條女有鳩而我冇賓周: 56

一月十號，浩俊生日。

為咗確保浩俊唔會提早發現大家所準備嘅驚喜，曦銘再次叫浩俊幫手代班補習，去應付嗰位令人聞風喪膽嘅學生，同時亦係穎怡嘅表妹— 穎心。

喺穎心糾纏緊浩俊嗰陣，穎怡等人就提前向浩俊媽借咗鎖匙，手忙腳亂咁喺浩俊屋企吹氣球，裝飾客廳，陣容一度堪比豪華Staycation。

正正因為唔知道浩俊鍾意啲咩，所以穎怡一口氣準備晒所有心目中最好嘅嘢— 就好似當你鍾一個人嗰陣，連星星都想摘落嚟送俾對方。

月伶係最後一個到，佢一開門嗰刻忍唔住「哇」咗聲。





大大個「21」數字氣球浮喺客廳牆邊，搶走曬所有焦點，周遭各式各樣嘅氣球反而過於隆重，令人有種壓迫感。

月伶嘴邊笑容抽咗抽，單刀直入：「你會唔會做多咗？」

點解連曦銘都冇叫停穎怡？

穎怡拎開嘴邊氣球，仍然未清醒過嚟：「會咩？」

月伶反咗個白眼，雙手捉住穎怡，將佢推到去啱啱自己所企嘅位置：「你覺得呢？」





穎怡原本仍然大惑不解，但當自己一企到客廳中間嗰陣，隨即就被羞恥感打擊到揞住塊面。

考慮到浩俊不嬲都係一切從簡嘅人，自己咁做同喺旺角當街當巷求婚，然後被拒絕嘅人有咩分別啊！？

已經差唔多七點半，浩俊就快補完習返嚟。

要喺五分鐘之內拮穿晒啲氣球只會令左鄰右里懷疑呢度進行緊爆破工程，相信不久後就會收到投訴。

「點算。」穎怡望向月伶，手入面氣球已經漏晒氣。





月伶趕緊將兩個大氣球掹落嚟，曦銘同海螢亦有默契地推曬啲細氣球去梳化後面。

只要浩俊一日唔坐落梳化，都唔會發現身後嗰個五彩繽紛嘅小山丘。

客廳一瞬間就打回原形，成件事快過老師入課室前大家都衝返埋位嗰幾秒。

「爭咁啲嘢。」當月伶一行人匿埋喺梳化後面嗰陣，不懷好意地望向穎怡嗰邊。

「記得同人講你就係佢嘅生日驚喜。」月伶切咗一片蛋糕放喺碟上面叫穎怡拎住，然後隨手喺袋拎起條絲帶綁喺穎怡頭上面。

穎怡根本就冇時間去反應，月伶就一掌推咗自己去客廳中間，門口又好死唔死響起扭鎖匙聲。

壽星仔要返嚟啦。

浩俊一開門嗰剎那就見到眼神慌張嘅穎怡，一個人尷尬地企喺客廳正中間，手上靜靜地躺著一片蛋糕。





「咩事？」成千上萬個問號喺浩俊腦海中彈出嚟，點解穎怡會喺自己屋企嗰度？點解會拎住舊蛋糕企喺中間等我返嚟？

穎怡頭上面嗰個蝴蝶結係咩事？

「生日快樂。」穎怡輕聲講道，奮力鎮住內心兵荒馬亂。

浩俊朝穎怡嗰邊行過去，笑意慢慢漾開：「多謝你。」

穎怡lag咗機，呆若木雞咁望住浩俊彎低身吹熄蠟燭。

浩俊嘅眼睫毛長得誇張，根根分明得似乎可以數到出嚟。

一條、兩條、三條





希望浩俊感覺唔到自己隻手震到好似裝咗摩打咁。

正正因為穎怡僵喺原地一動不動，浩俊一抬頭嗰陣就正正停喺穎怡面前，兩個人之間距離頃刻拉近到十五厘米。

早知今朝刷牙刷得認真啲。

穎怡連氣都唔夠膽唞，瞪大眼同浩俊四目相投。

有啲時候，浩俊淨係會對住穎怡一個人露出某啲表情，例如好似而家咁，佢笑起嚟嗰陣對眼入面好似有星星。

「呢個係咩事？」浩俊望上去穎怡嘅頭殼頂。

「冇呀。」穎怡連忙除低蝴蝶結，嘗試轉移話題：「你許咗咩願？」

浩俊打算開口嗰陣，忽然一嚿蛋糕出現喺兩個人之間，壓落浩俊塊面。





「食屎啦！」月伶開玩笑道：「仲喺度打情罵俏！」

曦銘同海螢喺梳化後面企咗喺身，帶住意味深長嘅表情食花生。

浩俊下意識舔咗下蛋糕嘅味道，心頭一緊。

原來最後都係栗子味。