我咪好好彩？」
 
我真係例外嚟嘅，係佢唯數不多熟絡嘅男仔；我都覺得開心㗎。
 
「都OK㗎。」婷婷挑一挑眉。