條女有鳩而我冇賓周: 58

浩俊所住嘅地方離穎怡屋企路程唔遠，行廿分鐘左右就到。假如係普通朋友的話，穎怡應該一早叫對方留喺原地等自己返到去一齊打機，但去到浩俊身上就變咗另外一種講法。

就算自己今日不斷喺對方面前出醜，穎怡突然都想要多一個伴一齊行返去，彷彿想無限延長同浩俊單獨相處嘅時間。

同埋，咁夜仲喺元朗行，好危險㗎喎。

呢個係一個藉口。

穎怡將頸巾拉得更緊，嘗試喺口罩外面加多層防禦牆，但偏偏收唔埋發紅嘅耳尖。





高過穎怡成個頭嘅浩俊自然發現對方一反常態，今日更異常地沉默。

於是浩俊決定旺一旺個場先！

「其實我應該都唔使送你返去。」浩俊乾咳一聲，繼續同穎怡平排咁行：「你個樣都幾安全。」

「咩料呀你！」穎怡氣憤咁抬起頭怒啤浩俊。

今日穎怡着咗件米色外套，再攬埋條淺色頸巾，成個人就好似粒巨型棉花糖咁令人想將佢搓圓㩒扁。





「唔想送咪唔好出嚟囉。」穎怡一拳打落浩俊個肚，後者假裝受到一萬點傷害，表情痛苦咁揞住個胃。

真係谷鬼氣！

如果係其他人講的話，穎怡大可以當係一個玩笑一笑置之，但係浩俊一講出口嗰陣，就會莫名其妙地認真咗。

穎怡面珠墩因為激動而微微鼓起嚟，佢刻意行快兩步，扮唔理浩俊。

「對唔住囉。」





對腳長啲果然會行快啲，浩俊幾步就已經追得上穎怡小跑後嘅距離。一拍上穎怡膊頭嗰下，對方就好似受到刺激咁縮起嚟，眼神帶住殺意咁望住自己。

「再講就頭都擰甩你。」

哇— 啲女人真係小器。

浩俊舉起雙手作投降狀，唔敢再得罪面前呢位嬲爆爆嘅… 棉花糖？

兩個人一路笑住打鬧咁行返去，嘈到樓上住客差唔多想掉花樽落去懲罰呢對狗男女。

「快樂嘅時光總係過得特別快，又係時候講byebye。」浩俊惋惜咁講道，眼眸寫滿不捨。

「押韻喎師兄！」穎怡刻意避開對方視線，怕會一時間心軟。

眼見穎怡屋企就喺前面，浩俊嘆咗口氣，輕輕咁拍咗下穎怡嘅頭殼頂。





穎怡頭殼頂生命值減一千，心臟收到一千萬點暴擊傷害。

「我個頭有冇咁好拍呀？」穎怡用手冚住個頭，內心不禁慶幸起有口罩同頸巾雙重保護，浩俊根本唔會知道自己變得面紅耳赤。

「見到矮過我嘅咪拍囉。」浩俊口直心快咁回應對方，講完再拍多一次。

浩俊明顯地冇考慮過後果，穎怡聽到之後臉色微不可見咁變咗變，眉頭亦隨即皺起嚟。

「咁係咪其他女仔嘅頭都會拍？」穎怡衝口而出，一時變得認真嘅語氣令浩俊呆咗呆。

請問呢啲係咪傳說中嘅呷醋？

「唔會。」浩俊一臉誠懇咁望向穎怡嗰邊，努力壓制住心臟不斷活蹦亂跳。





成件事就好似中咗六合彩咁猝不及防，穎怡一時間反應唔嚟，對手仍然維持喺冚住個頭嘅姿勢。

「哦。」穎怡似乎意識到自己一時失言，冇諗過會因此收到驚喜。

「咁我係咪應該慶幸可以做到嗰個獨一無二嘅頭殼頂？」穎怡臨落荒而逃前不忘加多句，清脆聲線染上害羞嘅語氣，喺其主人逃走後逐點逐點隨風飄散。

獨一無二… 浩俊獨自企喺風中凌亂，大腦不斷重複啱啱聽到嘅內容。

可想而知，浩俊心臟同樣受到一千萬點傷害。

兩邊返到屋企之後，心有靈犀地冇再提起啱啱發生嘅事，反而興致勃勃咁互相轟炸地獄梗圖。

穎怡縮喺被竇，笑聲好似較咗震動模式咁令膊頭急促聳動。派膠果然能醫百病，派派下就會將一切難堪往事拋諸腦後。

收到對面一句早唞後，睏意一瞬捲上眼角，穎怡好奇咁追溯起兩個人嘅對話紀錄，嘴角再一次升上去。





係喎，點解我一開始會話浩俊係一碌木嘅？

明明就係咁多嘢講嘅一個人，每一次都好似開正對方嗰範咁，無論係咩話題都可以侃侃而談。

根本係兩個世界，所謂沉默寡言只係因為慢熱。更何況，識耐咗之後就會發現對方只不過係隻懶型嘅小學雞。

真係可愛。

厚被隨住動作發出磨擦聲，穎怡將電話抱喺心口，感覺今晚張被特別暖。