我倆的緣份，於半世紀前已經開始: 9年後之約

「妳呀，將來一有鍾意嘅男仔要同我講」
 
「唔?點解呀」我轉頭望一望佢
 
「我會呷醋架，做唔到妳最特別，最錫妳嘅男仔」
 
我抬頭碌大雙眼望一望佢
 
「咁…我一世唔嫁囉，等你娶我」
 




我地不停係到買料
 
「妳仲記得呀?我細個話要同妳結婚」
 
「當…當然記得啦，你仲…..錫左我個咀一啖，我個初吻咁就俾你拎走左」
 
「嘩…估唔到妳咁好記性」
 
「當…當然啦….呀，魚皮鮫，媽咪鍾意食」
 




「點止呀，姑姐仲鍾意食烏冬，妳都係」
 
「你都好好記性呀」
 
「咁有冇獎勵呀?」
 
「嗯…好呀」
 
我gut高腳錫左佢塊面一下，然後我地兩個面紅紅望住對方
 




「唔好誤會呀….獎勵黎架….兩兄妹之間嘅錫錫咋….你夠成日錫我額頭同鼻尖囉」
 
「思思呀，不如咁丫」
 
「咩呀?」
 
「妳30歲果日未有男朋友，我就直接娶妳，好唔好?」
 
咁樣…佢算唔算係對我表白呢
 
「唔……要30歲呀?」
 
「唔滿意?」
 
「到時我都人老珠黃啦」我嘟起個咀對住佢




 
「咁25歲啦」
 
「成交!」
 
可能9年之後，我會嫁俾佢?
 
返到翹哥哥屋企，我地兩個起勢咁處理D材料，我地仲打埋電話俾媽咪同契媽，佢地知道唔洗買餸之後都好開心，因為今日又黑雨又多野做，真係好忙。我地兩個生生性性咁幫手，佢地好安慰
 
我地各自係自己屋企換左衫之後，我去左翹哥哥屋企廚房到忙。兩個人一齊係到洗菜整蝦，唔知哥哥係冇意定係有心抽水，佢成日都捉住我隻手，而佢係企係我後邊
 
終於我忍唔住問佢
 
「喂，我隻手滑唔滑呀?」
 




「做…做咩咁問呀?」
 
「你呀!!!咸濕仔!!!成日借D意摸我隻手」
 
「哦!我呢D叫故意，並唔係借D意」
 
我拍一拍佢個頭
 
「作死你呀!你未掂過女仔隻手咩」
 
「真係架，我識嘅女仔，真係唔多」
 
「你係邊到會識到女仔?」
 
「唔….妳地一班港真妹囉」




 
「冇啦?」
 
「仲有英華妹囉」
 
英華妹?佢係邊到識英華D女仔?
 
「你…係邊到識到英華妹?」
 
「媽咪D學生囉，舊年我幫媽咪拎野返英華果時識左佢地」
 
翹哥哥…識英華女校D女仔?我個心突然涼左一下，我好清楚點解自己咁驚。佢爺爺…麻麻同婆婆…英華女校相識….大家都係英華學生
 
到契爺契媽同埋媽咪，雖然佢地係小學相識同埋出世相識，但係拍拖嘅時候，佢地三個都係英華學生
 




到左我地呢一代，除左大家姐、二家姐同三家姐係英華學生之外….浩揚哥哥女朋友都係英華學生，咁即係….翹哥哥都會鍾意英華嘅學生?我第一次後悔冇揀英華女校
 
我個樣有D失落，翹哥哥見到咁樣，用手肘撞一撞我