我倆的緣份，於半世紀前已經開始: 查探

「做咩咁Down呀，放心啦，我唔太想搵英華妹做女朋友」
 
「點….點解嘅?」
 
「由細到大都對住啦，未必會揀…而且…我鍾意妳地d真光妹多d」
 
「邊間真光先?」
 
「講靚女就當然係妳地港真最靚架啦，之後到油真同九真，鴨真係村姑」
 


「喂喂喂，乜你咁變態架?對我地學校咁熟嘅?」
 
「咁我地好多同學係搵港真妹做女朋友，油真就屬於九龍華仁嘅」
 
「咁你呢?會唔會上黎我地到追女仔?」
 
「我咪追緊妳囉」
 
「你肯定追到我?」
 


「唔知架，追過先知囉」
 
「我同你講呀，我好似大家姐咁，好難追架」
 
「家姐?佢俾人追到啦」
 
「下?家姐…有男朋友?」
 
「係呀，佢床頭放左張相啦」
 


「同學?」
 
「唔….佢地中學果時識嘅，個男仔係普通中學學生，唔係有錢人家」
 
「家姐鍾意人地D咩?」
 
「個男仔一開始同家姐鬧哂交咁架，佢地好似係joint school function d committee黎，之後家姐有次handle果樣野點都整唔到，個男仔就幫家姐手，之後慢慢家姐就鍾意左人地」
 
「家姐中學呀?差唔多5年前啦喎」
 
「係呀」
 
我地處理好d材料之後就走入家姐間房，係家姐床頭，有一張合照，係家姐中學時代影。相中家姐又係扎住孖辮，企係男朋友身邊，兩個都笑得好甜
 
原來著校服拍拖係咁甜嘅


 
「契爺契媽又會俾家姐讀書期間拍拖嘅?」
 
「有咩所謂，兩個都讀到書，唔怕丫」
 
「咁好嘅」
 
「妳估係妳咩，冇人吼」
 
「我咩冇人吼呀!!!係我睇唔上人地者!!!」
 
「嗯…..咁問下妳丫」
 
「問咩呀?」
 


「妳有冇心上人?」
 
妳有冇心上人?聽到佢咁問我之後，我心跳得好快好快，我開唔開口好呢?之前就話有OV係到，但而家OV已經有男朋友….我正想開口果時佢已經答返我
 
「妳有又點丫，人地又唔會鍾意男人」
 
「咩…咩男人呀?」
 
「妳成個男仔頭咁樣，邊有人會鍾意妳架。如果妳唔係讀女校著長衫校服扎辮，肯定冇人信妳係女仔」
 
俾佢咁講一講，我又開始似媽咪D脾氣啦
 
「咩呀!!!我好多人追架!!king屎、華仁、高記都有人追我架!!不過我睇唔上眼之嘛」
 
「唔信」


 
「唔信?哼!!!你問下Silvia囉」
 
「咁即係唔洗我接收妳啦?」
 
「咩…咩呀….你想唔認數呀?」我扁起個咀望住佢
 
「邊敢呀!!妳係恐怖雞三世」
 
「哼!!你唔認數嘅話，我一定會用獅哮功震死你」
 
我地係呢個男仔頭話題上嘻嘻哈哈左好耐，期間所有野都準備好哂
 
「呀….好攰呀!!!!」我大字型攤係梳化上邊
 


「妳攰呀?去房到瞓囉」
 
「去家姐房?唔好啦」
 
「叫妳去我房呀」
 
「你….你間房?」
 
「妳又唔係未瞓過，行啦」
 
翹哥哥將我放係地下然後拖住我行
 
「喂喂喂!!!!!!咁樣對女仔架你」
 
「咁對妳有咩唔啱呀?」
 
「話哂都係淑女呀」
 
「熟女?四十路?」
 
我邊笑邊對佢講「死變態佬」