《家姐話，幫我追女仔》: 二

 
家姐就開始笑，笑咗好耐，見佢想忍㗎，但最後放棄咗，真係唔知佢笑乜；下一秒，我就知道啦。因為，家姐話：
 
「佢話，好鍾意嚟你度，聽我教書。」
 
「吓……咁關我咩事？」
 
「呢度你屋企嚟㗎嘛，當然關你事！仲唔畀我Chok到你？」
 
家姐一副理直氣壯嘅樣，仲望住我奸笑，開啟食花生mode；我就笑唔出：




 
「仆你個街！」
 
頂咩，原來係假嘅，等我仲爆自己大鑊；原來，不過令我更加失落嘅係，婷婷冇鍾意我——都係嘅，其實，人哋無啦啦點解會鍾意我啊——諗到呢一點，更頹。
 
都令我更加嬲家姐，咁都畀佢玩咗我。我又講咗真心話，又知婷婷根本唔鍾意我，雙重打擊？
 
「冇嘢喎，你都大個啦，鍾意人有咩問題？」家姐見我睥住佢，又點點頭。
 
「你咁樣陰鳩Me㗎，垃圾。」我不忿。




 
「我幫你追阿婷啦。」
 
「吓？真？」
 
「係呀，廢事你唔專心讀書，成日掛住𥄫人。」
 
家姐一副信心滿滿咁嘅樣；佢講咗好多我望婷婷嘅時候，原來佢都睇到，有啲𤓓
 
「你？得唔得㗎？」




 
我質疑。講真，家姐真係唔係人哋睇到嘅咁Out-going，佢其實係一個好Cool嘅人，永遠都同人疏離，總係唔夠親近；升咗大學之後，除咗必要嘅社交，佢話都冇識到新朋友，平時都好Enjoy自己一個人食飯。佢身邊根本冇男人，點識愛情呀？可能有嘅，但其實，我從來唔知家姐啲感情狀況。
 
「Sor，我揸過嘅波，多過晒你𥄫過嘅女，我應該比你了解更阿婷噃。」
 
如果郭靖聽到家姐其實係咁寸嘴，佢一定唔會再話佢正。但畀家姐咁樣寸一寸，我又覺得佢講得幾啱喎。雖然佢冇仔，但係，佢始終都係女仔吖，身邊又多女性朋友，點都明多過我嘅。
 
「好，你點幫？有冇條件㗎？」
 
我係真心鍾意婷婷㗎，所以，如果家姐真係幫到我，佢要我做咩都得。
 
「我諗諗先，再講。」
 
之後，家姐又入返房。佢每日都係咁，少出街，成日喺屋對住電話、電腦，個人就嚟生菇。
 




我突然覺得，家姐似係純粹為咗套我鍾意婷婷嘅事，先同我講咁多。
 
「喂，家姐！你唔好同婷婷講喎！」
 
我隔住家姐嘅房門，大聲咁嗌；萬一真係畀婷婷知道咗，咁就大鑊啦，我唔想連見面都尷尬，甚至減少見面。
 
「得啦，阿婷都唔會想知。」家姐咁答我。
 
可惡。畀家姐套料成功，又畀佢寸，我冇得到但又好似失去咗好多咁。
 
結果，第二日返學，坐喺婷婷隔籬，我都好唔自在咁，總係記起琴日家姐嘅說話，專心唔到。
 
最後，上上吓堂，婷婷拍我膊頭，再幫我揭書：「做咩呀你？喺度發吽哣？」
 
「冇啊……呢堂悶啫。」




 
「係咩？不嬲都悶㗎啦。」
 
婷婷覺得我好奇怪咁，用懷疑嘅目光望住我，但下一刻又繼續聽書。
 
突然，我覺得好灰心，其實婷婷點會鍾意我啊？我都感覺唔太到，佢對我好咩？但係，佢咁好人，對個個都唔差㗎喎。佢咁靚女，收獲咁多善意，所以，佢睇到嘅世界都係友善啲，自然對個個都咁好啦。
 
一張不需要化妝修飾的臉，所看見的世界卻都是被潤飾的。
 
其實，本來，我都冇奢求婷婷會鍾意我——當然如果會就最好啦，但都唔敢FF太多。但係，畀家姐講一講，我突然覺得話唔定真係有希望呢？
 
落堂，我突然醒起家姐叫我畀返婷婷篇文佢。
 
婷婷畀家姐教中文、通識、文學；我將家姐改完嘅文畀婷婷睇，佢睇完之後，都幾沾沾自喜咁話：
 




「高分喎今次！」
 
「你應得嘅。」我答。
 
「你家姐寫住話，差少少會更好，就係描寫街景嘅部分太粗略喎……」
 
「咁你要去睇多啲唔同嘅街啦！山路又得，果欄又得，普普通通一條街都得啫。」我就咁答佢，我都唔想婷婷成日都只係讀書，好大壓力呀。
 
「睇街咁悶。」婷婷皺眉。
 
我嘗試鼓起勇氣：「我陪你行囉？」
 
講真，除咗喺學校同屋企，我都冇點同婷婷相處，二人獨處更加係冇；呢次當係一次機會啦！
 
「好喎。」




 
婷婷突然碌一碌大眼，咁就應承咗；我都有啲驚喜，其實我只係求其講吓，竟然佢肯，咁就最好不過。
 
嗱，雖然我鍾意婷婷，暗戀人又唔敢講出聲，但其實我唔係所謂嘅毒撚，我只係怕醜咋；所以，如果可以又有機會，我都會同自己製造更多機會！
 
「你係咪會同阿婷出街？佢WhatsApp咗我。」
 
返到屋企之後，家姐咁問我。婷婷真係快手，咁都同家姐講定先；我話：
 
「我會啊。」
 
「叻。掂。」家姐滿意咁講。
 
「咁你呢，幾時有仔？」
 
輪到我八卦啦。大學用Zoom上堂，睇怕都好難識到人㗎喎，家姐用頹look嚟開cam，有咩可能識到仔？
 
「關你咩事，咁八卦。」
 
但家姐唔睬我，擺一擺手就走——我就知道佢真係識唔到人啦，如果唔係就唔係呢啲閪反應，而係同我曬命。