《家姐話，幫我追女仔》: 一
介紹吓自己先，我叫楊知俊——唔好問「邊撚度俊？」我都想知呀；今年讀緊中五。
上年開始，我鍾意咗同我同班嘅女仔，佢叫施洛婷。雖然我唔係咁膚淺嘅……但係，由我見到婷婷嘅第一眼，已經覺得佢好靚。
婷婷好Pure好True，白色嘅校裙根本就係為咗佢而設計，平時行路，長長嘅馬尾會輕輕咁搖擺，啲頭髮又黑又長又直。佢仲要好Nice，成日都好好笑容，笑起上嚟仲見到好齊嘅上排牙。
上年，我同婷婷都報咗中文學會做幹事，就係咁，我哋就見多咗、講多咗嘢，我由「覺得佢靚」，變成「鍾意咗佢」。不外乎係見到佢就好開心，見唔到佢就好想見到佢。
講開又講，點解上年我會去中文學會做幹事呢？係因為家姐，唉！
家姐係前年嘅主席，你知㗎啦，中文學會呢個名聽落咁悶，活動又唔會Fun，點會多人報、何況仲要係做幹事？所以，家姐就算唔再玩，都畀咗一百蚊我，叫我做幹事塞個名，等個學會可以正常咁搞。
而婷婷點解做，係因為佢由中一開始已經入中文學會，佢係真心鍾意嘅。
所以，當佢中三嗰年，聽到家姐揾佢做幹事嘅時候，就即刻應承，一做做到而家，做埋主席。
就係咁囉……講起，我都要多謝吓我家姐嘅，唔係佢摟我Join，我都同唔到婷婷熟，其他男仔不知幾葡萄我，可以同婷婷有講有笑，而唔係傾兩句就停。
唔止，佢哋仲好葡萄我有個靚女家姐。
天真！
家姐叫楊知恩，個個都好親切咁叫佢做「恩恩」，佢都會好禮貌咁應。家姐大我兩年，今年我中五，佢已經Year1。
我哋都相處得幾好㗎，不過大大吓，家姐已經冇以前咁錫我囉。Feel到㗎，細個嗰時，佢會陪我玩BS、爆旋陀螺，而家？各有各玩電話，有嘢講先講。以前，如果家姐喺學校啲嘢食，都會帶返嚟送畀我，而家佢會自己食咗去。
都啱嘅，大大吓就係咁㗎啦，唔通仲好似細個咁糖黐豆咩？
我啲同學都見過晒家姐，佢哋話家姐好靚喎，我又唔覺。
家姐會成日上台做吓宣佈，有時代表班攞守時獎、清潔獎，或者學校會頒吓證書畀佢咁。每一次，家姐個名畀人讀出嚟嘅時候，企喺我附近嘅人一定會話：
「喂喂，你家姐喎！」
其中一個，係婷婷。
婷婷好崇拜我家姐，我真係唔明，因為我覺得家姐都冇咩特別……婷婷話，家姐做中文校報，呢幾年寫啲文都好好睇，而且，平時問佢嘢佢都答得好詳細，仲要靚女又冇架子——Blablabla，婷婷係咁讚家姐，但我真係Get唔到呢啲點，我又唔覺家姐寫文好睇，更加唔覺得佢靚。
不過，當婷婷知道我係「楊知恩細佬」，佢就即刻碌大對眼：
「恩姐係你家姐？估唔到喎。」
我真係唔想估佢係咩意思……因為，我同家姐應該真係好唔同。家姐係偏科人，好嘅好好，差嘅好差；我就所有科都幾平均，係理科好啲；樣呢，父母就遺傳晒佢哋最靚嘅五官畀家姐，我就中中間間咁……雖然我叫阿俊，不過就真係唔多俊嘅。
家姐喺我細個嗰時，仲會摸住我個頭同我講：
「我細佬真係又靚仔又得意！」
但而家就唔會講呢啲啦……知咩事啦。我哋都大個啦。
總之，婷婷同我啲朋友都會話家姐好正。
我會話，真係太天真！你哋冇見過佢敷咗咩海底泥mask個樣咋！你哋都冇見過佢捽腳趾、撩鼻屎！佢腸胃唔好嗰陣時，放啲屁超臭……
