我倆的緣份，於半世紀前已經開始: 真情流露嘅媽咪

一首好配合媽咪嘅音樂，因為媽咪會係英華入邊，好似大白鯊咁樣撲出黎攻擊獵物，咁多年黎，係冇一個獵物可以倖免

「大家好，我係呢到嘅畢業生，現任訓導主任張詩敏老師，同時，我亦係孔美玲校長嘅獨生女，小恐怖雞就係我」

媽咪係台上靜左一靜「妳地一大班叫我上台多謝我自己媽咪呀…我都唔知點講，我出嫁果晚已經講哂，不過…我媽咪對我嘅恩情，我一世都還唔清。我媽咪…係生我之前受左好多苦…佢真係好堅強…。

係讀書果時，同自己好朋友爭男朋友，明明係有機會發展落去，但係為左友情，自己放手。到結婚之後，以為可以開開心心組織家庭…點知流產左三次，我對上三個姐姐都離開左我地屋企。

媽咪好辛苦先再陀到我，但係我又唔生性，差D令媽咪再次流產兩次，如果唔係媽咪唔理自己生命危險，堅持要保住我，今日就唔會有我呢隻小恐怖雞。」





媽咪D淚水忍唔住啦，於是台上嘅契媽吩咐大家姐

「小敏，拎紙巾俾姑姐先啦」

媽咪抹一抹眼淚

「係我出世後，媽咪好用心照顧我，等我可以開開心心咁長大。我果時好幸福，除左daddy同媽咪之外，仲有契爺契媽、姐姐同哥哥照顧我。

係我小學一年級果時，契爺患左白血病離開我地，當時妳晚晚都喊得好犀利，我果時仲細，唔知可以做d咩，我只可以畫一幅畫送俾契爺幫佢打氣」





銀幕show出媽咪當年幅畫，喂，咩黎架?畢加索?

「就係契爺離開果日，媽咪妳將佢送俾妳果條頸鍊送左俾我，我到我大個之後先知道其中嘅意思。

但係我同媽咪妳結局一樣，自己為左友情，將自己心上人放走左，但係我同妳都一樣，遇上左一個好錫我地嘅人，所以我係到都要多謝我daddy同我老公，多謝你地忍受左咁多年獅哮功同埋我地咁任性嘅兩母女」