條女有鳩而我冇賓周: 57

浩俊嘗試去洗走啲蛋糕嗰陣，穎怡一臉歉意咁企喺後面：「對唔住，我哋平時慣咗咁玩。」

鍾意一個人嗰陣緊張過打仗，無時無刻都要小心翼翼地試探對方，生怕自己會稍一不慎，一命嗚呼。

穎怡懷疑自己已經精準無誤地踩中地雷。

浩俊平日一臉正經，睇落的確唔似會玩到咁癲。

穎怡拎住條毛巾，似足啲做錯事嘅小動物咁，低眉下眼咁等待浩俊嘅回應。





鏡入面清晰地反射出洗緊面嘅人，浩俊甚至雙手將水撥向面頰，清爽得媲美平時見到嗰啲洗面奶廣告。

起身嗰陣仲要有滴水，緩緩由額頭經鼻樑流落去下巴，穎怡眼睜睜咁望住嗰滴水勾勒出嘅線條，下意識吞咗啖口水。

「點解你成日都喺度對住我發吽哣？」浩俊洗完面起身，第一眼就見到穎怡不知所措咁企咗喺度。

「冇啊。」穎怡耷低頭遞咗條毛巾過去，大腦不斷回想起十分鐘前滿臉笑意嘅浩俊。

有冇諗過你嘅存在就係令我間歇性lag機嘅原因呀？





「搞掂未啊？」月伶把聲由客廳傳過嚟：「家陣係洗面定係鴛鴦戲水？」

「知啦。」穎怡跑咗出去，唔敢望浩俊俾人開完玩笑嘅表情。

對浩俊嚟講，生日只不過係老咗一歲嘅象徵。細個嗰陣仍然期望收到禮物，同最親近嘅人一齊吹蠟燭慶祝。

人越大就期望越低，只要同曦銘一齊食個飯，或者試吓阿媽煮嘅黑暗料理，浩俊就心滿意足。

個個都咁忙嗰陣，又有邊個會理自己大咗一年？





其實今年同往年冇咩分別，又係同曦銘一齊喺屋企食外賣，只不過係人數多咗咁解。

浩俊坐喺地板，不自覺咁睄去坐喺隔籬嘅穎怡。

原來知道有人會一心一意地對自己好嗰陣，係一件咁幸福嘅事。

「嚟，我哋玩當場拆人情！」浩俊輕快地講道，拎起身邊一個紙袋。

穎怡望住嗰個黑色嘅紙袋，開始緊張起嚟。

一嚟就拆我嗰份得唔得㗎？

浩俊好奇咁望咗眼入面嘅嘢，臉色一變，拎起一個白色滑鼠墊，上面多咗個笑意盈盈嘅動漫人物，胸口位置多咗兩嚿軟癩癩嘅物體。

成個客廳頓時鴉雀無聲。





「咁大整蠱？」浩俊起初以為係曦銘送嘅禮物，但坐喺對面嘅人反而一臉無辜。

「我送錯嘢！」穎怡一手奪過張滑鼠墊，面頰一瞬間變得灼燙。

浩俊根本都未反應得切，月伶就已經敏捷咁提醒自己拆埋下一份禮物。

一切都正正常常地進行到底，直到得返浩俊同穎怡兩個人為止。

原來成個客廳得返兩個人嗰陣係可以咁空曠，空到連穎怡個心都變虛，連忙揸住個垃圾袋拎出去揼。

「我走㗎喇。」穎怡打算借機逃走，今日已經粗心大意到一個新高度，同浩俊單獨相處只會令自己更加不知所措。

「不如我送你返去？」浩俊開口問道。





穎怡「下」咗出聲，雙眼下意識望向浩俊嗰邊。對方靠喺門邊，睇住已經入到𨋢嘅穎怡，有種不用拒絕嘅感覺。

「唔…唔使啦。」穎怡笑住答道，對方仲唔嫌今日自己唔夠柒咩？

但好多時候事實往往都會向另外一個方向發展，就好似「嘴上說不要，身體卻很誠實」嘅道理咁。

​穎怡話就話「唔使」，隻手就好似唔聽話咁偏偏㩒落開門掣嗰邊，佢笑住咁一邊同浩俊對望，手指一邊不斷咁㩒掣。

點解對門就係唔閂㗎呢？

​穎怡連續咁㩒咗好幾下，先發現原來自己又喺浩俊面前柒多次。

「算啦。」𨋢門差唔到合上嘅時候，浩俊就伸手擋住對門，行入去穎怡隔籬：「你個腦咁唔等使，一個人唔太安全。」

穎怡哭笑不得，唯有「哦」咗下，接受對方嘅存在。