講呢啲嘢，會唔會過分幻滅一個青春期小男孩對女仔嘅想法？
唉，有家姐細妹嘅人，果然係早一步認識呢個花花世界。
我啲同學喺做Project時，成日都會借啲意想上嚟我屋企，其實就係想見我家姐。上到嚟，就會係咁望住家姐，夏天佢又着得少布，我就會WhatsApp佢：
「着多件外套啦。」
佢會好奇怪咁望一望我，覆：「熱喎，背心有咩問題。」
「佢哋𥄫你呀。」
「咪癲啦。」家姐仲加咗個笑喊Emoji。
家姐話，我哋全部仲咁細個，點會諗呢啲嘢。不過，佢都入咗房，冇再出嚟。
家姐真係太唔了解男人，佢到底知唔知小學生已經識打飛機？我哋個樣生得細個咋，但都會對女人有邪念㗎。我最好個兄弟就係其中之一啦，佢叫郭靖、係帶我認識新世界嘅男人。
郭靖都成日話我家姐好正，我除咗講「少年你太年輕了」都冇咩好講——你睇吓，點會仲細個呀？
同學走嗰陣時，會突登對住家姐房門講：
「拜拜家姐！」
家姐就會出嚟，同佢哋講拜拜。
家姐話，覺得我啲同學好熱情。唉，我真係廢事講咁多，成班衰仔，尤其係郭靖呀，講完「拜拜」之後仲唔肯走，係都要同家姐講多兩句。
入正題啦，今年，我升中五，婷婷都係。
婷婷都會上嚟我屋企，做咩呢？唔關我事嘅，佢係畀家姐私人補習。原本，家姐話係去婷婷屋企嘅，但係，婷婷話喺我屋企補嘅話，我都可以聽埋家姐講書喎。
啊——家姐收我錢！畀咗個八五折我，佢話益我咗我啦。又唔係我想補，我只係想同婷婷一齊聽書。
不過，換嚟婷婷每個星期嚟我屋企兩個鐘，都非常值得，有時仲要留低食飯添；可以對多佢一陣喎，對我嚟講，就好似期待更多每一日。
有一日，婷婷走咗之後，家姐問我：「你同阿婷好熟㗎？」
「佢坐我隔籬囉，都OK啦。」
「你鍾意佢？」
「唔係，唔好痴線啦。」
我下意識否定，講真，我係暗戀緊婷婷，唔想畀任何人知，我驚畀人爆大鑊，就會好尷尬……
「收皮啦你，我見到你眼甘甘咁望住阿婷喎，嗒晒糖咁。」
係，我家姐嘅形象雖然好斯文、好有氣質，事實上，佢啲粗口、俚語都非常流利，但淨係會對住我講，真係唔公平。
「邊有，我都有眼甘甘望你㗎。」當然係冇，我先冇咁無聊。
「咪扮啦，做咩啊，暗戀？」
「冇。」
我堅持，老虎蟹都話冇啦，如果唔係嘅，家姐話畀婷婷聽咁點？
「真係可惜，」家姐以一副憐憫嘅表情嚟望我：「我之前同阿婷傾偈，八到啲嘢添。」
「咩？」我當然想知。
「原本，我想幫你追阿婷㗎……」家姐講到咁，係咪啫係婷婷講咗啲關於我嘅嘢？
佢又話：「不過既然你唔係鍾意阿婷，咁就算啦，真係心痛阿婷。」
吓？吓？吓？
唔通婷婷話佢鍾意我？
我真係好想知究竟佢哋講咗咩，我問：「你哋傾咗咩啊？」
「人哋私隱啊，你又冇心，唔講。」
「我同佢咁熟，唔怕啦。」關我事㗎嘛，驚咩喎？
「唔係咁好嘅，你又唔係鍾意佢，咁我就唔出賣佢啦。」
家姐搖搖頭，好失望咁樣。
我開始覺得，可能，婷婷真係講咗啲關我事嘅嘢，甚至係——鍾意我。
哇……點解嘅，唔通真係日久生情？唔怪得之佢會嚟我屋企補習啦。
我突然好期待。
我想知到底婷婷同家姐講咗啲咩。
所以，我認：「係，我係鍾意婷婷……到底佢講咗啲咩呢？」