《家姐話，幫我追女仔》: 五

「我知啊，所以先會同你做朋友咋，因為你好好人，真心對朋友。」婷婷答。
 
嗯？我係咪收咗一張好人卡？唔好啦，男人不壞女人不愛，唔好話我好人啦，我好壞㗎！可以一次過食到兩支煙。
 
不過我知婷婷可能冇諗咁多，所以我都冇講啲咩：「多謝你。」
 
「快啲食啦，啲麵浸到淋晒啦！」
 
原本，我約婷婷食甜品——學家姐話齋，食完飯再食甜品，成個心都會好甜；但婷婷話，佢已經出咗嚟成日，迮住咗好多補習功課未做，所以要返屋企啦。
 




咁我同婷婷一齊去返果欄買咗啲生果之後，就送咗佢返屋，話返學再見。
 
快樂嘅時光過得真係快，又係時候返屋企啦。算啦，不過我又真係仲有好多功課未做嘅，快啲返去打個機先，再做埋佢。
 
行多幾步，我就返到屋企，見到客廳熄晒燈、冇人，但家姐閂咗房門，我就敲門：
 
「家姐，我見完婷婷啦，買咗生果返嚟，出嚟食吖。」
 
靜咗一靜，家姐終於答：「你又咁早返到嚟嘅。」
 




「我哋早食飯吖嘛，佢又唔想咁夜返，聽日要去補數。」
 
又靚咗幾秒，家姐終於開門，裏面竟然仲有個男仔——或者，係男人啦，點睇都成年㗎啦。
 
個男仔好熱情咁同我Say hi：「係咪細佬呀？我係你家姐嘅朋友，叫我做輝哥就得。」
 
閘住，咩細佬呀？我只係家姐嘅細佬，但又關你咩事呢？咪喺度認親認戚啦。
 
「朋友？」我擘大眼望一望家姐。
 




家姐抿咗吓嘴，尷尷尬尬咁講：「係嘅，係朋友。」
 
咁我就覺得佢哋啲反應好奇怪，唔知點解；但都唔打攪佢哋咁多啦，始終唔方便，諗住等個男人走咗之後再問家姐，就轉身去廚房。
 
我突然醒起，想問家姐食唔食得晒咁多，所以我又擰返轉面對佢哋。
 
然後，我見到呢個輝哥揸家姐屎忽；家姐側咗身對住佢，睇唔到我，但輝哥就對住我笑一笑，奸奸哋，好似喺度同我講：「你家姐，而家係我嘅。」挑，我又唔羨慕。
 
拍緊拖吓話？同呢個男人？同呢個應該係鹹濕仔嘅男人？
 
我突然覺得個心好唔舒服。
 
利申，我真係唔係鍾意家姐。只係，我覺得突然有個人出現，然後就好似搶個我家姐咁，啫係我覺得，家姐應該永遠都係屋企㗎嘛——雖然我知道唔係，但做細佬嘅真係好唔慣。
 
何況，我覺得個男仔，同家姐唔襯囉，一嚟就摸身摸勢，但又話係朋友——你揸朋友屎忽㗎咩？




 
我就唔會摸郭靖碌鳩囉，八月十五都唔會，完全冇興趣。
 
「家姐，我哋兩個食唔食得晒㗎？」
 
我嗌一嗌家姐，特別強調「兩個」，然後試圖不着痕跡咁睥一睥阿輝哥；輝哥只係撥吓啲頭髮，冇咩反應。
 
「應該OK啊。」家姐聽到我嗌佢，嚇一嚇。
 
我再問：「輝哥呀，咁我就唔預你嗰份啦。」
 
呢一刻開始，楊家已經進入高度戒備！呢個輝哥，我就覺得絕對唔係咩好人。
 
「好呀，我都就嚟走啦，你去切先啦。」
 




輝哥咁同我講，好似點緊我做嘢咁，我即刻黑面，真係覺得好不忿——你到底係邊個呀？
 
但佢冇理到我，只係低頭喺我家姐耳邊講咗啲嘢，然後家姐紅都面晒咁點頭。之後，佢哋入房攞返輝哥個袋，家姐喺門口送佢走。
 
「拜拜啦細佬，下次再見。」輝哥講。
 
「拜拜。」畀面家姐咋，如果唔係，我實會講：「咪撚再見！」
 
真係好奇怪，我莫名其妙咁唔鍾意呢個輝哥，覺得佢唔係咩好嘢——直覺囉，唔需要原因。
 
輝哥走咗之後，我就問家姐：「佢係邊個嚟㗎？第一次見你帶男人返屋企喎。」