我倆的緣份，於半世紀前已經開始: 同房同床

終於我俾佢拖行到佢間房，入到房，佢將我放係地下
 
「喂!!!你唔抱我上去床到架?」
 
「仲要我抱呀?妳自己爬上床啦」
 
「黎啦，抱我上去啦」
 
「真係懶呀妳」
 


「咁將來我嫁左俾你，你都要抱我架啦」
 
「準備…1…2..3」
 
翹哥哥用公主抱咁抱起我，我雙手自然兜去佢頸後
 
「喂….我對大脾滑唔滑呀?俾你摸一陣啦」
 
然後翹哥哥就扔，係扔我落床
 


「嘩!!!你咁粗魯架」
 
「呀….思思妳好重呀」
 
「邊係喎」
 
「妳而家幾重?」
 
「1…..105磅」
 


「咁又唔係太重，妳快d瞓啦」
 
「咁你呢?」
 
「我去阿哥到瞓得啦」
 
「唔….不如….」
 
「咩」
 
我將個身縮埋一邊，再示意叫佢上黎
 
「同你孖鋪啦」
 
翹哥哥聽到咁樣就變得好怕羞


 
「下….我地而家已經唔係小學雞啦」
 
我一手捉佢上黎「上黎啦!!咁婆媽架!!!!怕咩丫!!!!」
 
我地兩個瞓係同一張床上邊，床單同枕頭都係翹哥哥嘅氣味
 
「妳仲係咁怕行雷呀?」
 
「咁……我係怕丫嘛」
 
「好啦…怕左妳啦，我氹妳瞓啦」
 
「嘻，都話你最錫我」
 


我合埋雙眼，聞住哥哥嘅氣味瞓著左。其實我自已真係一個好幸福嘅人，自細就有公公婆婆好照顧我，daddy同媽咪又係錫到我燶，仲有四個契爺契媽，同埋一大堆哥哥姐姐，從小我就係大家懷內長大。
所有人之中，最錫我嘅一定係翹哥哥，佢係最保護我果個，我經常性自己回想起當我地7歲小學二年級果陣係街到走失嘅事…
 
當日我地兩個周圍玩，我見到隻貓仔就追住佢，翹哥哥就叫我唔好走開，不過我地兩個愈走愈遠，終於走失左
 
一向係喊包嘅我，只係識得係到喊，而哥哥就攬到我實一實，然後佢為左氹我，而錫左我個咀一下，我個初吻咁就俾左佢。聰明嘅佢帶我去一個地方，媽咪佢地立即就搵到我
 
因為我地兩個係大坑道走失，所以哥哥就帶我返真光小學搵校工幫手，因為我係恐怖雞三世關係，好多校工都識我，校工見到我地返到學校，就叫當值老師打電話叫媽咪黎學校
 
係果日開始，我就發現呢個大我8日嘅哥哥好識照顧我，而我係果日開始就好鍾意痴住佢。當我知道佢考入皇仁果時，我仲開心過佢屋企，因為我差唔多可以日日都陪佢一齊返放學
 
可能….我係7歲果日開始，已經鍾意左佢，而呢份感情一直收埋係我心中差唔多10年，如果唔係OV嘅話，可能我會一直收埋，但係因為OV對哥哥有意思關係，我先會將呢份感情爆發出黎
 
突然…我感覺到有呼吸聲，我偷偷地打開眼，發現翹哥哥同我好近，佢好似想錫落我到咁…..慢慢…慢慢….我愈來愈緊張……但又唔可以出聲，過左陣，我發覺自己個咀同佢個咀合上左
 


果一刻，我好似飄起左一樣，好輕好輕
 
短短10幾秒，就好似一小時咁耐
 
呢10幾秒，我真係好開心
 
錫完之後，翹哥哥真係瞓左係我隔離，小學之後，我地兩個就再冇孖鋪過
 
大約過左陣，個天開始變暗，我起身之時，身上冚住左被而翹哥哥已經離開左自己間房