條女有鳩而我冇賓周: 55

浩俊生日嘅事準備得如火如荼，穎怡以往對其他人都冇咁上心。明明只不過係一粒微塵勞碌掙扎多一年嘅證明，但今次隱隱約約有啲唔同。

可能係因為放假無所事事，所以先會咁認真。穎怡再一次搵藉口去解釋一切別有用心嘅準備工作。

禮物大可以行實用路線，要出嚟嘅人都報晒名，但有啲嘢總要向主人公詢問過先可以落決定。

於是穎怡咬緊牙關，打破呢段時間停滯於「早晨」「早唞」嘅僵局，主動邀請浩俊一齊打機。

「喂。」穎怡眼見浩俊嘅icon出現喺屏幕上，開mic嘅時候先發現自己從來冇叫過浩俊嘅名，本身都冇為意，過咗幾日突然講返嘢反而變得尷尬起嚟。





放個假原來仲有智商倒退嘅後遺症。

「嗯？」對面似乎啱啱瞓醒，聲線沙啞磁性得令穎怡心頭一震，剎那間慶幸冇其他人聽到呢把聲— 殺傷力太大，呢啲粗重嘢都係自己一個頂就夠。

「你鍾意食咩味嘅蛋糕？」穎怡懶得掩飾，簡單直接咁問出口。

「平時唔鍾意食甜嘢…」浩俊頓咗頓，感覺答案未免過於敷衍，下秒改口：「栗子味唔錯。」

「栗子味啊？」穎怡遲疑片刻，語帶遺憾道：「好啦。」





總要尊重壽星嘅選擇。

「你唔好栗子味咩？」浩俊感覺到對方語氣間一絲唔情願，無緣無故着急起嚟：「其實你揀咩味我都會鍾意。」

可能係大腦未清醒嘅緣故，浩俊冇三思就直接表達出真實想法，直直砸喺穎怡心上。

穎怡雖然知道浩俊冇想像中咁難相處，但對方嗰番說話難免令人遐想聯翩。

奇怪。人一旦心生邪念，睇咩都會變味。





「你又知我係買俾你？」穎怡平日習慣心直口快，到緊急關頭嗰陣反而口不對心。

浩俊嗰頭冇出聲，顯然冇預想到穎怡會否認準備緊自己生日嘅事實。

「有識嘅人就快生日，想調查吓啲男仔鍾意食咩蛋糕。」穎怡胡亂搵咗個藉口去搪塞，無論點都唔想俾浩俊知道自己對佢咁上心，邊個回想俾人捉到痛腳？

最近除咗浩俊之外的確有其他人即將生日，只不過係穎怡嘅表弟咁解。

今年穎怡一次過喺同一個舖頭買咗表弟同浩俊嘅生日禮物— 前者係一個巨乳動漫人物滑鼠墊，軟綿綿嘅質感足以呵護表弟長年累月都要作上下運動嘅手腕。

後者係一個淨色滑鼠墊，穎怡喺見到深藍色嗰刻就不自控地諗起浩俊，於是下定決心買俾對方。

鍾意打機嘅人唔會拒絕一個襟污糟又大嘅滑鼠墊。

「咩男仔嚟？」浩俊聲線染上幾分煩躁，明知自己無權過問穎怡嘅感情生活，但一得知有其他異性嘅存在不免有啲在意。





「冇呀，表弟嚟。」穎怡輕輕笑起嚟，無意再作弄對方。

「哦。」浩俊再次無言以對，好似俾人整蠱完一輪咁有啲唔啹。

浩俊好似每一次都會誤會穎怡身邊嘅親戚為對手，到底係過於敏感定對自己過於自卑。

聽到答案嘅嗰刻就好似放下心頭大石。

對浩俊而言，穎怡唔係僅僅識咗個零月嘅新朋友，對方更加似係陰魂不散纏咗自己幾年嘅熟人。

唔知點解對方明明淨係當住自己面放聲大哭咗嗰一段時間，就已經足以深深印喺腦海中揮之不去。

穎怡同陰晴不定嘅天氣差唔多，連大交合都預測唔到對方下一秒嘅反應。浩俊自己亦不外如是，最近自己嘅情緒變得愈嚟愈唔穩定，連自己都摸唔透點解可以咁大變化。





浩俊唯一肯定嘅係自己恨不得時間快進到幾日之後，今次係第一次同穎怡一齊慶祝生日。