《家姐話，幫我追女仔》: 楔子

我有個家姐——講明先，家姐呢種生物，無論其他人睇落幾正都好，作為細佬嘅我，對佢都係唔會有任何幻想。
 
如果你有個由細到大都對住嘅家姐或者細妹，我諗你都會明白小弟嘅諗法。
 
大佬呀，你哋見到嘅家姐光鮮靚麗、笑容可掬；但我見到嗰個呢，就唔係咁。家姐喺屋企同出面簡直係兩個人嚟，佢起身嗰時啲頭髮勁亂，又毛燥又飛起晒；背心睡衣上面係卡通圖案，一啲都唔性感，就算唔戴Bra飛晒釘都唔會覺得點，咁多年都睇慣啦……
 
最緊要係咩呀？通常佢去完廁所，我再入去，就會聞到佢屙啲屎嘅味仲散晒，即刻咩幻想都冇晒啦。靚女唔屙屎㗎嘛，但家姐，我知佢至少兩日會屙一次囉。佢喺我眼中，難啲係靚女。
 
所以，同家姐唔會有甜，唔好小鹿亂撞，唔亂倫。好心你幾廿歲人唔好咁多幻想啦.jpg
 




我鍾意嘅，係坐我隔籬位嘅女仔。